¹ Lomba ngati neo nulabila na malilime ya banthu na ya angelo. Koma ngati niliye cikondi, nunkhala ngati cisulo cupanga tyala congo olo nguli yulila. ² Lomba ngati nili na mphaso yonenela na kumvweshesha zonse zisinsi zobisika na cizibisho, nakuti ninacikhulupililo cofwendejya malupili. ³ Koma ngati niliye cikondi, nine watyala-tyala. Lomba ngati neo nupasa vonse vinili navo kuti nilyeshe osauka, nakuti napeleka thupi langu kuti nishokewe. Koma ngati niliye cikondi, paliye cunuphindula. ⁴ Cikondi nicosisikanya na cifundo. Cikondi ciliye sanje ndipo cuzikweza lini. Cuzitukumula lini ⁵ kapena kusoba ulemu. cuzikondwelesha lini ceka. cukwiya lini kamangu, olo kusunga vinthu viyipa. ⁶ Cukondwela lini mu vinthu vosalungama. Koma, cukondwela mu coona. ⁷ Cikondi cukatilila vinthu vonse, cukhulupilia vinthu vonse, cuyembekeza vinthu vonse nakupilila vinthu vonse. ⁸ Cikondi cusila lini. Ngati pali mauneneli, yakapite. Ngati pali malilime, yakasile. Ngati pali kuziba, kukasile. ⁹ Ndaba tuziba patontho ndipo tunenela patontho. ¹⁰ Koma canthunthu cikawela,cosasilijyika cikacoke. ¹¹ Penenze mwana nenzolabila ngati ka mwana, nenzoganiza ngati ka mwana, nenzo lingalila ngati ka mwana. Penekula, neleka vinthu vacibwana. ¹² Pakuti lomba tuona moyelekejya monga mukalilole, koma ni meso na meso. Lomba nuziba patontho, koma nukuyoziba mwanthunthu monga mwanazibikila neo kofikapo. ¹³ Koma lomba izi zitatu zusala: Cikhulupilo, ciyembekezo, na cikondi. Koma cupambana pa vonse ni cikondi.