¹ Lomba kulabila za nthawi na nyengo, anekwasu mufunika lini nakuti cili conse cilembewe kwa mweo. ² Pakuti mweo mweka muziba bwino kuti siku la Ambuye likawele ngati kawalala usiku. ³ Pakunena kuti, "Mtendele nakucinjijyiwa," pamene apo mwavundumu cionongeko cikawele pa beve. cikabe ngati vobaba vamuzimai wa vumo povyala. Muliye mulimose mwatibaka pulumikile. ⁴ Koma mweo, anekwasu, muli lini mu mfinzi kuti siku ili likakupezeni ngati kawalala. ⁵ Pakuti mweo monse nimwe bana ba kutuba na bana ba mzuba, niselini bana ba usiku olo bana ba mfinzi. ⁶ Moteto, tisalole mwakucitila onse. M'malo mwake tinkhale olandilila ndipo tisakolwe. ⁷ Pakuti bala olala ocita teto usiku, nabala okolwa ocita teto usiku. ⁸ Koma ndaba nise ba mzuba tinkhale osakolwa nakuvwala cikhulupililo na cikondi monga capacifuba, na ciyembekezo ca cipulumuso monga cisoti casu. ⁹ Pakuti Mulungu aliyetisankhile ku ukali, koma kuti tikapeze cipulumuso mwa Ambuye Yesu Kristu. ¹⁰ Ni yeve etifwila kuti olo tili meso olo kapena talala, tikankhale naye pamozi. ¹¹ Mwa ici sangalalashanani nakumangililana m'mozi na muyake, monga mumucitila. ¹² Tukupemphani, anekwasu, kuti mubazibe bala ogwila nchito pakati panu, bamene bakuti nibakulene pa mweo mwa Ambuye nakukulangjyani. ¹³ Tukupemphani soti kuti mubape ulemu mu cikondi kamba ka nchito yao. Nkhalani mu mtendele pakati panu. ¹⁴ Tukudandaulilani, anekwasu: cenjejyani bala baulesi, limbikishani bala owelela vuli, yavyani ofoka, nakunkhala oleza mtima pa onse. ¹⁵ Muone kuti pasankhale owejyela ciyipa pa ciyipa kwa aliyense, m'malo mwake, konkhani cabwino pa m'mozi na muyake na onse. ¹⁶ Kondwelani nthawi zonse. ¹⁷ Pemphelani kosalekejya. ¹⁸ Mu vili vonse yamikani. Ndaba ici nicifunilo ca Mulungu mwa Kristu Yesu. ¹⁹ Musazimye Mzimu. ²⁰ Osapepusha uneneli. ²¹ Yesani vinthu vonse.Katishani cabwino. ²² Nkhalani kutali na ciyipa ciliconse. ²³ Lekani Mulungu wa mtendele akutubisheni mofikapo. Lekani mzimu wanu wonse, na moyo na thupi visungike vangwilo pa kuza kwa Ambuye wasu Yesu Kristu. ²⁴ Okhulupilika niyewamene okuitani, niye wati akacicite. ²⁵ Anekwasu mutipemphelele nase. ²⁶ Mu bape moni anekwasu onse nakufyofyontha kutuba. ²⁷ Nukulamulilani mweo mwa Ambuye kuti kalata iyi ibelengewe kwa anekwasu onse. ²⁸ Cisomo ca Ambuye wasu Yesu Kristu cibe namwe.