¹ Tamin'ny andro zegny, nandaiha nitory tagny agnefatran'i Jodia i Jaona mpagnano batisa salakady nagnambara hoe: ² Mibebahà, fa efa marikitry ny fanjakan'ny lagnitry." ³ Fa izy araiky nambaran'i Isaia mpaminany magnano hoe: "Misy feo araiky mikaiky agny agnefitry magnano hoe: "Amboara lalagnan'ny tompo, ahitsiho lalagnanany." ⁴ Aviô i Jaona nisikin'ny lamba volon-drameva ndraiky nagnano seintiry hoditra tamin'ny valagnany. Kidraidra ndraiky antely remby nataony anigninany. ⁵ Aviô Jerosalema, Jodia jiaby, aviô faritra jiaby magnodidigny tegnan- dragnon'i Jordana jiaby nagnantogno izy. ⁶ Kay nataony batisa tamin'ny tegnan-dranon'i Jordana irô jiaby, izikoa fa niaiky tamin'ny fahotagnanany. ⁷ Fa izikoa fa nahita irô fariseo ndraiky Sadoseo maomaro nagnantogno izy mbaika atao batisa izy, kay nivolagniny tamin'drô: ô taranaka menarana feno poison, azôvy nampitandrigny anarô hilaifa heloko zay mbola hoavy? ⁸ Mamohazà voaha miendrikin'ny fibabohana, Aviô aza misaigny hivolagna anankam-po hoe: "Managna Abrahama babanay zahay." ⁹ Fa ambarako mazava tsara aminarô fa Zagnahary zegny mavita manangana zanaka hoan'i Abrahama nata baka amin'dro vato aby io. ¹⁰ Aviô efa nampetraka am-pototrin' ny kakazo ny famaky. Kay irô kakazo jiaby zay tsy mamoha voany tsara hikapaigna abôko hatsipy agnatin'ny môtro. ¹¹ Magnano batisa anarô zaha amin'ny rano mba hibabohanarô. Fa araiky avy afarako ao tegna mahery lombolombon'ny zaha abaka iô tsy fanaoko zaha fekiny nata hitôndra kiraronany. fa Izy zegny agnano anaro batisa amin'ny fanahy Masigny ndraiky amin'ny môtro. ¹² Fa aifa aminy tagnanany fikororoagna agnadiovagna mololony ndraiky hamoriagna varinany agny amin'ny plasin'ny vary. Fa izy agnôro irô ankoihitry amin'ny môtro zay tsy mety maty." ¹³ Aviô Jesosy tagny Galilia kay navy tamin'ny tegnan-dragnon'i Jordana mba ho ataon'i Jaona batisa. ¹⁴ Naifa i Jaona niaizaka nanakana izy, magnano hoe: "Tokony anao edy agnano batisa zaha, kanaifa anao ndraiky nagnaontogno zaha?" ¹⁵ Navalin'i Jesosy taminany hoe: Magnekeha zegny anao niany ty fa izegny mety amintsika agnantantairaka fahamarignanana jiaby." Aviô Jaona nagneky izegny. ¹⁶ Izikoa fa vita batisa Izy, directy fa niboaka tagnatin'ny rano i Jesosy, tio ny io fa nibiagna tamin'igny lagnitry. Hitany fagnahin-dRagnahary nidotro karaha pigeon avio nandaiha tagnambonany tio. ¹⁷ Abaka avio, nisy fiôho baka an-dagnitry nagano hoe: "Ity Zanako tiako. Zay tegna sitrako."