¹ Funani funani cikondi nakuba nacangu ku mphaso zauzimu, maka maka kuti mweo mukanenele. ² Pakuti wala olabila mu lilime solabila ku banthu koma kwa Mulungu. Ndaba paliye omumvya yeve pakuti olabila zisinsi za mumzimu. ³ Koma wala onenela olabila ku banthu kuti akabakujye, abalimbikishe, nakubathangata. ⁴ Wala olabila mu lilime ozikujya yeka, koma onenela okujya mpingo. ⁵ Lomba neo nufunishisha kuti mweo monse mukalabile mu malilime. Koma mopambana apo, nufuna kuti mukanenele. Wala onenela opambana wala olabila malilime ( peka peka papezeke omasulila kuti mpingo ukule). ⁶ Koma lomba, anekwasu, ngati nukuza kwanu nulabila malilime, nikuphindulileni cinji? paliye, peka peka ngati nilabile namwe movumbulusha, kapena mozibisha, olo uneneli, olo kuphunzisa. ⁷ Ngati visulo viliye umoyo vucosa mau- monga mtolilo olo ngoli- ngati sivingacose mau osiyana, ko munthu angazibe tyani kuti ni nyimbo yanji yuimbiwa? ⁸ Pakuti ngati mtolilo ungaimbiwe na mau osazibika bwino, munthu angazibe tyani kuti ni nthawi yokonzekela ku nkhondo? ⁹ Ici ni cimozi mozi namweo. Ngati mulabila mau osamvwika bwino, zolabila zanu akizimvwishe tyani? Mukolabila koma paliye wati akokumvwani. ¹⁰ Pali mitundu na mitunda ya mau mu ziko, paliye yaliye tanthauzo. ¹¹ Ngati nuziba lini tanthauzo ya mau, ninkhale mulwendo kwa olabila, na olabila ankhale mulwendo kwa neo. ¹² Niye mwazilili na mweo. Pakuti nimwe ofunishisha zooneshela zake zamzimu, mufune fune mphaso zingakulisha mpingo. ¹³ Wala olabila mumalilime apemphele kuti akamasulile. ¹⁴ Ndaba ngati nupemphela mu lilime, mzimu wangu upemphela, koma maganizo yangu siyophindulapo kanthu. ¹⁵ Lomba nicite tyani? Nipemhele na mzimu wangu, koma ni pemphele soti namaganizo yangu. Niyimbe na mzimu wangu, ndipo niyimbe soti namaganizo yangu. ¹⁶ Apo yai, ngati mutamanda Mulungu na mzimu, nanga wala alikunja anene tyani kuti "Ame" pumuthwala mathokozo ngati yeve akumvwa lini vumulabila? ¹⁷ Ndaba mweo muziba bwino kuthokoza, koma munthu muyakine othandizika lini. ¹⁸ Nuthokoza Mulungu kuti nulabila mu malilime kupambana mose mweo. ¹⁹ Koma mu mpingo neo ninga kondwe kulabila mau faifi nakumvweshesha kwangu kuti nikazibishe muyakine mocitila kuposa teni sauzande mau mulilime. ²⁰ Anekwasu, osankhala tubana mukuganiza kwanu. Koma, molingana na viyipa, munkhale nga nitubana twa khanda. Koma mumaganizo banu mukhwime. ²¹ Mucilamulo nicolembeka kuti, "Mwa banthu bacilwendo na milomo yacilwendo nilabile ku banhu aba. Olo niteto, beve sibazanimvya neo," wanena Ambuye. ²² Moteto, malilime nicizindikilo, osati kwa okhulupilila koma kwa osakhulupilila. Koma kunenela nicizindikilo, osati ca osakhulupilila, koma okhulupilila. ²³ Lomba ngati, mpingo onse wawela pamozi ndipo aliyense olabila mumalilime, soti nao akunja na osakhulupilila baloba, ko balabile lini kuti mwacita misala? ²⁴ Koma mweo monse kuti mwenzo nenela ndipo osakhulupilila olo wakunja waloba mkati, angasushiwe na vonse vati amvwe.Angaweluziwe na vonse volabilika. ²⁵ Visinsi vamu mtima mwake vingaonekele. Mwa ici, angagwade pansi nakupembeza Mulungu. Anganene kuti Mulungu ndithu ali pakati panu. ²⁶ Ko cokonkhapo nicinji, anekwasu? Mukawela pamozi, aliyense ali na nyimbo, ciphunziso, civumbuluso, lilime, olo cimasulilo. Citani vonse kuti mukujye mpingo. ²⁷ Ngati muyakine walabila mu lilime, lekani pabe abili makamaka atatu, ndipo aliyense alabile pa nthawi yake, ndipo muyakine amasulile vulabilika. ²⁸ Ngati paliye omasulila lekani aliyense ankhale duu mu mpingo. Lekani aliyense azilabijye yeka na Mulungu wake. ³¹ Pakuti monse munganenele umozi umozi kuti monse mukaphunzile nakuti onse akalimbikishike. ³² Ndaba mizimu ya aneneli yunkhala yogonjela aneneli. ³³ Pakuti Mulungu ni Mulungu lini wamsokonezo, koma wa mtendele. ³⁴ Manina ankhale duu mu mipingo. Ndaba niosalolewa kulabila. Mumalo mwake, beve abe omvwilila, monga muyulabilila lamulo. ³⁵ Ngati pangabe kanthu kabanga fune kuziba, lekani akakoshe alume bao kung'anda. Ndaba nicocitisha soni kuti linina likolabila mu mpingo. ³⁶ Ko mau a Mulungu efuma kwa mweo? Ko nimweo mweka mwelandila mau? ³⁷ Ngati pali muyakine oziyesa kuti ni muneneli olo wauzimu,oyenela kuvumelejya kuti vinthu vunukulembelani mweo ni lamulo la Ambuye. ³⁸ Koma ngati muyakine ozindikila lini ici, mulekeni asazindikilike. ³⁹ Lomba teto, anekwasu,mufunishishe kunenela, ndipo osalesha munthu kulabila mu malilime, ⁴⁰ Koma lekani kuti vinthu vonse vicitike moyenela na mundondomeko.