¹ Lomba zecitika pa sabata Yesu penzoenda minda ya tirigu, na ophunzila bake benzotola mitu ya ngala-ngala za tirigu, nozifilikita mu manja mwao, nakulya. ² Koma afalisi ayakine eciti, ''nicinji mucita cithu cosalamuliwa kucita pa sabata?'' ³ Pobayankha, Yesu eciti, ''muliye belenge zecita Davite penze na njala, eve na madoda benze nao? ⁴ Eloba munanda ya Mulungu notolamo buledi wenzemo wacineshero uyakine nakulya, nopasako madoda benze nao kuti alye nao, olo kuti enzololewa ni bansembe tyala kuilya. ⁵ Ndipo ebaujya kuti, mwana wa munthu ni mbuye wa sabata. ⁶ Zecitika pa sabata iyakine eve eloba mu sunagoge nakuyophunzisha banthu. Penze lidoda enze na kwanja ya manja yolemala. A ⁷ lembi na afalisi enzomulangilila pafupi kuti aone ngati apoleshe munthu pa sabata, kuti angapeze cifukwa comnamijyila eve. ⁸ Koma eziba zibenzoganiza ndipo eciti ku lidoda lenze na kwaja yolemala, ''nyamuka ndipo upaname pakati pa banthu onse.'' teto lidoda lenyamuka nopanama pala. ⁹ Yesu eciti kwa beve, ''nukukoshani, nishi nicololeka kucitita cabwino pa sabata kapenakucita ciipa, kupulumusha moyo olo kuiononga?'' ¹⁰ Ndipo elanga langa onse nakuujya lidoda lomela, ''tambasula kwanja yako,'' ecita teto ndipo kwanja yake yewelelamo. ¹¹ Koma bezula na ukali ndipo belabijyana cakuti bangacite naye Yesu. ¹² Zecitika m'masiku amene ayo eve efuma kuya kulupili kuyopemphela. Epitilijya kupemphela usiku one kwa Mulungu. ¹³ Pikwecica, eita ophunzila bake nosankhapo bali twelufu, enzoitiwa kuti soti kuti otumiwa. ¹⁴ Mazina ba otumiwa benze Simoni (epasiwa soti zina lakuti Petulo) namkwao Andeleya, Jemusi, Joni, Filipo, Batulumeyo, ¹⁵ Mateyo, Thomase, Jemusi mwana wa LufeyoSimoni enzoitiwa kuti Ziloti, ¹⁶ Yudasi mwana wa Jamusi, na Yudasi Skaliyoti emupeleka. ¹⁷ Ndipo Yesu eseluka pa lupili no panama pa malo onkhazikika bwino na gulu likulene la ophunzila bake na gulu sotii likulene la banthu locokela mu Yedeya na mu Yerusalemu na a kumbali kwa nyanja ya Turo na Sidoni. ¹⁸ Bewela kuzokumvwa za eve nopolesha matenda bao. banthu enzovutishiwa na mizimu iipa epoleshewa nao. ¹⁹ Onse eze muciguu enzo yesa-yesa kuti amukumye eve cifukwa mphamvu zopolesha zenzofumila kwa eve ndipo ebapolesha onse. ²⁰ Ndipo elanga ophunzila bake na kuti, ''Odalisika ni mweo osauka, ndaba ufumu wa Mulungu ni wanu. ²¹ Odalisika nimweo muli na njala lomba, poti mukakute. Odalisika ni mweo mulira lomba, ndaba mukaseke. ²² Odalisika nimweo ngati banthu okuzondani, nakukupatuliwa nakutukwaniwa ndipo na kukana zina yanu nakuti niliipa, cifukwa ca mwana wa munthu. ²³ Pasiku yoteti sekelelani na kukolola cimwemwe, cifukwa mukatole mphaso ikuleni kululu, poti makolo bao enzunza aneneri munjila ngati yamene iyi. ²⁴ Koma soka kwa mweo olemela, cifukwa mweo mulandililatu zokondwelesha zanu, ²⁵ soka kwa mweo mukuta lomba, ndaba mkamvwenjala musogolo. Soka kwa mweo muli nacisangalalo, cifukwa mukalile nolila misozi. ²⁶ Soka kwanu mweo amene banthu okukmbilani vabwino, paakutindiye