¹ Cosilijyila, anekwasu, tukusengani nakukudandaulilani mwa Ambuye Yesu . Pamulandila malangizo kwa seo mwamufunikila kuyendela nakukondwelesha Mulungu, na munjila iyi yendani, kuti mukacite moposa apa. ² Pakuti muziba malangizo betekupasani mwa Ambuye Yesu. ³ Ndaba ici niyecifunilo ca Mulungu, kutubishiwa kwanu, mupewe ciwelewele. ⁴ Ndaba aliyense wa mwaeo oziba kusunga ciya cake mkutuba na ulemu, ⁵ Osoti kufunishisha vokhumbwila-khumbwila monga akunja osaziba Mulungu. ⁶ Munthu aliyense asalakwile na kunyenga mnekwao pa ici. Pakuti Mulungu niye owejyela mu vinthu ivi, monga mwetekucenjyelantoni nakucitila umboni. ⁷ Pakuti Mulungu aliyetiyite kukufipa, koma kukutuba. ⁸ Mwa ici, okana ici okana lini banthu, koma Mulungu, wamene opasa Mzimu Utaba kwa mweo. ⁹ Kunena pa cikondi capa unakwanu, mufunika lini na munthu kukulembelani, ndaba mweo muphunzisiwa na Mulungu kukondana m'mozi na muyake. ¹⁰ Inde mucita ici kwa azinekwanu onse ali mu Makedoniya. Koma tukudandaulillani anekwasu, kuti mucite kuposa apa. ¹¹ Tukudandaulilani soti kuti mufune kunkhala bacete, nakucita nchito zanu, nakugwila nchito na manja, monga mwete mujyilani. ¹² Kuti mukayende bwino pameso ya akunja na kusasoba kanthu. ¹³ Koma sutufuna kuti munkhale osaziba anekwasu zabala olala tulo, kuti musalile ngati onse bala baliye ciyembekezo. ¹⁴ Cifukwa ngati tukhulupilila kuti Yesu ecifwa nakuuka soti, moteto, Mulungu akalete pamozi na Yesu bala belala tulo mwa yeve. ¹⁵ Pakuti ici tunena kwa mweo mwa mau ba Ambuye, kuti seo tili na moyo tesiyiwa mpaka kuwela kwa Ambuye, tikathangulile lini bala belala. ¹⁶ Ndaba Ambuye mwinekazi akaseluke kufuma kululu. Akewele na kukuwa, na lizu la mngelo mkulu, na lipenga la Mulungu, bakufwa mwa Kristu bakayambile kuuka. ¹⁷ Ndipo seo tili na moyo tesiyiwa, pamozi na beve, tikatolewe mu mikumbi kukumana na Ambuye mu mulenga-lenga. Munjila iyi tikankhale naye nthawi zonse. ¹⁸ Mwa ici sangalalashanani na mau aba.