¹ Lomba muchalici ku Antiokeyo, mwenze aneneli na aziphunzisi. benze Banabasi, Simiyoni (oitiwa kuti niga), Lusiyasi waku Kulene, manayeni elelewa pamo na Helode muthu wa mphamvu na saulo, ² Pabenzo pembeza ambuya nakusala kulya, mzimu utuba echiti, ''Nipatulileni Banabasi na Saulo,kuti achita nchito inebaitila, ³ Pebesala kulya, bepemphela, noika manja bawo pa aba madoda, beba tumizya. ⁴ Lomba banabasi na paulo,petumiwa na mzimu utuba, besondokela ku Seleusia; kuchoka uko beyenda wapanyanja kuya ku kupro. ⁵ Pebenzo m'munzi wa salamisi; belalikila mau a Mulungu mumasinagoge ya ayunda.benza soti na Yohane monga mthandizi. ⁶ Pebepita pa chisumbu kuya ku pafosi bepeza munthu muyakene wa masenga m'neneli wawenye wa ayunda zinalaka bar-Yesu. ⁷ Uyu wa masenga egwilizana na Pulokonso, Sejiyusi Paulasi, enze lidoda ochenjela ngako. ili lidoda leita Banabasi na Saulo, ndaba enzofunishisha kumvwa mau a Mulungu. ⁸ Koma Elimasi '''wa masenga'' (ndiye tanthauzo la zina lake) ebashusha, efunishisha kuchosa Pulokonso m'chikulupililo. ⁹ Koma Saulo oitiwa soti Paulo, wozula na mzimu utuba, emulangishisha. Nakuti, ''weo mwana wa satana vekaveka viipa na wenye vilifulu mwa weo. ¹⁰ Niwe ndani wa chilichonse cholungama. uleke lini kukhwenthesha njila ya Ambuye, ili laba-laba sibati? ¹¹ Lomba ona, kwanja la Mulungu lili pali weo, nakuti usanduke mphofu. ulione lini zuba kwa kanthawi. ''pamene apo Elimasi ekatiwa na mfinzi; Eyamba kuzunguluka kufuna banthu kuti amkateko kwanja nomusogolela. ¹² Prokonso peona vechitika, ekhulupilila ndaba edadwangako na chiphunziso cakamba za Ambuye. ¹³ Lomba Paulo na ayake betaukila ku pega mu pamfiliya kuchokela ku pafosi. koma Yohane ebasiya nowelela ku yelusalemu. ¹⁴ Paulo na ayake beyenda kuchoka ku Penga nowela ku Antyokeya wa ku Pisidia. kwamene uko beloba musinagoge pasiku la chibelu no nkhala pansi. ¹⁵ Pechibelengewa chilamulo na aneneli, asogoleli a sinagoge ebatumila mau, kuti, anekwasu, ngati muliko na mau alionse achilimbikiso ku banthu muno, kambani.'' ¹⁶ Teeto Paulo epanama no cheula nakwanja; echiti '' madoda amuislayeli na mweo mulemekeza Mulungu, mvwani. ¹⁷ Mulungu wa aba banthu aislayeli esankha khololasu nolipashila mtundu pebenze kuchalo cha Igiputa, na kwanja yake yonyamuka ebasogolela kufumamo. ¹⁸ Kwazaka zokwanila monga fote eyenda nao musanga. ¹⁹ Pavuli pocheneka mitundu seveni m'chala cha Kenani, epasa banthu basu chalo chao kuti chinkhale choloba chao. ²⁰ Izi zonse zechitika mu zaka zopitilila 450. pavuli pake pa izi zonse, Mululngu ebapasa oweluza mpaka pa Samueli m'neneli. ²¹ Lomba banthu esenga kuti apasiwe nkhosi. na Mulungu ebapa Sauli mwana wa Kisi, lidoda la mumkoka wa Benjamini, kuti abe nkhosi kwa zaka fote. ²² Pavuli pochosewa na Mulungu pa ufumu, enyamula Davite kuti abe nkhosi yao. yenze nkhani ya Davite yechitila umboni Mulungu kuti, napeza Davite mwana wa Jese kuti abe lidado la pamtima pangu,ochita vonse vunumuuzya kuti achite. ²³ Kufumila mumkoka wa lidoda ili Mulungu waleta kwa islayeli mphulumusi, yesu, monga mwelonjezela. ²⁴ Akaliyofwika ubatizo wakulapa ku banthu onse ba islayeli. ²⁵ Penzosilizya nchito yake Yohane echiti '' muganize kuti nine bani? Nine lini wamene. Koma mvwani umozi akuza pavuli pangu, nthambo za nkhwabila zake neo nineosayenela kuzimasula. ²⁶ Anekwasu, bana ba mkoka wa Abrahamu, na bala onse pakati panu olemekeza Mulungu, nikwasu seo kwewetumiwa uyu uthenga wachipulumuso. ²⁷ Pakuti bala onkhala mu yelusalemu na obalamulila aliyomuzindikile eve ndipo ba kwanilisha mau ba aneneli obelengewa chibelu chili chonse omusula. ²⁸ Olo aliyopeze chifukwa chomuweluzila kuti afwe. beita Pilato kuti azemupaye eve. ²⁹ pebesilizya vinthu vonse velembewa vokhuzanana eve, bemuselusha pachimuti nomuika m'manda. ³⁰ Koma Mulungu emuusha kwa akufwa. ³¹ Eonekela kwa masiku anyinji kwabala enzoyenda naye kuchoka ku Galileya kuya ku yelusalemu; Aba banthu lomba ndiye mboni zake ku banthu onse. ³² Teti tukuuzyani nkhani yabwino, lonjezo lewela kumakolo basu. ³³ Watikwanilisha seo, bana bao, mwakuusha Yesu. Muchelemekela musalimo lachibili. Niwe mwana wangu mwanalume, lelo nakhala uso; Kuti ³⁴ emuusha kwa akufwa, kuliye kuwelela soti, Mulungu wakamba teti '' Nikupaseni daliso lapatuba losimikizya lelonjezewa kwa Davite. ³⁵ N'chifukwa chake ekamba soti mu Salimo liyakene, ' mukalole lini kuti m'tuba wanu akaole; ³⁶ Pakuti Davite pe tumikila zofuna za Mulungu mu mum'koka wake, elala tulo; ekiwa pamo na makolo bake ndipo mubili wake weola. ³⁷ Koma ula eushiwa na Mulungu mubili wake uliye ole. ³⁸ Ndiye lekani chizibike ichi kwa mweo, anekwasu kuti kupitila mwa lidoda ili chikululuko cha machimo chalalikiwa kwa mweo. ³⁹ Mwayeve aliyense okhulupilila omasuka kuvinthu vonse vamene lamulo la Mose lenzokwanisha lini kukumasulani. ⁴⁰ Lomba ndiye musamale kuti chinthu cheenena aneneli chisachitikile weo. '' ⁴¹ Onani, mweo amisulo, ndipo mudabwisiwe naku chenekeka, pakuti nuleta nchito m'masiku banu, nchito yoti mukakhulupilile lini, olo kuti muyakene ai uluse kwa weo. ⁴² Pechokapo Paulo na Banabasi; banthu ebasenga kuti angakambeko soti nkhani imozi-imozi iyi chibelu chokokhapo. ⁴³ Pewesila msonkhano wa m'sinagoge, ayuda anyinji na bala esandulika bekonkha Paulo na Banabasi elabila nao noba limbikisha kuti apitilizye muchisomo cha Mulungu. ⁴⁴ Pa chibelu chokonkhapo, pafupi- fupi munzi wonse weungana pamozi kuti bamvwe mau a Mulungu. ⁴⁵ Ayuda peeona gulu, echimvwa nsanje noyamba kamba viipa pavinthu vekamba Paulo nomunyoza. ⁴⁶ Koma Paulo na Banabasi ekamba mosayopa nakuti '' chenze chofunikila kuti mau a Mulungu eyambilila kuuzyiwa kwa mweo, lomba taona kuti mubakana noziyesa mweka osayenela moyo wosasila, Onani tipiliukile kwa amitundu. ⁴⁷ Pakuti Ambuye atilamulila teto, kuti '' nakusankhani mweo kuti mubenyale ya amitundu, kuti mulete chipulumuso kumasilizyilo a chalo cha pansi. ⁴⁸ Amitundu pechimvwa teti enze asekelela na lemekeza mau a mulungu. monga anyinji eithiwa ku moyo wosalila bekhulupila. ⁴⁹ Mau a Mulungu emwazyiwa m'malo onse. ⁵⁰ Koma Ayuda etuntha manina ozama olemekezeka na madoda osogola a m'munzi. beusha chisausho kwa Paulo na Banabasi nobataya kubachosa m'malobawo. ⁵¹ Koma Paulo na Banabasi bekunkhumula kakungu kumendo kwao. ndipo beluta munzi wa Ikoniya. ⁵² Ndipo ophunzila be zula na chimwemwe na mzimu utuba.