¹ Mwai ici nkhalani otola cisanzo ca Mulungu, monga bana ba okondewa. ² Ndipo yendani mu cikondi, monga soti mwamene Kristu etikondeera na kuzipeeka eke kwa seo, nsembe yonunkhira bwino na copeleka kwa Mulungu. ³ Ndipo pasankhale soti maganizo pakati pa mweo za mankhalilo acigololo, pakuti ivi nivabwino lini ku banthu atuba ba Mulungu. ⁴ Pasankhale soti conyansa, nakulabila kopusa, kapena kuseka kwa tyala-tyala -na vonse vabwino lini m'malo mwake pabe ciyamiko. ⁵ Pakuti muziba ndipo musimikizhya ici, kuti bacigololo, baipa, olo munthu wacigolo-aba ni, opembeza mafano-aba baliye coloba mu ufumu wa Kristu na Mulungu. ⁶ Osalola munthu akunyengezheni na mau atyala-tyala, pakuti kamba ka vinthu ivi, ukalli wa Mulungu uwela pa bana akumvwa lini. ⁷ Mwa ici, musankhale nao pamozi. ⁸ Pakuti kale mwenze mumfinzi, koma lomba nimwe kutuba kwa Mulungu. Yendani monga bana akutuba. ⁹ (Pakuti cipaso ca kutuba ni kuwama, cillungamo na cacendi), ¹⁰ Na kuphunzila camene cukondweresha Mulungu. ¹¹ Osankhala pamozi na nchito zamfinzizutwala lini vipaso, koma musushane nazo. ¹² Pakuti nicansoni olo kuchula tyala vinthu vakucita mumfinzi. ¹³ Koma pamene vonse vawela patuba, vuonekela. ¹⁴ Pakuti ciliconse caonekela cunkhala kutuba, mwa ici akuti, "uka, weo ulala, uka kwa akufwa, ndipo Kristu atube mwa weo." ¹⁵ Langishishani mosamalira mwamuyendela-osati monga baliye nzeru koma banzeru. ¹⁶ Gwirishani bwino nthawi pakuti masiku naipa. ¹⁷ Mwa ici, osamkhala opusa, koma cifunilo ca Ambuye. ¹⁸ Ndipo musakolwe na vinyo, Pakuti ici citisha kuzilekelera. M'malomwake, zulani na mzimu utuba, ¹⁹ kulabizhyana mumasalimo na mnyimboza uzimu, kuimba za malimba na Ambuye na mtima wanu wonse. ²⁰ Nthawi yonse pelekani mayamiko pa vonse, mzina la Ambuye wasu Yesu Kristu kwa Mulungu Atata. ²¹ Namvwirana umozi na muyake mkuyopa Kristu. ²² Mweo anakazi gonjerani azilume banu, monga mgonjela Ambuye. ²³ Pakuti mwanalume ndiye mutu wa mwanakazi na monga Kristu ni mutu soti wa Mpingo, eve mwine monga mpulumusi wa mubili. ²⁴ Koma monga mpingo ugonjera kwa Kristum moteto soti ankazi kwa azilume bao mvonse. ²⁵ Analume kondani anakazi banu, monga Kristu ekondera mpingo nakuzipeleka yeka kwa weve. ²⁶ Koteto kuti akamtubishe, apo ndiye wamsuka mwa kusuka kwa mnzi na mau. ²⁷ Koteto kuti akampeleke mpingo kwa eve monga wa ulemelero, uliye dontho olo nkhwinya olo ciyakine coteti, koma utuba na uliye cilema. ²⁸ Mnjira yamene iyo analume akonde akaki bao, monga mibili yao. Wamene okonda mkazi wake wa eve eka ozikonda eka. ²⁹ Pakuti kuliye mutnhu ozonda mubili wake eka, koma ousamalila na kuusunga bwino, monga Kristu osamalila mpingo na kuusunga bwino, ³⁰ Pakuti nise vibalo mumubili wake. ³¹ "Pacifukwa ici mwanalume akasiye anyina na awisi na kulumikizhyana na mulume wake, ndipo aba abili akabe mubili umozi." ³² Cisinsi ici cobisika nicikulu-koma nilabila za Kristu na mpingo. ³³ Olo nteto aliyense wa mweo akonde mkazi wake monga ozikona eka ndipo mwanakazi alemekeze mulume wake.