¹ Nifunika kuzikweza, olo kuti ciliye phindu. Koma nipitilizhye kukamba za mensomphenya na kuulula zocokela kwa Ambuye. ² Nuziba mwa Kristu muyakine wamene zaka 14 zepita wamene-kaya mumubili olo kunja kwa mubili, nuziba lini, Mulungu oziba-etolewa kuya kululu kwa Kristu. ³ Ndipo nuziba kuti uyu munthu-kaya nimumubili, olo kunja kwa mubili, muziba lini, Mulungu oziba- ⁴ etolewa kuya ku Paladiso ndipo ecimvwa zosakambika zakuti munthu angazilabile lini. ⁵ Mmalo mwa munthu oteti nizikweze, koma mmalo mwa neo neka nizikweze lini, kucoselako za kufoka kwangu. ⁶ Ngati nufunika kusankha kuzikweza, ninkhalelini opusa, cifukwa nukokamba zacendi. Koma nileke kuzikweza, teto kuti pasapezeke aliyense oniganizila zinyinji kupambana zoona kapena zokumvwa kwa neo. ⁷ Koma kuti anileshe kuzikweza neka cifukwa ca vikulu-vikulu veniululila, monga mu mubili wepasiwa kwa neo, mngelo wa satana kuzovutisha neo- kuti nisakazikweze mwa neo neka. ⁸ Nesenga katatu kwa Ambuye pa ici, kuti eve acicose kwa neo. ⁹ Koma eniuzhya kuti, "cisomo cangu nicokwanila pa weo, pakuti mphamvu zuonekela mukubeba." Ndipo ningazikweze ngako tyala kamba ka kufoka kwangu, kuti mwina mphamvu za Kristu zikankhale na neo. ¹⁰ Lomba nunkhala okondwela mwa Kristu mu zofoka, mu manyozo, zobaba, mu manzunzo namu nthawi yodesa nkhawa. Pakuti paliponse nili ofoka, pamene nine okosa. ¹¹ Nankhala opusa! mwenikakamizhya kwa ici, pakuti nufunika kuti mweo muniyamikile. Pakuti nenzelini ocepa kwa banthu bala oitiwa kuti atimiki apalulu, olo kuti nine lini kanthu. ¹² Zizindikilo za cendi ca mtumiki zecitika pakati pa mweo na cipililo conse, zizindikilo za mphamvu na zodabwisha. ¹³ Pakuti kuli cinji cenekucefyeshani naco na ma calici yosala ayakine, kucoselako neo kuti niliye kuvutisheni? Nikhululukileni pa ciipa ici! ¹⁴ Langani! Nakonzekla kuti niwele kwa mweo mu nthawi yacitatu. Nikuvutisheni lini, Pakuti nusakila lini zamulinazo. Nkufuna mweo. Pakuti bana ofunikila lini kuunjikila makolo. Mmalo mwake, ,akolo ofunikila kuunjikila bana. ¹⁵ Nikankhale okondwela ngako kutaya zangu zonse nakutaya moyo wangu kamba ka mweo. Ngati nukukondani ngako, nufunika kukondewa patontho? ¹⁶ Koma mwazilili, niliye kuvutisheni. Koma cifukwa cakuti nine ocenjela, nineo nekukatani naukacenjede. ¹⁷ Ko nekucenjelelani mwa aliyense wenetumizhya kwa mweo? ¹⁸ Nemusenga Tito kuti abekuya kwa mweo, ndipo netimizhya mukwasu muyakine pamozi na eve. Ko Tito ekucenjelelani? Ko niyeve lini na neo tenzocitila zonse mumzimu umozi? Ko tiliyoyende munjila imozi? ¹⁹ Ko muganiza kuti nthawi yonse iyi tankhala tuzitetezhya seka kwa mweo? Tikankhala pamenso pa Mulungu, wokondewa bangu tankhala mwa Kristu kulabila ciliconse kuti tikukosesheni mtima. ²⁰ Pakuti nuyopa kuti nikayokuza kwanu mwina kukupezani osasiyana na munufunila. Nuyopa kuti pangankhale mkangano, nsanje, ukali ukulu ngako, mpikisano, nkhani za wenye, kusheba, kuzimvwa ofunikila ngako na nkhalidwe yamsokonezo. ²¹ Nuyopa kuti nikayowela soti kwanu, Mulungu wangu mwina anganicefyeshe pamenso pa mweo. Nuyopa kuti mwina banthu bayakine ocimwa lomb aanganililile ndipo baliye lape zonyanyisa zao na dama na mayendedwe bao aipa becicita.