¹ Pecisijya Yesu vonse venzolabla mukumvwa kwa banthu, eloba mu Kapernao. ² Lomba Kenturiyo enze na kapolo wenzo lemekeza ngako, enzelwala nakusala pafupi kufwa. ³ Pecimvwa Kenturiyo za Yesu etuma madoda ba Ayuda kwa eve, kumusenga kuti awele eve nakupolesha wanchito wake. ⁴ Pewela kwa Yesu madoda emusenga modandaula becit, ''niwoeyenela kuti mweo mumcitile ici eve, ⁵ ndaba okonda calo casu, niye amene etimangila sunagoge.'' ⁶ Teto Yesu epitilijya uendo wankw nabeve. Koma penzelini patali na nanda, Kenturiyo etuma ayake kuti akalabile na eve, ''Ambuye, musazivute, ndaba nine wosayenela kuti mweo mukalobe pansi pa mtenje wangu. ⁷ Cifukwa ca ici niliye ziyese woyenela kuwela kwa mweo, koma mulabile tyala liu na wanchito wangu apole. ⁸ Pakuti nane neo nine lidoda lamene lili pansi pa ulamulilo, nina asilikali pansi pangu. Nulabila kwa uyu 'nkhya,' naye akuya,' nakumuyakine 'wela' naye owela, na kuwa nchito wangu 'cita ici,' naye ocicita.'' ⁹ Pecimvwa Yesu edabwa naye nacungulukila ku gulu yemukonkha yeve eciti, ''nulabila kwa mweo, olo mu Israyeli niliyepeze cikhulupililo coteti.'' ¹⁰ Pibewelela ku ng'anda bala enze tumiwa, bepeza wanchito ali bwino. ¹¹ Mosacelwa kufuma apo, Yesu eluta kumzinda woitiwa kuti Naini, na ophunzila bake nagulu likulene leciya naye. ¹² Pefwika pafupi na mulyango wa mzinda, Langani, lidoda lenze lecifwa lenyamuliwa, mwana umozi wa nyina bake (enze ofwilwa), na gulu likilene kufumila ku mzinda enze naye. ¹³ Pecimuona Ambuye ecita naye cifundo ngako eciti kwa eve, ''Osalila.'' ¹⁴ Ndipo eluta nakuta lushaka pecinyamulila citanda, nabala enzenyamula citanda bepanama cilili. Eciti, ''lidoda litontho, nulabila kwa weo, uka.'' ¹⁵ Lidoda lenze lecifwa lenkhazikika na kuyamba kulabila, Yesu emuthwala kwa anyina. ¹⁶ Ndipo wowa webakata bonse, nakupitilijya kuyamika Mulungu nakuti, ''mneneri mkuleleni waukishiwa pakati pasu'' ndipo ''Mulungu walanga pa banthu bake.'' ¹⁷ Nkhani ya Yesu yefishiwa mpaka ku Yudeya konse na maiko onse ali pafupi. ¹⁸ Ophunzila ba Yahane emuujya ivi vinthu vonse. ¹⁹ Ndipo Yohane eyita abili ba ophunzila ophunzila bake nakubatuma kwa Ambuye kuti akati, ''nimweo wala wati akawele, olo tifunefune muyakene? ²⁰ Pecifwika pafupi na Yesu, madoda eciti, ''Yohane Mbatizi watituma kwa mweo kuti, nimweo wala wati, akawele, olo tifunefune muyakene?'' ²¹ Mu ola ila epolesha banthu ba nyinji kufumya matenda yao na zovuta zao na mizimu iyipa, na kubanthu anyinji osalanga ebapa kulanga. ²² Yesu eyankha nolabila kuti kwa beve, ''mukaluta pa njila yanu, mukamuujye Yohane zamwaona na zimwamvwa. Banthu osalanga olandila kulanga, banthu olemala oyenda, bamambombo okonzewa, banthu osamvwa akumvwa, banthu becifwa oukishiwa kuwelela ku umoyo wao, ndipo osauka ouziba uthenga wabwino. ²³ Munthu wosaleka kukhulupila mwa neo cifukwa ca zocita zangu ni odala.'' ²⁴ Peciluta otumiwa ba Yohane, Yesu eyamba kulabila ku magulu za Yohane, mweciya kucipululu kuyoona cinji? mshanga ugwendezeka na mphepo? ²⁵ Koma mweciyoona cinji? munthu ovwala