¹ Za mphaso zauzimu, anekwasu, nufuna lini kuti munkhale osaziba. ² Muziba kuti mweo pemwenze mukali akunja, mwesokonezeka na mafano osalabila, munjila iliyonse yenzokusogolelani. ³ Mwa ici nufuna kuti muzibe kuti kuliye munthu olabila mu Mzimu wa Mulungu angenene, "Yesu niotembeleleka." Kuliye angalabile, "Yesu ni Ambuye," koma mwa Mzimu Utuba. ⁴ Lomba pali mphaso zosiyana-siyana koma Mzimu umozi. ⁵ Pali mautimiki osiyana-siyan, koma Ambuye amozi; ⁶ koma soti pali nchito zosiyana-siyana, koma ni Mulungu umozi osebenza zonse mu zonse. ⁷ Lomba kwa aliyense kwapasiwa zooneshela za kunja za Mzimu kuti onse akapeze phindu. ⁸ Pakuti ku umozi kwapasiwa na Mzimu mau anzelu, na kumuyakine mau oziba na Mzimu umozi. ⁹ Ku muyakine kwapasiwa cikhulupilo mwa Mzimu umozi, ¹⁰ ku muyakine mphaso zopolesha mwa Mzimu umozi. Ku muyakine zocitika za mphamvu, ndipo ku muyakine kunenela. Ku muyakine kwapasiwa mphamvu yosiyanisha mizimu, ku muyakine malulimi osiyana-siyana, ndipo ku muyakine kumasulila malulimi. ¹¹ Izi zonse nizinchito za Mzimu umozi na umozi, kugabila mphaso kwa munthu aliyense, monga mwa kufuna kwake. ¹² Monga thupi ni imozi koma ili na viwalo vinyinji ndipo viwalo vonse ni va thupi imozi, niye mwalili Kristu. ¹³ Pakuti mwa Mzimu umozi seo tonse tebatiziwa mu thupi imozi, ngankhale kuti Ayuda olo Agiliki, kapena omangiwa olo omasuka, onse epasiwa mpata kuti amwe ku Mzimu umozi. ¹⁴ Pakuti thupi ni ciwalo lini cimozi, koma vinyinji. ¹⁵ Ngati kwendo yunena kuti, "Pakuti neo ninelini kwanja, nine lini umozi wa thupi." ici cupangisha lini kusankhala gawo la thupi. ¹⁶ Ngati kwatu inganene kuti, "Ndaba nine lini linso, nine lini gawo la thupi," ici cupangisha lini kusankhala gawo la thupi. ¹⁷ Ngati thupi lonse lenze ni linso, nanga mphamvu yakumvwa sembe ilikuni? Ngati kuti thupi lonse lenze ni kwatu, sembe mphamvu yonunsha ilikuni? ¹⁸ Koma Mulungu eika ciwalo ca thupi ciliconse monga mwa kufuna kwake. ¹⁹ Ngati kuti vonse venze gawo imozi, lomba thupi sembe ilikuni? ²⁰ mwa ici ni vigawo vinyinji, koma thupi imozi yeka. ²¹ Linso silingaujye kwanja kuti, "Neo niliye nawe na nchito." olo mutu kuujya kwendo kuti, "Neo niliye nawe na nchito." ²² Koma vigawo va thupi vuoneka vofoka nivofunikila, ²³ na vigawo va thupi vutuganizila kuti nivocepekela ulemu, tivipase ulemu ngako, ndipo na viwalo visaoneka bwino vipasiwe ulemu. ²⁴ Lomba vigawo va thupi vuoneka bwino vufunika lini kupasiwa ulemu ndaba vinaulemu kale. Koma Mulungu etola viwalo vonse noviyika pamozi, nakupasa ulemu vala venzeve. ²⁵ Ecita ici kuti musankhale kugabikana mu thupi, koma kuti vigawo vikasamalilane muyake na muyake mwa mwa muyeso umozi. ²⁶ Mwa ici umozi akazunzika onse azunzikile pamozi; olo ngati muyakine walemekezeka onse akondwele pamozi. ²⁷ Lomba mweo nimwe thupi la Kristu ndipo aliyense payeka payeka nicigawo cake. ^{28 29} Ndipo Mulungu eika mu mpingo coyamba apostoli, kacibili aneneli, kacitatu aphunzisi, bwino lake bala ocita vinthu vamphamvu, kuza mphaso yopelesha, bala opeleka thandizo, bala ogwila nchito yolongosola vinthu, ndipo nabala alina malilime osiyana-siyana. Ko onse na apostoli? Ko onse ni aneneli? Ko onse ni aphunzisi? Ko onse ogwila nchito zodabwisa? ³⁰ Ko onse alinazo mphaso zopolesha? Ko onse olabila mumalulimi? Ko nionse omasulila malulimi? ³¹ Funani- funani mpaso zikulu-zikulu. Koma neo nikuonesheni njila yolongosoka ngako.