¹ Lomba nukukumbushani, anekwasu, pa uthenga wa bwino wenelalikila kwa mweo, wemwelandila ndipo niye pumupanama mweo, ² nakuti niye pumupulumukila, ngati mweo mukangamila ku mau bene kulalikilani, peka peka ngati mwekhulupilila pa tyala. ³ Pakuti neleta kwa mweo nga nicofunikila coyamba cenelandila nane soti, kuti Kristu efwila macimo basu monga mwa malemba, ⁴ kuti eikiwa mumanda, ndipo kuti eukishiwa pa siku la citatu kulingana na malemba. ⁵ Kristu eonekela kwa Kefa, ndipo na kwa bala twelufu; ⁶ niye peonekela kwa azinekwao opitilila faifi hundiledi pa nthawi imozi. Banyinji ba bala akali moyo, koma bayakine ecifwa. ⁷ Niye pecionekela kwa Jemusi, na ku otumiwa onse. ⁸ Posilijyila penepene, eonekela kwa neo, monga kwa munthu ebadwa nthawi yake ikaliye kwane. ⁹ Ndaba neo niye kupela wa otumiwa. Neo nuyenela lini kuitiwa otumiwa ndaba neo nezunza mpingo wa Mulungu. ¹⁰ Koma mwa cisomo ca Mulungu neo nili munilili na kuti cisomo cake mwa neo cenze lini ca tyala. Mumalo mwake, neo nesebenza ngako molimba kupambana onse. Olo kuti ni neo lini, koma cisomo ca Mulungu cili na neo. ¹¹ Mwa ici, kapena ni neo olo beve, seo telalikila ndipo mwekhulupilila. ¹² Lomba ngati Kristu olalikiwa ngati okushiwa kwa akufwa, nanga bayakine amweo mungalabile tyani kuti kuliye kuuka kwa akufwa? ¹³ Lomba ngati kuliye kuuka kwa akufwa, niye kuti olo Kristu aliye ukishiwe kwa akufwa; ¹⁴ ndipo ngati Kristu aliye ukishiwe niye kuti ulaliki wasu ni wa tyala, na cikhulupililo canu soti ni catyala. ¹⁵ Koma soti, tupezeka kunkhala mboni za wenye pa Mulungu, cifukwa tecitila umboni kuti Mulungu eukisha Kristu kwa akufwa. Koma aliye muukishe, ngati zoona akufwa oukishiwa lini. ¹⁶ Ngati akufwa oukishiwa lini, niye kuti olo Kristu wamene aliye ukishiwe; ¹⁷ ndipo ngati Kristu aliye ukishiwe, niye kuti cikhulupililo canu ni catyala ndipo mukali mu macimo banu. ¹⁸ Niye kuti nabala ecifwa mwa Kristu nao soti eonongeka. ¹⁹ Ngati tyala mu umoyo uno seo tuyembekezela mwa Kristu, pa banthu onse seo tufunika kuticitila ngako cifundo. ²⁰ Koma lomba, Kristu eukishiwa kwa akufwa monga vipaso voyamba vabala ecifwa, eukishiwa kwa akufwa. ²¹ Pakuti imfwa yewela na munthu, na munthu soti kwewela kuukishiwa kwa akufwa. ²² Pakuti monga mwa Adamu onse akufwa, mwa Kristu soti akaukishiwe namoyo. ²³ Koma aliyense mwa ndondomeko yake; Kristu, ali vipaso voyamba, pavuli pake bala ali bake Kristu bakaukishiwe pa kuwela kwake. ²⁴ Ndipo apo niye pati pakabe masilijyilo, pati yeve akapeleke ziko kwa Mulungu Atata, pati akafafanize ufumu onse, ulamulilo onse, na mphamvu. ²⁵ Ndaba ofunika kulamulila mpaka akaike adani bake pansi pa mendo yake. ²⁶ Mudani osilijyila kuononga niye imfwa. ²⁷ Pakuti "Yeve waika vinthu vonse pansi pa mendo yake." Koma puyolabila kuti "Yeve waika vinthu vonse," ici cuoneshelatu kuti ici sicutanthauza kuti eikila pamozi na eika vinthu pansi pa ulamulilo wake. ²⁸ Vinthu vonse vikaikiwa pansi pa ulamulilo wake, pamene apo Mwana yeve akabe pansi pa yeve eika vonse pansi pa ulamulilo wake, kuti Mulungu akabe wa onse mu vonse. ²⁹ Olo ni cinji cangacite bala obatizikila akufwa? Ngati akufwa oukishiwa lini konse, ndaba cinji beve obatizikila akufwa? ³⁰ Ndaba cinji tili muciofyezo ola ili yonse? ³¹ Neo nikufwa masiku yonse! Ici nicosimikijyika nga nikuzitukumula kwangu mwa mweo, kunili nako mwa Kristu Yesu Ambuye wasu. ³² Ko neo nuphindulanji, kulingalila monga mwa umunthu, ngati neo negwebana na vinyama ku Efeso, ngati akufwa sakaukishiwa? "Lekani seo tilye na kumwa, ndaba mailo tikufwa." ³³ Musanyengewe: "Ciyanjano ciyipa cuyifya nkhalo yabwino." ³⁴ Nkhalani chelu! Nkalani umoyo olungama! Osapitilijya kucimwa. Pakuti ayakine amweo muliye cizibisho ca Mulungu. Neo nunena teti kuti mweo mucite soni' ³⁵ Koma muyakine anganene kuti, "Akufwa oukishiwa motyani, nakuti bakuza na ma thupi yotyani?" ³⁶ Paliye cumuziba! Caucala cumelalini pekapeka coyamba cifwe. ³⁷ Caucala weo sindiye cati cikabe, koma ka mbeu. Kangabe tiligu olo kanthu kayake. ³⁸ Koma Mulungu akakapase thupi monga mwakusankha kwake, mbeu ili yonse ina thupi lake lake. ³⁹ Ni minofu lini yonse ili cimozi mozi. Mumalo mwake, pali munofu wa munthu na munofu uyake wa nyama, na munofu wa nyoni, ndipo munofu uyakine wa nsomba. ⁴⁰ Kuli soti mathupi ya mumulengalenga na mathupi ya pa ziko lapansi. Koma ulemelelo wa mtundu wa mathupi ya kululu ni umozi ndipo ulemelelo wa mathupi ya pa ziko lapansi niuyake. ⁴¹ Pali ulemelelo umozi wa zuba, na ulemelelo uyakine wa mwezi, na ulemelelo wa nyenyezi. Ndaba nyenyezi imozi usiyana na nyenyezi iyake mu ulemelelo. ⁴² Niye cimozi mozi na kuukishiwa kwa akufwa. Cucaliwa cuola, ndipo cuukishiwa cuola lini. cucaliwa catyala tyala; cuukishiwa mu ulemelelo. ⁴³ Cucaliwa mukufoka; cuukishiwa mu mphamvu. ⁴⁴ Cucaliwa na thupi yacilengedwe; cuukishiwa na thupi ya uzimu. Ngati pali thupi ya cilengedwe pali soti thupi ya uzimu. ⁴⁵ Soti nicolembeka kuti, "Munthu oyamba Adamu enkhala moyo wa moyo." Adamu osilijyila enkhala mzimu wopasa moyo. ⁴⁶ Koma cauzimu ciliye yambilile kuza koma cacilengedwe pavuli pake cauzimu. ⁴⁷ Munthu oyamba niwa ziko lapansi, opangiwa na dothi. Munthu wa cibili ocokela ku lulu. ⁴⁸ Monga mwalili epangiwa kufuma ku dothi, niye mwalili ao epangiwa kufuma ku dothi, monga mwalili munthu wa ku lulu, soti niye mwalili ao bali ba kululu. ⁴⁹ Monga mwetetolela cithunzi ca munthu wa pa ziko, tikatole soti cithunzi ca munthu wa ku lulu. ⁵⁰ Lomba nunena, anekwasu, kuti munofu na ngazi vingalobe lini ufumu wa Mulungu. Monga mucilili coola sicingalobe mumalo a cosaola. ⁵¹ Onani! Nukuujyani cisinsi ca coonadi: Sitizafwa tonse, koma tonse tikasinthike. ⁵² Tikasinthike mwa kamphindi, mwa kutwanima kwa linso, mwa lipenga losilijyila. Pakuti lipenga likalile, akufwa akaukishiwe na ma thupi osaola, ndipo tikasinthike. ⁵³ Ndaba iyi thupi yuola yufunika kuti ikavwale thupi lisaola, na thupi iyi ikufwa ikavwale thupi isafwa. ⁵⁴ Lomba iyi thupi yuola ikuyovwala thupi isaola, na thupi ikufwa ikayovwala thupi isafwa, niye pati cinenelo colembeka cakamveke kuti, "Imfwa ya melewa na mukupambana." ⁵⁵ "Imfwa, kupambana kwako kuli kuni? Imfwa, kuluma kwako kulikuni?" ⁵⁶ Kuluma kwa imfwa ni cimo, na mphamvu ya ucimo ni lamulo. ⁵⁷ Koma mayamiko kwa Mulungu, otipasa kupambana mwa Ambuye Yesu Kristu! ⁵⁸ Mwa ici, okondewa anekwasu, mube onkhazikika ndipo osagwendezeka. Nthawi zonse nkhazikikani mu nchito ya Ambuye, pakuti mweo muziba kuti nchito za mwa Ambuye zunkhala lini za tyala.