¹ Nufunalini kuti munkhale osaziba, anekwasu, kuti makolo basu benze pansi pa mtambo ndipo onse epita pa nyanja. ² Onse ebadizika mwa Mose mu mtambo na mu nyanja, ³ ndipo onse ecilya cakulya camumzimu. ⁴ Onse ecimwa cakumwa camumzimu. Ndaba becimwa kufuma ku mwala wamumzimu wenzo balondola, ndipo mwala uyu enze ni Kristu. ⁵ Koma Mulungu enze osakondwa na banyinji ayakine , ndipo vitanda vao venze salisali mu cipululu. ⁶ Lomba ivi vinthu venze ngati visanzo vasu seo, kuti tisakhumbwile vinthu viyipa monga beve. ⁷ Musankhale opembeza mafano, monga mwenzelili bayakine. Izi zili monga mwezelembewela, '' Banthu benkhala pansi kuti balye na kumwa, na kupana kuyamba kusebela.'' ⁸ Tisacite ciwelewele, monga mwecitla anyinji. Mu siku imozi banthu twente-fili sauzande ecifwa kamba ka ici. ⁹ Ndipo tisamuyese Kristu, monga mwecititla anyinji ndipo beonongeka na njoka. ¹⁰ Musang'ung'uzile, monga mwecitila anyinji ndipo beonongeka na mungelo wa imfwa. ¹¹ Lomba ivi vinthu vecitika kwabeve ngati cisanzo kwa seo. Velembewa ngati malangizo-kwa seo amene nthawi yosilijya yafilkila. ¹² Mwa ici lekani uyo oyesa kuti alipeneme acenjele kuti asapone. ¹³ Kuliye mayeselo yamene niyacilwendo ku banthu onse. Koma, Mulungu niokhulupilika. Sazalola kuti muyesewe kupitilila mphamvu zanu. Na mayeselo waikasoti na njila yopewelamo, kuti mukakwanishe kupilila. ¹⁴ Mwa ici, okondewa bangu, lekani kupemphela mafano. ¹⁵ Nulabila namweo ngati banthu akumvwa, kuti munga weluze zunulabila. ¹⁶ Kapu yamadaliso yutudalisa, sutugabana mu ngazi ya Kristu? Buledi yutu nyema, sutugabana mubili wa Kristu? ¹⁷ Cifukwa kuli lofu imozi ya buledi, seo tili anyinji nise mubili umozi. Seo tonse tunyemako ku buledi imozi pamozi. ¹⁸ Langani banthu ba Israeli. Ko awo akulya nsembe otolapolini mbali pa zapa guwa? ¹⁹ Ko nulabila cinji? Kuti fano ni kanthu? kapena kuti fano ni kanthu? kapena kuti cakulya copelekewa ku fano ni kanthu? ²⁰ Koma nulabila ivi vinthu vamene amitundu acikunja vakuthwala ngati nsembe, kuti othwala ivi vinthu ku vibanda osati kwa Mulungu. Nufunalini kuti mweo mugwilizane na vibanda! ²¹ Mungamwelini mu kapu ya Mulungu soti na mu kapu ya vibanda. Simungankhale pa thebulo ya Ambuye nonkhala soti na pa thebulo ya vibanda. ²² Ko tufuna kucitisha Mulungu nsanje? Ko tinamphamvu kuposa eve? ²³ ''Vinthu vonse nivovomelejyeka,'' koma nivonselini vili na phindu. Vinthu vonse nivovomelejyeka.'' koma nivonselini vukujya banthu. ²⁴ Munthu asafune zabwino zayeve eka. Koma aliyense afunile zabwino muyake. ²⁵ Mungalye vilivonse vakugulisa mumaliketi, kuli makosho yamucikumbu mtima. ²⁶ Ndaba ''ziko lapansi ni la Ambuye, na zonse zilimo'' ²⁷ Ngati osakhulupilila akuitilani ku cakulya, ndipo mufuna kuluta, lyani ciliconse cawakuikilani kosazikosha mafunso yamucikumbu mtima. ²⁸ Koma ngati muyakine olabila namweo, ''Ivi vapelekewa nsembe,'' apo musalye, kamba ka wala wakuujyani na kamba ka cikumbu mtima- ²⁹ cikumbu mtima ca ula munthu, cunutanthauza, osati canu. Ndaba cinji kuti mtendele wangu uweluziwe na cikumbu mtima ca munthu muyakine? ³⁰ Ngati neo nalya cakulya mothokoza , nunyozewa tyani pa cinthu canayamikila? ³¹ Mwa ici, pamukulya olo kumwa,olo ciliconse cumucita, cita ku ulemelelo wa Mulungu. ³² Musakhumudwishe Ayuda kapena Agiliki, kapena Chalichi ya Mulungu. ³³ Nuyesa kuti nikondweleshe munthu aliyense muvinthu vonse. Nuzifunila lini phindu yangu, koma phindu yabanthu anyinji. Nucita teti kuti bapulumuke.