¹ Mube ocita nga nineo, monga mwanucitila neo nga ni Kristu. ² Lomba neo nukutamandani ndaba munikumbuka mu vinthu vonse. Neo nukutamandani pakuti musunga mdauko monga mweneuletela kwa mweo. ³ Lomba nufuna kuti mweo mumvwishishe kuti Kristu niye mutu wa lidoda lililonse, nakuti lidoda niye mutu wa linina, na kuti Mulungu niye mutu wa Kristu. ⁴ Lidoda lililonse lupemphela olo kunenela mophimba ku mutu lunyozela mutu wake. ⁵ Koma linina lupemphela kosaphimba ku mutu kwake lunyozela mutu wake. Pakuti nicimozi-mozi kuti ku mutu kwake nikogela sisi. ⁶ Ndaba ngati linina siliza phimba ku mutu kwake, ligele sisi linkale lifupi. Ngati nicomvwisha soni kuti linina ligele sisi olo kumeta ku mutu kwake, luyenela kuphimbako ku mutu. ⁷ Pakuti lidoda siluyenela kuphimba kumutu, ndaba niye cithunzi na ulemelelo wa Mulungu. Koma linina niye ulemelelo wa lidoda. Pakuti lidoda liliye pangiwe kufuma mwa linina. ⁸ Mumalo mwake, linina niye lepangiwa kufuma mwa lidoda. ⁹ Pakuti soti lidoda liliye pangiwile linina. Mumalo mwake, linina lepangiwila lidoda. ¹⁰ Ici niye cifukwa cake luyenela kuba na cizindikilo ca ulamulilo ku mutu kwake, kamba ka angelo. ¹¹ Mwa ici, mwa Ambuye, linina lunkhala lini paliye lidoda, monga soti lidoda paliye linina. ¹² Monga linina lufuma mwa lidoda, cimozi-mozi soti lidoda lufuma mwa linina. Koma vinthu vonse vufuma kwa Mulungu. ¹³ Ziweluzeni mweka: Ko nicoyenela kuti linina likopemphela kwa Mulungu cosaphimba kumutu? ¹⁴ Ko cilengedwe sicutiphunzisa kuti ngati lidoda lunkhala na sisi litali, ici nicomvwisha soni kwa yeve? ¹⁵ Ko cilengedwe sicutiphunzisa kuti ngati linina lusunga sisi litali, niye ulemelelo wake? Pakuti sisi lapasiwa kwa yeve ngati cophimba. ¹⁶ Koma ngati pali ofuna kususana za ici, tiliye soti mocitila muyakine seo, kapena mipingo ya Mulungu. ¹⁷ Koma mwa vokonkhapo vocitika, neo nukutamandani lini. Pakuti mukakumana pamozi simukumanilana zabwino koma ziyipa. ¹⁸ Coyamba, nukumvwa kuti mukakumana pamozi mu chalichi, pali kupatukana pakati panu, mu njila iyake nukhulupilila. ¹⁹ Pakuti poyenela kunkhala mupatuko pakati panu, kuti bala ovomelejyewa akaonekele pakati pa mweo. ²⁰ Ndaba mukawela pamozi, ni mugonelo lini wa Ambuye umukulya. ²¹ Pamukulya, aliyense akulya vakulya vake bayake bakaliye kulya. Umozi ananjala, koma muyakine wakolwa. ²² Ko muliye mang'anda molyela na kumwa? Niyekuti mupepusha kachisi ya Mulungu nosula bala aliye kanthu? Ninganene cinji kwa mweo? Ko nikutamandeni mweo? Neo nikutamandeni lini pa ici! ²³ Pakuti nelandila kwa Ambuye camene soti cenepeleka kwa mweo, kuti Ambuye Yesu, usiku wecitwaliwa, etola buledi. ²⁴ Pavuli popeleka ciyamiko, esuna buledi nonena kuti, "Uyi niye thupi langu, yamene ili yanu. citani teti ngati cikumbuso pa neo." ²⁵ Cimozi-mozi etola kapu pavuli polandila cakulya ca camcingulo, ndipo eciti, "Iyi kapu ni pangano ya lomba mu ngazi yangu. Citani teti kabili-kabili pomukumwa, ngati cikumbuso pa neo." ²⁶ Pakuti nthawi zonse mukalya buledi iyi na kumwa kapu iyi, mulalikila imfwa ya Ambuye mpaka pati akawele. ²⁷ Aliyense, mwa ici, akulya buledi olo kumwa kapu ya Ambuye munjila yosayenela obudila thupi na ngazi ya Ambuye. ²⁸ Mulekeni munthu aziyese poyamba, ndipo munjila iyi mulukeni alye buledi na kumwamo mu kapu. ²⁹ Ndaba wakulya na wakumwa mosaziba thupi okulya na kuzimwela ciweluzo ca yeve yeka. ³⁰ Ici niye cifukwa cake anyinji pa mweo niofoka nolwala, ndipo anyinji amweo ecifwa. ³¹ Koma tikaziyesa teka, seo sitizaweluziwa. ³² Koma patuweluziwa na Ambuye, tulangiwa, kuti tisakasushiwe pamozi na ziko. ³³ Mwa ici, anekwasu, pamuwela pamozi kuzokulya lindilanani. ³⁴ Ngati muyakine ananjala mulekeni akalye kung'anda, kuti mukawela pamozi musakaweluziwe, ndipo pavinthu viyakine vemwelemba, nizakuujyeni nikayowela.