¹ Lomba phwando la buledi uliye cofufumisha lefwika, lumenewa pasika. ² Akulu asembe na alembi enzofuna mwangampaile Yesu, pakuti enzoyopa banthu. ³ Ndipo Satana eloba mwa Yudasi, wonenewa esikalioti, enze m’mozi wa thwelufu. ⁴ Yudasi eluta kwa akulu asembe na akapitawo nakukambilana nao mwamene angamupelekele yesu kwa beve. ⁵ Ekondwela nogwilizana kuti ampase ndalama. ⁶ Yeve evomela nakufun-funa mpata kuti ampeleke kwa beve paliye gulu. ⁷ Ndipo lefwika siku la buledi uliye cofufumisha, lamene lenzofunika kupaila nkhosa ya pasika. ⁸ Teto Yesu etuma petulo na yohane, eciti, "nkhoyani mukatikonzele cakulya ca pasika, kuti tikalye." ⁹ Eciti kwa yeve, "nikuni kwa mufuna tikacitile cikonzekelo?" ¹⁰ Abayankha kuti, "Onani, pamuloba mu mu’mzinda, mukumanena munthu wonyamula nongo ya manzi. Mumukonkhe m’ng’anda mwa kuyoloba. ¹¹ Ndipo mukanene kuti kwa mwinikazi wa ng’anda, 'Mphunzisi akuti, "cilikuni cipinda ca alwendo, kwamene azalyela pasika na ophunzila bake?"' ¹² Akakuonesheni cipinda cikulene ca palulu cokonzewa. Mukacite cikonzekelo kwamene uko." ¹³ Ndipo eciya, nakupeza zonse monga mwa ebauzila. Teto ekonza cakulya ca pasika. ¹⁴ Payekwana ola, enkhala pansi na otumiwa. ¹⁵ Ndipo eciti, "nafunishisha kulya pasika uyu na mweo nikaliye vutike. ¹⁶ Pakuti nulabila kwa mweo, sinizalya soti ici mpaka citakwanilisika mu ufumu wa Mulungu." ¹⁷ Ndipo yesu etola kapu, ndipo peyamika, eciti, "tolani ici, ndipo mugabane. ¹⁸ Pakuti nulabila kwa mweo, sinizamwa soti za cipaso ca mpesa mpaka ufumu wa Mulungu ukawele." ¹⁹ Ndipo etola buledi, ndipo peyamika, Esuna, Nakubapasa, nakuti, "uyu ni mubili wangu, wamene upasiwa kwa mweo mukocita teti kunikumbukila neo." ²⁰ Etola kapu cimozi-mozi mwecitila pa cakulya ca m’mazulo, eciti, "Iyi kapu ni pangano la lomba mumagazi bangu, bamene batayika kwa mweo. ²¹ Koma mvweseshani. Kwanja ya uyo wonipeleka neo lilinane pa thebo. ²² Pakuti Mwana wa Munthu coona akuya monga mwezeikiwila. Koma soka kwawala munthu mwati akampeleke!" ²³ Eyamba kukambilana beka kuti nibani mwa beve angapeze ocita coteto. ^{24 25} Koma pamene apo peuka mkangano pa beve kuti nibani enze oyenela kunkhala mkulene. Eciti kwa beve, "mafumu ba akunja ndiye ambuye wao, amene alina ulamulilo pa beve onenewa kuti ocita ncito zabwino. ²⁶ Koma zufunika lini kunkhala teti na mweo. mmalo mwake, lekani uyo ali mkulene pa mweo ankhale ngati mtontho, ndipo uyo ali ofnikila ankhale ngati mtumiki. ²⁷ Pakuti mkulene nibani, uyo onkhala pa thebo, kapena uyo otumikila? Niuyo lini onkhala pa thebo? Ndaba nili pakati panu ngati mmozi wotumikila. ²⁸ Koma nimweo mwapitilizya kunkhala nane mmavuto bangu. ²⁹ Nuika ufumu pa mweo, monga Atata eika ufumu pa neo, ³⁰ kuti mukalye na kumwa pa thebo yangu muufumu wangu, ndipo mukankhale pa mipando yacifumu kuweluza mitundu thwelufu ya Aisilayeli." ³¹ "Simoni, Simoni, ziba, Satana osakila weo, kuti akupepete ngati tiligu. ³² Koma nakupemphelela, kuti cikhulupililo cako cisakangiwe. Ukawelela, ukalimbishe anekwanu." ³³ Petulo eciti, "Ambuye, nineokonzeka kuluta namwe kujele olo kuimfwa." ³⁴ Yesu eyankha, "nukuuzya, Petulo kombwe alile lini lelo, ukaliye nikane katatu." ³⁵ Ndipo Yesu eciti kwa beve, "penekutumani ciliye thumba ya ndalama, na thumba ya vakulya, olo nkhwabilo, mwesobekela vilivonse?" Eyankha