mwecitila makolo banu kwa aneneri awenye. ²⁷ Koma nalabila namweo mumvwilila, kondani adani banu ndipo mubacitirevabwino bala okuzondani. ²⁸ Dalisani okutembelerani mweo naku pemphelera okucitirani viipa. ²⁹ Kwa eve okunyata pa mbovu imozi umolole akunyate napayake. Ngati muyakine wakutolera coyambata cako, osamulesha. ³⁰ Pasani ayense okusengani kanthu. Ngati muyakine watola cinthu canu osamulolejya kicileta soti. ³¹ Mumufunila banthu kuti akicitire weo, ucite soti teto kwa beve. ³² Ngati ukonda tyala bala okukonda, mu phindu lanji mweo? Pakuti nao ocimwa okondana na obakondo. ³³ Ngati mucitra vabwino beve beka vabwino, mutolepo phindu lanji? ³⁴ Ngati mukongolesha beka-beka umuona kuti angakupaseni soti, mu phindulaponji? Pakuti ocimwa okongolesha ocimwa, ayao kuti akalandile mayeso soti oteto. ³⁵ Koma kondani adani banu nobacitira vabwibo. Mukongolesheni kali konse, ndipo mphaso yanu ikabe ikulu, mukankhale bana ba wakululu, pakuti eve ocitira vabwino osalumba na banthu ayipa. ³⁶ Nkhalani acifundo, monga awisibanu ni cifundo. ³⁷ Osaweruza namweo simukaweruziwa. Musasushe na mweo mukasushiwe lini. Khululukilani ayakine na mweo mukakhululukiwe. ³⁸ Pasani nakwamweo mukapasiwe muyeso wabwino_ wosindilika_wogwendeza na wotayikila_ ukahtiliwe pamendo panu. Poti na muyeso wasebenzesha uyesewe soti kwa mweo ³⁹ Ndipo ebaujya soti fanizo. ''Munthu aliye menso angasolele aliye menso muyake?'' Ngati ecita teto, onse abili angawile micisengu, banga cite lini? ⁴⁰ Ophunzila anga kule lini kupitilila muphunzisi wake, koma aliyense akalandila maphunziro mokwana akabe ngati muphunzisi wake ⁴¹ Nicinji caulangila kacinyanswa katontho kali mumenso mwa mkwanu, koma osaona cigodo cili mulinso lako? ⁴² Unganene tyani ku mukwanu, mkwasu leka neo nikucose kacinyaswa kali mulinso lako,' pamene weo weka uona lini cigodo cili mumenso mwako, weo wawenye, yambila kucosa cigodo cili mulinso lako, niye pungaone bwino kuti ucose cinyanswa cili menso mwa mumkwanu. ⁴³ Pakuti kuliye cimuti ca bwino cinga bale cipaso coola, olo cimuti ciipa cinga bale cipaso cabwino. Pakuti cimuti ciliconse cuzibikila vobala vake. ⁴⁴ Pakuti banthu ocala lini nkhuyu pa minga, olo kuvuna mtesa pa mtungwi. ⁴⁵ Munthu wabwino kufuma mu cuma ca bwino ca mumtima wake ofumya va bwino, na munthu muipa cufuma mucuma ciipa ca mumtima wake wofumya viipa. Pakuti mkamwa mungo labila monga kupaka kwa vili mumtima mwake. ⁴⁶ Nanga muniita tyani 'ambuye, ambuye,' pamene muvilila lini vunulabila? ⁴⁷ munthu aliyense owela kwangu nakumvwa mau bangu nakubamvwilila, nikuujyeni olingana naye. ⁴⁸ Olingana na munthu omanga nanda ekumba pansi ngako, nomanga maziko ya nada pa mwala okosa. Pakwewela mvula, manzi esefukila kugunda ku nanda, koma nanda iliye gwendezeke,ndabayenzemangiwa bwino. ⁴⁹ Koma wakumvwa mau bangu nakusabacita, olingana munthu omanga nada palulu pa nthaka paliye maziko. Pakwewela Mvula, manzi esefukila nogunda ku nanda, nthawi yamene iyo nanda yepona na kusililatu.