¹ Ko ninelini omasuliwa? Ko ninelini otumiwa? Niliye muone Yesu Ambuye wasu? Nimwelini anchito bangu mwa Ambuye? ² Ngati ninelini otumiwa ku banthu bayakine, nkhasako nine otumiwa kwa mweo. Ndaba nimwe cizindikilo ca utumiki wangu mwa Ambuye. ³ Ici niye cuniteteza kwabala okosha za neo: ⁴ Ko tiliye ulamulilo wa kulya na kumwa? ⁵ Ko tiliye ulamulilo wonyamula mwanakazi wasu wamene ali okhulupilila, mwakucitila otumiwa bayakine, na anekwao ba Ambuye, na Kefa? ⁶ Kapena nineo neka na Banaba tufunika kusebenza? ⁷ Nibani osebenza ngati msilikali nakuzifunila malipilo eve eka? Nibani olima munda ndipo nosalyako vipaso vake? kapena nibani obeta vibeto cosasengako mkaka wakumwa eve? ⁸ Ko nulabila ivi vinthu mwa ulamulilo wa umunthu? Ko lamulo lubilalini teti? ⁹ Pakuti nicolembewa mu cilamulo ca Mose, ''Osamanga nkhabi kukamwa paupuntha mbeu.'' Ko ni nkhabi yakusamilila Mulungu? ¹⁰ Ko olabilalini zaseo? Ndaba uyo olima ofunika kulima na ciyembekezo, naye soti opuntha apunthe na ciyembekezo cogabana zawatusha. ¹¹ Ngati tecala vinthu va uzimu pakati panu, niyekuti ngati tatusha vinthu vakumubili kufumila kwa mweo niye kuti tacita caipa ngako? ¹² Ngati ayakine oonesha uyu ulamulilo pa mweo, nanga seo tuyenelalini kunkhala nao ngako? Koma tusebenzeshalini uyu ulamulilo. Koma tepilila vonse kupambana kuti tileshe uthenga wa Kristu. ¹³ Ko muzibalini kuti bala ogwila nchito mkacisi ocosa vakulya mkacisi? Ko muzibalini kuti bala ogwila nchito pa guwa ogabana zopelekewa pa guwa? ¹⁴ Cimozi-mozi, Ambuye elamula kuti bala olalikila uthenga wabwino akokulya kufumila mu uthenga wabwino. ¹⁵ Koma niliye tole ulamulilo uyu. Ndipo nulembalini ivi kuti municitile kanthu. Cilibwino nifwe kuposa munthu muyakine akangishe kuzitukumula kwangu. ¹⁶ Ndaba ngati nulalikila uthenga wabwino, kuliye kanthu kuzitukumula, cifukwa nufunika kucita teti. Ndipo soka kwa neo ngati nulalikilalini uthenga wabwino. ¹⁷ Ndaba ngati nucita teti mozipeleka, ninayo malipilo. Koma ngati nuzipelekalini, ninawo udindo wenikhulupilila nawo. ¹⁸ Ko malipilo yangu niyotyani? Kuti ngati nalalikila, ningapeleke uthenga wabwino kuliye mtengo ndipo kuti nisasebenjyeshe ulamulilo wangu onse wamu uthenga. ¹⁹ Ndaba olokuti nineomasuka ku onse, nenkhala kapolo wa onse, nacolinga cakuti niwine anyinji. ²⁰ Kwa Ayuda nenkhala ngati muyuda, nacolinga cakuti niwine Ayuda. Kwabala alipansi pa lamulo, nenkhala ngati nilipansi pa lamulo kuti niwine bala balipansi pa lamulo. Necita teti olokuti neo nenzelini pansi pa lamulo. ²¹ Kwa bala alikunja kwa lamulo, nenkhala ngati nilikunja kwa lamulo, olokuti neo nililini kunja kwa lamulo ya Mulungu, koma pansi pa lamulo ya Mulungu. ²² Kwa ofoka nenze ofoka, kuti niwine ofoka. Nankhala vinthu vonse ku banthu onse, kuti munjila iliyonse ninga pulumusheko bayakine. ²³ Nucita vonse ivi kamba ka uthenga wabwino, kuti ningapezekepo pa madaliso bake. ²⁴ Ko muzibalini onse ocita mpikisano wa lubilo outuka, koma nimunthu umozi olandila mphoto? Teto utukani kuti mutole mphoto. ²⁵ Outuka aliyense oyesayesa kuzilesha mu vinthu vonse. Ocita teti kuti akalandila kolona yusila, koma seo tucita teti kuti tikalandile yusasila. ²⁶ Teto nuutukalini kuliye colinga kapena kungonyata phweya. ²⁷ Koma nugonjesha mubili wangu nakuti unkhale mujya, kuti pavuli polalikila kubayakine, kuti neo nisakafumiwepo.