kuti, "paliye." ³⁶ Ndipo eciti kwa beve, "koma lomba, uyo ali na thumb aya ndalama, lekani aitole, na thumb aya vakulya. Uyo aliye cingwanja agulise mkhanjo wake kuti akagule. ³⁷ Pakuti nulabila kwa mweo, zelembeka za neo zufunika kukwanilishika, 'ebelengewa pamozi naosakonkha lamulo.' Pakuti cenenewa pa neo zoyenela kukwanilishiwa." ³⁸ Ndipo beciti, "Ambuye, onani!, ivi vingwanja vibili." Eciti kwa beve, "Vakwana." ³⁹ Yesu eluta, mwenzocitila, kulupili ya azitona, ndipo ophunzila emukonkha. ⁴⁰ Pefwika, eciti kwabeve, "pemphelani kuti mungalobe mkuyesewa." ⁴¹ Eluta patali nabeve monga poponya mwala nogwada pansi nopemphela, ⁴² nakuti, "Atata, ngati mufuna, nchoseleni kapu iyi osati kufuna kwangu, koma kwanu kucitike." ⁴³ Ndipo mngelo emuonekela kucoka kululu, kumulimbikisha. ⁴⁴ kuba mcobaba, epemphela ngako, cibe cake cenkhala ngati mathotho ya magazi kuseluka kupona pansi. ⁴⁵ Pamene pecoka kupemphela eciza kwa ophunzila nopeza balala cifukwa ca cisoni ⁴⁶ ndipo ebakosha, "mulalilanji? Ukani nopemphela, ndaba mungalobe mkuyesewa." ⁴⁷ Penze akali kulabila, onani, gulu yewela, na Yudasi mmozi wa thwelufu, kubasogolela. Efwika pafupi na Yesu nomufyofyona. ⁴⁸ Koma Yesu eciti, "Yudasi upeleka Mwana wa Munthu na kufyofyontha?" ⁴⁹ Pamene bala enzezungulila Yesu eona cecitika, beciti, "Ambuye, tibakanthe na cingwanja?" ⁵⁰ Ndipo mmozi wa beve etema wancito mkulu wansembe, emtenda kwatu ya kwendi. ⁵¹ Yesu eciti, "kwakwanila!" Ekata kwatu yake nomcilisa. ⁵² Yesu eciti kwa akulu asembe, kwa akapitao amkacisi, na kwa akulu akulu amene ewela kulimbana na yeve, "mwawela kuzonikata ngati wacifwamba, navingwanja na nkholi? ⁵³ Pamene nenze namwe masiku onse mkacisi muluyeike manja pa neo. Koma iyi ni ola yanu na ulamulilo wa finzi." ⁵⁴ Kumufwemba, nomuleta kung'anda ya mkulu wa sembe. Koma Petulo enzonkhala patali. ⁵⁵ Pavuli poyasa mulilo pakati pa bwalo nonkhala pansi pamoi, Petulo enkhala pakati pao. ⁵⁶ Muyakine wancito mwanakazi emuona penkhala na kutuba kwa mulilo nomulangishisha nakuti, "uyu mwanalume enze naye." ⁵⁷ Koma Petulo ekana, nakuti, "mwanakazi, sinumuziba uyu." ⁵⁸ Pengopita kanthawi katontho muyakine emuona, nakuti, "ndiwe mmozi wa beve." Koma Petulo eciti, "mwanalume, nineo lini." ⁵⁹ Pepita ola imozi mwanalume muyakine eyumililapo nakuti, "zoona uyu munthu enzenaye pamozi, pakuti nimgalileya." ⁶⁰ Koma Petulo eciti, "mwanalume, nuzibalini vaulabila." Pamene apo, akalulabila, kombwe elila. ⁶¹ Ecunguluka, Ambuye kulanga Petulo, ndipo Petulo ekumbukula mau ba Ambuye, peciti kwa eve, "kombwe akaliyelile lelo unikane katatu." ⁶² Petulo efuma nakulila ngako. ⁶³ Ndipo analume enzolonda Yesu emutonza nakumucaya. ⁶⁴ Emuvwinikila nomukosha, kuti, "nenela! nibani wakucaya?" ⁶⁵ Elabila vinthu vinjinji vonamizyila Yesu, nomunyozela. ⁶⁶ Peyefwika siku, akulu-akulu ba banthu esonkhana pamozi, onse akulu asembe na alembi. nakuya naye kubwalo ⁶⁷ nakuti, "ngati niwe Kristu, tiuzye." Koma eciti kwa beve, "nikakuuzyani simukhulupilila, ⁶⁸ ndipo nikakukoshani, simuzayankha. ⁶⁹ Koma kuyambila lomba, mwana wa munthu akonkhala pa kwanja lendi ya Mphamvu ya Mulungu." ⁷⁰ Onse beciti, "niye kuti ndiwe Mwana wa Mulungu?" Yesu eciti, Mwanena mwanilili." ⁷¹ Beciti, "tikalufunilanji mboni? pakuti seo teka tazimvwela kucokela pakamwa pake."