covwala cofeba? Langani, bala ovwala vudula na bala onkhala bwino ali mu mang'anda ya mafumu. ²⁶ Koma mweciyoona cinji? Mneneri? Ee, nulabila kwa mweo kuposa meneneri. ²⁷ Uyu niwala elembewa za eve, 'ona, nutumijya otumiwa pa menso pako, wamene ati akakonze njira yanu.' ²⁸ Nulabila kwa mweo, pa bala ebadwa ku manina paliye mukuleni opambana Yohane. Ula wamene nimutontho mu ufumu wa Mulungu nimukuleni kuposa mwalili.'' ²⁹ (Ndipo banthu bonse pecimvwa ici, kuikako na okhomesha misonkho, besindikijya kuti Mulungu niwacilungamo, ndaba ebatiziwa na ubatizo wa Yohane. ³⁰ Koma afalisi na bala ozibishisha cilamulo bekana colinga ca Mulungu pa beve beka ndaba aliye batiziwe na Yohane.) ³¹ Ku cinji? ndipo, kuningalinganijye banthu ba mbadwo uno? olingana na cinji? ³² Olingana na bana osebela mumsika, wonkhla na kuitana, na kuti, 'tekulijyilani mtolilo na mweo muliye vine. Telijya nyimbo ya maliro na mweo muliye lile.' ³³ Yohane Mbatizi ewela osalya buledi na kusamwa vinyu, mukuti, ali na cibanda.' ³⁴ Mwana wa munthu ewela akulya na kumwa, ndipo mukuti, 'Onani, nimunthu mkulu kulya ndipo nicakolwa, muyao wa otola misonkho na ocimwa!' ³⁵ koma nzeru yulungamishiwa na bana bake wonse.'' ³⁶ Lomba umozi wa afalisi eyita Yesu kuti alye naye. Yesu peciloba mng'anda ya afalisi, eluta kuthebulo kuti alye. ³⁷ Onani penze linina mumzinda lenze locimwa. Peciziba kuti enze kulya pa thebulo mung'anda ya mfalisi, etola nsupa ya dabastero ya mafuta onunkhila. ³⁸ Ali peneme kuvuli kwake pafupi na mendo bake, olira, eyamba kunanisha mendo bake, nakubapukuta na sisi yakumutu kwake,nakumufyofyona mendo bake nakubatambisha namafuta onunkhila. ³⁹ Pamene mfalisi eita Yesu peciona ici, eganiza kwa eve eka, eciti, ''kuti ili lidoda lenze mneneri sembe laziba nibani nakuti nilinina lotyani lumukata, kuti nilocimwa.'' ⁴⁰ Yesu eyankha eciti kwa eve, ''Simoni, nili na cinthu ccolabila kwa weo.'' eciti, ''cilabileni, mphunzisi!'' ⁴¹ Yesu eciti, ''muyakine wokongolesha ndalama enze na ba nkhongole abili. Muyakine enze na 500 na muyakine enze na 50. ⁴² Pabaliye mulipile, ebakhululukila onse. Mwa ici, nibani wa aba angamkonde ngako?'' ⁴³ Simoni emuyankha nakuti, ''nuyesa kuti niwala wecikhululukira zinyinji.'' Yesu eciti eve, waweruza bwino.'' ⁴⁴ Yesu ecungulukila kuli linina ndipo eciti kwa Simoni, ''waliona linina ili. Naloba mng'anda mwako. Uliye nipase manzi yosamba m'mendo bangu, koma waninasha mendo bangu na misozi nakuipukuta na sisi lake. ⁴⁵ Uliye nipase cifyofyono, koma kufumila panaloba aliye leke kufyofyona mendo bangu. ⁴⁶ Uliye tambishe mutu wangu na mafuta, koma leve latambisha mendo bangu na mafuta onukhila. ⁴⁷ Moteto, nulabila kwa mweo, macimo bake, benze banyiji, bakhululukiwa- pakuti okonda ngako. Koma wala okhululukiliwa patontho okonda patontho.'' ⁴⁸ Teto eciti kwa eve, ''Macimo bako akhululukiwa.'' ⁴⁹ Bala benze kulya pamozi beyamba kulabila mwa beve beka, ''nibani uyu wokhululukila na macimo?'' ⁵⁰ Teto Yesu elabila ku linina, ''cikhulupiliro cako cakupulush. Nkhoya mu mtendele.