¹ Pamene umozi wa mweo okangana na muyake, ko okuya kuba malamulo osalungama, m'malo mwakuya kuli banthu oyopa Mulungu? ² Ko muziba lini kuti banthu oyela ba Mulungu akaweluze ziko? Lomba ngati mukaweluze ziko, ko mungakwanishe lini kulesha mukangano uliye phindu? ³ Ko muziba lini kuti tikaweluze angelo? Nanga, lomba, mutingaweluzile mikangano yaumoyo? ⁴ Lomba ngati mufunika kupeleka ciweluzo pa zaumoyo wa siku na siku, mupelekelanji milandu yoteti ku banthu osapanama bwino mu chalici? ⁵ Nalabila ici kuti nikumvwesheni soni. Ko paliye muyakine wa nzelu zokwanila kuti angasilijye mukangano pakati pa anekwao? ⁶ Koma pa unekwao ofolelana, ndipo izi zucitika pameso pa osakhulupilila! ⁷ Cazoona nicakuti muli na milandu pa unekwanu, niyekuti mwagonjesewa kale. Nicifukwa cinji osavomela kuipishiwa? Nicufukwa cinji kusalola kunyengejyewa? ⁸ Koma mweo mweka mucita viyipa nakunyengejya, ndipo mucita izi kwa anekwanu! ⁹ Ko muzibalini kuti osalungama akalobe lini mu ufumu wa Mulungu? Musanyengejyewe. Adama, amafano,acigololo, analume aciwelewele, aciwelewele pakati pa analume beka beka, ¹⁰ akawalala, akaso, bakumwa, amujedo na olonda- paliye wati akalobe mu ufumu wa Mulungu. ¹¹ Ndiye mwemwenzele mwayakine, Koma mwasambishiwa, mwatubishiwa, mweyesewa olungama mu zina ya Ambuye Yesu Kristu na mumzimu wa Mulungu. ¹² ''Vinthu vonse nivomelejyewa kwa neo,'' Koma nivonselini vuphindulisha. ''Vinthu vonse nivomelejyewa kwa neo'', koma nilamuliliwe lini naco olo cimozi mwaveve. ¹³ ''Cakulya nicaluvumo,na luvumo niyacakulya,'' Koma Mulungu akavisilijye vonse vibili. Mubili niwacigolololini. Koma mubili niwa Ambuye ndipo Ambuye akoupasa mubili. ¹⁴ Mulungu eukisha Ambuye koma soti akaukishe naseo mwa mphamvu yake. Ko muzibalini kuti mibili yanu nivawalo va Yesu Kristu? ¹⁵ Lomba ningatole ciwalo ca Kristu nolumikijyana na mwanakazi waciwelewele? visankhale teto! ¹⁶ Ko muzibalini kuti olumikijyana na hule onkhala mubili umozi na eve? Monga mwakulabilila mau kuti, ''abili akankhale mubili umozi. ¹⁷ Koma eve olumikijyana na Ambuye onkhala mu mzimu umozi na eve. ¹⁸ Thabani ciwelewele! Cimo iliyonse yangacite munthu ilikunja kwa mubili, koma munthu wa ciwelewele ocimwila mubili wake eka. ¹⁹ Ko muzibalini kuti mubili wanu nikachisi wa Mzimu Utuba, wamene ali mwamweo, kufuma kwa Mulungu? muzibalini kuti mulimwekalini? ²⁰ Pakuti mweguliwa na mtenga wapatali. Mwaico mulemekezeni Mulungu na mubili wanu na mu mzimu wanu ufumila kwa Mulungu.