¹ Lomba pa nthawi iyi Herode mfumu ekata bayakine enze amozi ba mpingo kuti ayambe kubavutisha. ² Epaya Jamusi mukwao wa Yohane na lupanga. ³ Peona kuti ici cakondwelesa Ayuda, ekata soti na Petro. iyi yenze nthawi ya buledi uliye cotupisha. ⁴ Pavuli pomukata, emuyika mu ndende, nakumuika mu manja mwa asilikali benze mu ma gulu folo enzokumolonda; enzofuna kumuleta ku banthu ikapita Pasika. ⁵ Teto Petro esungiwa mu ndende, koma mapemphelo yecitika kwa Mulungu na amumpingo. ⁶ Usiku pamene Herode akaliye umufumwa kuti amuimbe mulandu Petro enzelele pakati pa asilikali abili, omangiwa na vingwe vibili, apo ndipo amalonda enze paciseko caposogolo olonda ndende. ⁷ Mungelo mwazizi ewela pa yeve, ndipo nyale yeyaka mu ndende. ekhodola Petro kumbali nakumuusha nakuti, "Uka mwamsanga," Ndipo vingwe vepona kucoka ku manja yake. Mungelo eciti kwa yeve, ⁸ "Vwala vovwala nama sanda yako." Petro ecita teto. Mungelo eciti kwa yeve, "Vwala malaya yakunja ndipo unikonkhe." ⁹ Petro emukonkha mungelo nocoka panja. Aliyezibe kuti cecita mungelo cenze cacendi. Eganiza kuti enzoona mesomphenya. ¹⁰ Pavuli popita pali malonda oyamba na wa cibili, bewela pa khomo ya nsimbi yenzo lumjika ku muzinda; yeba segukila yeka. Befuma ndipo beyamba kuyenda munjila, ndipo pamene apo mungelo eluta nomusiya. ¹¹ Petro peyewelelamo maganizo, eciti, "Lomba zoona naziba kuti Mulungu watumijya mungelo wake ndipo wanipulumusha kufuma mu manja ya Herode, nakuvonse vebenzoyembekezela Ayuda." ¹² Pezindikila teti, eluta ku ng'anda kwa Mariya nyinawake wa Yohane ozibika soti kuti Maki, kwebenze kumana banthu anyinji ndipo benzopemphela. ¹³ Pegogoda pa khomo, kabuthu wanchito wacanakazi zina lake Roda ewela kuti azaseguleko. ¹⁴ Pezindikila lizu la Petro, kamba ka cisangalalalo ekangiwa kusegulako kuciseko, eutukila mkati ya cipinda; nakubaujya kuti Petro enzepeneme pakhomo. ¹⁵ Ndipo beciti kwa yeve, "Ndiwe wa videde." Koma elimbikila kuti zili teti. beciti, "Nimungelo wake." ¹⁶ Koma Petro epitilijya kugogoda, ndipo pesegulako kuciseko, bemuona ndipo bedabwa ngako. ¹⁷ Petro ebakhodola na kwanja kuti bankhale cete, ndipo ebafotokozela Mulungu mwemucosela mundende. Eciti, "Mumuujye Jamusi na anekwasu". ndipo ecoka pa malo pala noluta ku malo bayake. ¹⁸ Lomba pekwecica, kwenzelini zovuta zitontho pakati pa asilikali pa zecitika kwa Petro. ¹⁹ Herode pemusakila koma osamupeza, ebakosha amalonda ndipo elamula kuti banyongewe. Teto efuma mu Yudeya nakuya ku Sizaleya nonkhala kwamene kula. ²⁰ Lomba Herode enzookalipa ngako na banthu baku Tyre na Sidon. Beluta kwa yeve na colinga cimozi ndipo pavuli pomunyengelela Blastus, wothandizila mfumu, kuti abathandize, bepempha mtendele ndaba ziko lao lenzolandila vakulya kufuma ku ziko la mfumu. ²¹ Pa siku loikika Herode evwala vovwala va cimfumu nonkhala mumpando wacimfumu, elabili mau kwa beve. ²² Banthu bekuwa, "Iyi ni lizu la mulungu osati la munthu!" ²³ Pameneapo mungelo wa Mulungu wemukantha, ndaba aliye peleke ulemelelo kwa Mulungu; elyewa na vikusi nakufwa. ²⁴ Koma mau ya Mulungu yepaka nakufalikila. ²⁵ Lomba Banaba na Saulo pesilijya utumiki, bewelela kufuma ku Yerusalemu ndipo bewela pamozi na Yohane, otiwa soti kuti Maki.