¹ Yesu elanga mululu nakuona banthu olemela benzoika vopekela vao mosungila ndalama. ² Eona mfelekazi muyakine wosauka oikamo ndalama zibili. ³ Teto eciti, "zoona nuukujyani, mfelekazi osauka uyu waikamo zinyinji kupambana monse. ⁴ Onse bapeleka mphaso kufuma mu zinyinji zibanazo.Koma mfelekazi uyu, pa kusauka kwake, wapeleka zonse zenzonkhalila.'' ⁵ Bayakine pibenzolabila za kacisi, mwaewamyiwila na myala yokongola na vopeleka, eve eciti, ⁶ ''Pa vonse ivi vinthu vumuona, yakafwike masiku yakuti nangu mwala umozi ukasalalile pa uyake osagodobolewa.'' ⁷ Teto bemukosha eve kuti, ''naga ivi vinthu vikacitike lini? Nanga tikazibile cinji kuti vili pafupi kucitika?'' ⁸ Yesu eyankha, ''cenjelani ndaba munganamijyiwe. Pakuti anyinji akawele muzina yangu, nakuti, 'nineo,' ndipo, 'nthawi ili pafupi.' ⁹ Mukayokumvwa za nkhondo, cipolowe, musakayope, poti ivi vinthu vufunika vikacike poyambilila, koma masilijyilo sakankhala pamene apo.'' ¹⁰ Ndipo eciti kwa beve, "calo cikaukile calo ciyake, ufumu ukaukile ufumu uyake. ¹¹ Kunkhale vivomezi vikuleni, m'malo muyakine mukankhale njala na milili. kukankhale vocitika voyofya na viziwisho vikuleni kufuma kululu. ¹² Koma vikaliye citike vonse ivi vinthu, kukankhale kukuikani manja na kukuvutishani, akakuthwaleni kuma sunagoge na ku jele, kukuletani pa mamfumu na kazembecifukwa ca zina yangu. ¹³ Cikakupaseni mpata wa umboni wanu. ¹⁴ cifukwa cake musimikijye mumtima mwanu osakonzeka vakuyoyankha mozicingilijya ikaliyefwike nthawi, ¹⁵ poti neo nikakupaseni mau na nzeru zakuti nangu adani bani onse akakwanishe lini kuzikana olo kushusya. ¹⁶ Koma mukathwaliwe na makolo banu, anekwanu, abululu, na ayanu ndipo mwayakine mukapaiwe. ¹⁷ Mweo mukazondewe na aliyense cifukwa ca zina yangu. ¹⁸ Koma kuliye sisi olo imozi kwa kumutu kwanu ikaonongeke. ¹⁹ Mukupila kwanu mukankhale nao moyo wanu. ²⁰ Mukayoona Yerusalemu wa zungulukiwa na magulu ya asilikali, muzibe kuti cionongeko cake cili pafupi. ²¹ Teto lekani bala bali ku Yudeya athabile ku malupili, lekani bala bali m'mizinda afumemo, na bala bali mcalo asalobemo mumzinda. ²² Poti aya nimasiku yowejyela, kuti vonse vala vilembewa vikwanilishike. ²³ Soka kwa bala bali na vumo na bala onyonsha m'masiku ao. pakuti kukankhale kusauka kukuleni pa nthaka, namkwiyo ku banthu aba. ²⁴ Bakaponele posilijyila pa cingwanja ndipo bakatolewe kuyonkhala amjele mvyalo vonse, ndipo Yerusalemu akapondelelewe na banthu akunja mpaka nthawi ya banthu akunja ikakwanilishike. ²⁵ Kukankhale viziwisho pa zuba, pa mwezi, pa nyenyezi na pa calo ca pansi. Na vyalo vikasauke, kusila nzelu cifukwa ca congo cikuleni ca pa nyanja na cimphepo cikeleni. ²⁶ Kukankhale kumoka analume kamba ka kuyembekezela vinthu vikuza mcalo. Pakuti mphamvu zakululu zikagwendezeke. ²⁷ Ndipo bakaone mwana wa munthu akuza m'mitambo na mphamvu na ulemelelo ukuleni. ²⁸ Koma ivi vinthu vikayomba kucitika, panamani nakunyamula mitu yanu, cifukwa kuombolewa kwanu kuwela pafupi." ²⁹ Yesu ebaujya mwambi, ''onani cimuti camkuyu, na vimiti vonse. ³⁰ Ngati vayamba kushuma misambo, mukaone mweka ndipo mukazibe kuti mainza yafwika kale pafupi. ³¹ Teto, ngati mwaona ivi, vinthu vucitika, muzibe kuti umfumu wa Mulungu uli pafupi ³² Zoona nuukujyani mweo, m'mbadwe uno ukapitilile lini mpaka ivi vinthu vikacitike. ³³ Kululu na calo vikalute koma mau bangu sakaluta. ³⁴ Koma mzimvwilile pa mweo mweka, kuti mitima yanu yangabebeshewe na kumwa ngako na kukolewa na nkhaba ya moyo, ndipo sati yala siku ikakuvalileni mozizimusha monga ni msampha. ³⁵ Poti ikawelele aliyense onkhala pamenso pa calo conse ³⁶ Koma yembekezelani nthawi zonse, koma pemphelani kuti munkhale olimba kuthaba ivi vinthu vonse ivi vati vikacitike, nakopanama pamenso pa mwana wa munthu ³⁷ Teto nthawi ya mzuba enzo phunzisa mu kacisi, na usiku enzofuma nakuyonkhala penzoitiwa kuti Azitona. ³⁸ Banthu bonse benzokuza m'mamawa kuzomumnvwilila.