¹ Mwanamwe, mwvwilani okuvyalani mwa Ambuye, ici nicabwino. ² "Lemekeza auso na anyoko" (yamene ili lamulo yoyamba ili na lonjezo). ³ "Kuti zikunkhalileni bwino na kuti unkhale na moyo utali pa calo. ⁴ Atata musakalipishe bana banu. Koma mubakulishe nakubalangizhya mwa Ambuye. ⁵ Akapolo, mvwilani amene ali Ambuye banu mwa kumubili na kubapasa ulemu ukulu na kuyopa, muona kwa mtima wanu. ⁶ Mubamvwire beve mwamungamvwililire Kristu. Munkhale omvwila osati peka-peka ngati alipo, kuti mubakondweleshe. M'malo mwake, munkhale omvwira monga akapolo ba Kristu, ocita cifunilo ca Mulungu kufumila mu mtima. ⁷ Tumikilani na mtima wanu wonse monga kuti mutumikira Ambuye osati banthu, ⁸ ndaba tuziba kuti nchito yabwino yakucita munthu, akalandile mphoto kwa Ambuye, olo abe kapolo olo mfulu. ⁹ Ambuye, mubacitire akapolo banu cimozi-mozi. osabayofya. Poziba kuti Ambuye wao na wanu ali mululu, ndipo muliye sankho mwa eve. ¹⁰ Cosilizhila, nkhalani okosa mwa Ambuye, na kukosa kwa mphamvu yake. ¹¹ Vwalani vida vonse va Mulungu, koteto kuti mukwanishe kupanama mosusha kunjela kwa mdyelekezi. ¹² Pakuti kulimba kwasu tulimbana lini na mubili namagazi, koma maukulu na maulamuliro, nosusha mphamvu zili mu mfizi ino, nosusha soti na mphamvu za mizimu ili mu malo ya kululu. ¹³ Mwa ici vwalani vida vonse va Mulugu, koteto kuti musakwanishe kupambana mu masiku aipa, ndipo mukacita vonse, mupaname nji. ¹⁴ Teto panamani nji na bande ya caccendi mu luunda mwanu, apo soti mwavwala capacifuwa ca cilungamo, ¹⁵ na mendo yanu yovwala kukonzeka kufumila ku uthenga wabwino wa mtendele. ¹⁶ Mu vonse vingacitike tolani cishango ca cikhulupililo cati cikuyavyeni kuzimya mivwi yonse yyaka ya muipa uyo. ¹⁷ Ndipo tolani cisoti ca cipullumuso na cingwanja ca mzimu, aba ni mau ba Mulungu. ¹⁸ Mwa pemphero yonse na vosenga, pempherani nthawi zonse mwa mzimu kufwika pano, nkholanganinna kupilila konse pamupemphelera banthu bonse batuba ba Mulungu. ¹⁹ Na neo munipemphelere kuti uthenga upasiwe kwa neo nikavula pakamwa pangu. Nipemphelereni kuti nikazibishe molimbika zobisika zachendi zili mu uthenga wabwino. ²⁰ Ni kamba ka uthenga wabwino kuti nine kazembe osungiwa mu unyolo, koteto kuti nikaulabile molimbika, mwanufunikila kulabira. ²¹ Tumiko, mnekwasu wokondewa na mtumiki wokhulupilika mwa Ambuye, akuuzhyeni vonse, koteto kuti muzibe kuti nili tyani. ²² Namtumizhya kwa mweo pa cilingo camene ici, kuti muzibe kuti tili tyani, nakuti alimbikishe mitima yanu. ²³ Mtendele ube na azinekwasu, na cikondi pamozi na cikhulupililo vufumila kwa Mulungu Atata na Ambuye Yesu Kristu. Cisomo cibe na bala bonse okonda Ambuyewasu ²⁴ Yesu Kristu na cikondi cosaonongeka.