¹ Niditra Jesôsy aveo nandalo an'i Jeriko. ² Tô, nisy lalahy zay antsôvigny hoe Zakaiosy teo. Izy dia lehiben'ny mpamôry haitra sady nanankariagna. ³ Niaizaka ny hizaha izy hoe zôvy Jesôsy, kanaifa tsy afaka nahita tao agnivon'ôlogno, satria fohy izy. ⁴ Kay nilomoay talaohaka reo ôlogno izy avakeo nagnaniky kakazon'aviavy araiky mbô hizaha Azy, satria handalo amin'ny zany lalagna zany Jesôsy. ¹¹ Raha naharegny zany raha zany zareo, dia nanôhy ninainagna Izy avakeo nagnano fagnoharagna araiky, satria teo marikitry Jerosalema Izy, avakeo zareo nieritreritry fao hiboaka samby teo ny fanjakan-Jagnahary. ¹² Noho zany Izy dia ninainagna nagnanjao: ''Nisy andriandahy araiky nandaiha tagny an-tany lavitry mbô hahazo fanjakagna ho an'ny haignianazy ndraiky himpôdy avakeo. ¹³ Nagnantso fôlo lahy tamin'ny reo mpanompo azy izy, avakeo nagnamia farantsa fôlo zareo, avakeo nivaolagna tamin-jareo nagnanjao: ''Manaova raharaham-barotro papiky zaha himpôdy.'' ¹⁴ Kanaifa reo fokon'ôlogno nalaigny azy salakady nagnandaifa solontaigna nagnaraka azy, nivaolagna nagnanjao: ''Tsy ilainay ny hanjakan'io lalaha io aketo aminay.'' ¹⁵ Avakeo koafa nimpôdy ndraiky reo mpagnaradia azy lehy namiany vaola mbô ho akeo aminazy izy, mbô hahaizany zay tômbony azon'njareo tamin'ny fanaovagna raharaham-barotro. ¹⁶ Havy teo alaohakanazy ny voalohany, nivaolagna nagnanjao: 'Tompo, ny farantsanao dia nahazo tômbony farantsa fôlo mihoatra.' ¹⁷ Ninainagna azy lehy tandapa nagnanjao: 'Tsara zany, mpanompo tsara. Noho anao natoky tamin'ny hely taigna hely, dia hanagna fahefagna amin'ny tagnàgna fôlo anao.' ¹⁸ Havy lehy faharoa, nivaolagna nagnanjao: 'Ny farantsagnao, Tompo, dia nahaifa farantsa dimy.' ¹⁹ Avakeo ninainagna tamin'ny lehy tandapa nagnanjao: 'Hikarakara tanàgna dimy anao.' ²⁰ Havy ny araiky hafa, nivaolagna: 'Tompo, tô ny farantsagnao, zay nakajiky tsara tao agnatin'ny lamba, ²¹ fao natahotro anao zaho, satria lalahy masiaka anao. Kay mangala zay tsy napaitrakao, avakeo mijinja zay tsy nafafinao.' ²² Nivaolagna taminy lehy tandapa nagnanjao: 'Amin'ny koragnanao manaokagna no hitsarako anao, anao mpanompo ratsy totry. Hainao fao zaho dia lalahy masiaka, malaka zay tsy napaitrako, avakeo mijinja zay tsy nafafiky. ²³ Kay nagnino moa tsy napaitrakao tagny amin'ny mpikajy vaola ny vaolanaha, kay koafa nimpôdy zaho dia ho nangala zany niaraka tamin'ny zanany?' ²⁶ Zaho mivaolagna aminareo, fao zay jiaby managna dia hamiagna mihoatra, fao zay tsy managna, na dia zay hely anagnany dia halaigny. ²⁷ Fao reo fahavaloko, zareo zay tsy nagniry zaho hanjaka akeo aminjareo, hento atô zareo ary vonoy eto ankilako.''' ²⁸ Koafa avy nagnambara regny raha regny izy, dia nandaiha talaohaka, nakatra hoagny Jerosalema. ²⁹ Ary koafa tonga akeo mariny betifaga ndraiky Betania Izy, teo amin'ny tanety antsovigny hoe oliva, dia nagniraka aroa tamin'ny reo mpianany Izy, ³⁰ nivaolagna nagnanjao: "Mandihiana akagny amin'ny tanagna hafa. Koafa miditry areo, dia hahita zanaboriky araiky mbôla tsary nitikinin'ôlogno lasitekiny. Vahao zany aveo hento atoy aminaha. ³¹ Raha misy magnontany areo magnanjao: 'Magnino moa vahanareo zio?' dia ambaranareo magnanjao: 'Misy ilavan'ny Tompo azy.' ³² Zareo zay nirahigny dia nandaiha akagny nahita lehy zana-boriky araka ny nivolagnin'ny Jesôsy taminjareo. ³³ Raha teo ampamahagna zanaboriky zareo, dia hoizy zareo tompony taminjareo nagnanjao: "Nagnino vahanareo ny zana-borikinaha?" ³⁴ Nivaolagna zareo:"Misy ilavan'i Tompo azy." ³⁵ Nihentinjareo tagny amin'ny Jesôsy zany, avakeo napetraka zareo teo ambonin'ny zana-boriky ny lambany aveo nampatotry Jesôsy akeo amboniny. ³⁶ Raha nandaiha igny Izy, dia nivilarinjareo teo amin'ny làlagna ny lambanjareo. ⁴¹ Koafa nagnatogno tanagna Jesôsy, dia nitomoagny azy, ⁴² nivaolagna nagnanjao: "Raha mbô hainareo moa amizeo andro zeo, egny anao, reo raha zay mitonga fiadanagna hoanao! Naifa amizeo regny dia mivôny amin'ny masonao. ⁴³ Fao hoavy aminareo andro, zay hampitsanganan'ny fahavalo manda magnodidigny anao, aveo hagnodidigny anao, ary hanery anao amin'ny lafiny jiaby. ⁴⁴ Zareo dia handavo anao amin'ny tany miaraka amin'ny Zanakao. Tsy hagnapetraka na vato araiky mifampitikigny aza zareo, satria anao tsy nahay zany fony Zagnahary niezaka ny hamonjy anao.'' ⁴⁷ Aveo nampianatra isanandro tao am-piangonagna Jesôsy. Zareo laohan'ny mpisôrogno ndraiky zareo mpanora-dalagna aveo zareo mpitariky ny vahoaka dia hagnano hamono Azy, ⁴⁸ fao tsy nahita fomba hanaovagna zany zareo, satria navila nitandregny Azy aby ny vahoaka jiaby.