¹ Nufuna kuti munilekelele pa kupusa kwangu kuyake. Koma cendi mwenilekelela kale! ² Pakuti nukucitilani nsanje. Nili na nsanje ya mulunga kwa mweo, cifukwa nekulonjezani mucikwati ku mwanalume umozi. Nekulonjezani kukuoneshani kwa Kristu monga ndola yene yene. ³ Koma nuyopa kuti payakine, monga njoka yenyengezhya Hava na kucenjela kwake, maganizo banu angakutaikisheni pacikondi ca cendi nakuzipeleka kwa cendi kwa Kristu. ⁴ Pakuti kuti munthu muyakine wawela nakukuzibishani Yesu muyakine osati wetelalikila. Olo ngati mwalandila mzimu osiyana na wala wamene wetelalikila. Olo ngati mwalandila uthenga osiyana na wala umwelandila kale. Mulola ivi vinthu bwino bwino! ⁵ Nuganiza kuti nili lini munyansi kwa bala oitiwa kuti atumiki apalulu. ⁶ Koma olo kuti nine lini ophunzisiwa mumalabilidwe, nine lini osaphunzisiwa munzelu. Mnjila zonse na muvinthu vonse tecizibisha ici kwa mweo. ⁷ Ndiye kuti necimwa pozicepesa neo kuti mweo mukwezewe? Pakuti nulalikila uthenga wabwino watyala kwa mweo. ⁸ Nebalonda macalici bayakine mwakuvomekezhya thandizo yocokela kwa beve koteto kuti nikatumikile mweo. ⁹ Penenze na mweo nenze nesoba cinthu, niliye vute aliyense. Pakuti zosoba zangu zekwanilishiwa na anekwasu ecokela ku Makedoniya. Mu vinthu vili vonse nankhala ozilesha kunkhala vito kwa mweo, ndipo nipitilizhye kucita teto. ¹⁰ Cifukwa cakuti cilungamo ca Kristu cili mwa neo, uku kuzikuzhya kwangu kusile lini kumbali ya mzinda wa Akaya. ¹¹ Cifukwa? Kamba kakuti nukukondani lini? Mulungu ndiye oziba. ¹² Ndipo canucita nicipitilizhye kucita, kuti nisabapase mpata awenye ofuna mpata wakuti azimvwe, nakulabila kuti nao agwila ncito kulingana naseo. ¹³ Pakuti banthu oteti niatumuku bawenye ndipo bancito yotaishika. Bezibisa mwabeve beka monga atumiki a Kristu. ¹⁴ Ndipo ici nicosadabwisha, pakuti olo satana ozibisa kuti ni mngelo owala. ¹⁵ Nicosadabwisha cikulu ngati ancito bake ozibisa monga bancito acilungamo. Cilango cao cikalingane na zincito zao. ¹⁶ Nulabila soti: Lekani aliyense asaganize kuti nine opusa. Koma ngati muganiza teto, nilandileni monga opusa kuti nane nizikweze patontho. ¹⁷ Zanulabila izi na cilimbikisho cozikwezhya-nulabila lini mwangalabilile Mulungu-nulabila monga aliye nzelu. ¹⁸ Cifukwa cakuti banthu anyinji ozikweza monga mwa mubili, nane soti nizikweze. ¹⁹ Pakuti mubalekelela opusa mokondwela. Nimwe banzelu mweo mweka. ²⁰ Pakuti mumulekelela munthu ngati okupangani akapolo, okulya cuma canu, opeza mwai palulu pa mweo, ngati ozikuzhya, olo ngati wakunyatani kumenso. ²¹ Nuvomelezhya nawe nsoni kuti tenze lini okosa mtima kuchita izi. Lomba ngati aliyense azikweze-nulabila monga opusa-naneo nizikweze. ²² Ndiye kuti ni a Hebeli? Na neo. Ndiye kuti ni a Isilayeli, Na neo. Ndiye kuti niba banja ya Abulahamu? Naneo soti. ²³ Ndiye kuti ni ancito a kristu? (nulabila monga osokonezeka.) Ndine wancito opambana beve: Muncito yokosa, muma jele anyinji, mukunyatiya kopitilila muyeso, mukukumana na zovuta pafupi fupi na kufwa. ²⁴ Kwa Ayuda nelandila faifi za "nthimbo fote nocosapo imozi." ²⁵ Katatu nenyatiwa na nkholi. Payakine nenzetemewa. Boti yeniphwanyikila katatu. Nenkhala pa manzi usiku na mzuba. ²⁶ Nenkhala mu maulendo kabili-kabili, zoyofya mu zocokela mumikolo, zoyofya muzigabenga, zoyofya kucoka kubanthu bangu, zoyofya mu amitundu, zoyofya mu mzinda, zoyofya mcipululu, zoyofya mnyanja, mu zoyofya kwa anekwasu awenye. ²⁷ Nagwila ncito zobebesha, kabili kabili nenzolala lini tulo, necimvwa njala na njota, kuzitana kulya, mukuzizila na kusoba vovwala. ²⁸ Kucosako ciliconse ciyake, siku na siku nunkhala na zovuta pa udindo pa ma calichi onse. ²⁹ Nibani ofoka, ndipo neo nililini ofoka? Nibani muyakine wamucimwisha, ndipo neo osavutika mumtima? ³⁰ Ngati nufunika kuzikweza, nizikweze pa zala zuonesha kufoka kwangu. ³¹ Mulungu na Awisi a Ambuye Yesu wamene edalisiwa kwa muyaya, oziba kuti nunama lini! ³² Ku Damasiko. Mkulu opanamila mfumu Areta enzolonda mzinda wa Damasiko kuti animange. ³³ Koma eniika mudengo nonifumyila pa windo mu cipupa, ndipo nethabamo mmanja mwake.