¹ Yefwika siku iyakene Yesu penzophunzisha banthu mu kacisi na kulalikila pabewela akulu ansembe na alembi kwa eve pamozi na akulu akulu. ² Belabila, nakuti kwa eve, "mutiuzhye mucita izi na ulamulilo otyani, olo nibani ekupasani ulamulilo uyu." ³ Ebayankha nakuti kwa beve, "nikukonsheni soti konsho, ndipo muniuzhye. ⁴ Ubatizo wa Yonehane: Wefuma kululu olo ku banthu?" ⁵ Besushana mwa beve beka, nakulabila, "nahti tilabile, 'wefuma kululu,' alabile, cifukwa ni cinji muliye mukhulupilile?' ⁶ koma ngati tilabile, wefuma ku banthu,' banthu onse atiteme myala, pakuti okpeka mtima kuti Yohane enze mneneri." ⁷ Teto beyankha kuti boziba lini kwiwefumila. ⁸ Yesu eciti kwa beve, "nane nikuuzhyeni lini kuwefumila ulamulilo unucitila ivi vinthu." ⁹ Euzhya banthu fanizo iyi, "Lidoda lelima mnda wa mpesa, nakuukongolesha kwa olima munda, nakuya kuya ku calo ciyakine kwa nthawi itali. ¹⁰ Pa nthawi yake etuma wanchito kwa olima mpesa, kuti bamupase vipaso va m'munda wa mpesa. Koma olima mpesa bemunyata, nakumtumizhya aliye kanthu m'manja. ¹¹ Etuma soti muyakine wanchito ndipo bemunyata soti, nakumcitisha nsoni, nakumtumizhya aliye kanthu m'manja. ¹² Etuma soti wacitatu ndipo bemulasa, nakumutaya panja. ¹³ Teto ambuye ba munda wa mpesa eciti, 'nicite cinji? nitume mwana wangu wokondeka. Payakine bakamupase ulemu.' ¹⁴ "Koma olima munda pibemuona, belabizhyana beke beka, kuti, 'uyu niye wati akatole vonse. Teyeni timupaye, kuti cuma conse cosalila cikabe casu.' ¹⁵ Bemutaya panja pa munda wa mpesa nakumupaya. Nicinji cati akacite Ambuye ba munda kwa beve? ¹⁶ Akawele nakuononga olima munda, ndipo akapase munda wa mpesa kwa ayakine."Pibecimvwa izi, beciti, "zisakabe teto!" ¹⁷ Koma Yesu ebalanga, nakuti, "cutanthauza cinji cala cilembewa: 'mwala wekaniwa na omanga ng'anda wenkhala wofunikila'? ¹⁸ Aliyense wati akaponele pa mwala wala akaphwanyike, ndipo wala wati ukamuponele akatekenyeke." ¹⁹ Teto alembi na kulu ansembe befuna-funa kumukata na manja mu nthawi yamene iyo, poti beziba kuti walabila mwambi uyu pa beve. Koma benzooyopa banthu. ²⁰ Kumulangilila bwino-bwino, betumizhya awenye, bezioneshela monga ni olungama, kuti bamupeze cifukwa mu mau bake, koteto kuti bakamupeleke ku lamulo na ulamulilo wa kazembe. ²¹ Bemukonsha, nakuti, "mphunzisi, seo tuziba kuti mweo mulabila nophunzisa moona, ndipo muona lini pa menso pa munthu kapena mpando walinao, koma muphunzisa coona ca njila ya Mulungu. ²² Nicololewa kupeleka seo kupeleka msonkho kwa Kaisara olo yai?" ²³ Koma Yesu eziba kunjela kwao, nakuti kwa beve, ²⁴ "Nilangizhyeni ndalama. Ni nkhope na zina ya bani ilipo?" beyankha, "Kaisala." ²⁵ Eciti kwa beve, "Teto pelekani kwa Kaisala vinthu vake va Kaisala, ndipo Kwa Mulungu vinthu vake va Mulungu." ²⁶ Baliye mpeze cifukwa pa vecilabila pa menso pa banthu, Koma kudabwa na kuyankha kwake, benkhala cete. ²⁷ Pibewela asaduki ayakine kwa eve, bala benzokamba kuti kuliye kuuka ku imfwa, ²⁸ bemukonsha, nakuti, "mphunzisi, Mose etilembela kuti ngati mnekwanu wafwa, ali na mwanakazi, ndipo aliye mwana, mnekwao ofunika kutola mwanakazi, nakunkhala na mwana wa mnekwao. ²⁹ Kwenze Madoda seveni pokwao ndipo oyamba ekwatila mwanakazi, na kufwa aliye mwana, ³⁰ na wacibili cimozi-mozi. ³¹ Wacitatu emutola, comozi-mozi wa seveni naye aliye siye mwana, na kufwa. ³² Posilizhyila mwanakazi soti ecifwa. ³³ Teto mkuuka, akankhale mwanakazi wa bani? poti bali seveni bemukwatila eve." ³⁴ Bana aziko ya pa calo cino okwatila na kupelekewa mucikwati. ³⁵ Koma bala oyesewa oyenela kufwikila calo cila kulandila kuukishiwa kwa akufwa bakakwalitile lini olo kupelekewa mcikwati. ³⁶ Pakuti sibakafwa soti nthawi zonse, poti olingana na angelo nipo nibana ba Mulungu, Ponkhala bana ba kuukishiwa. ³⁷ Koma kuti akufwa akaukishiwe, olo Mose elangizhyiwa, pa malo ya pa sanga, pemuitila Ambuye Mulungu wa Abrahamu na Mulungu wa Isaki Namulungu wa Yakobo. ³⁸ Lomba ni Mulungu lini wa akufwa, koma wa amoyo, ndaba onse onkhala moyo kwa eve." ³⁹ Alembi bayakine beyankha, "Mphunzisi, mwayankha bwino," ⁴⁰ Pakuti baliye fune kumkonsha soti makonsho. ⁴¹ Yesu ecit kwa beve, "Bokamba tyani kuti Kristu ni mwana wa Davite? ⁴² Pakuti Davite eve eka eciti mbuku ya Masalimo, Ambuye eciti kwa Ambuye bangu, 'nkhala pa kwanja langu la kwendi, ⁴³ mpaka nipange adani bako coikapo mendo bako.' ⁴⁴ Davite koteto oyita Kristu ''Ambuye,' teto nimwana wa Davite tyani?" ⁴⁵ Mkumvwilila kwa banthu eciti kwa ophunzila bake, ⁴⁶ "nkhalani nao chelu alembi, ofuna-funa kuyenda abvwala minjilo na kukonda kupasiwa moni wa bwino m'misika na mipando ya ufumu msunagoge na malo ya ufumu pa ma dyelero. ⁴⁷ Boononga soti ma ng'anda ya amasiye, molangizhya ocita mapemphelo atali. Madoda monnga aba akalandile kulangiwa kukuleni."