¹ Tafaran'ny nahateran'i Jesosy tà Betleheman'i Jodia salakady mbola tamin'ny andron'i Heroda mpanjaka, navy tao Jerosalema irô lelahy manam-pahaizagna baka tagny atsignanagna nagnambara hoe: ² "Aia tsaiky tairaka ho mpanjakan'ny jiosy zegny? Nahia lakintagna baka tà tsignanagna zahay kay navy mba hidera izy." ³ Izikoa fa naregny zegny i Heroda mpanjaka, nangôrohôro izy mbakan'i Jerosalema jiaby niaraka taminany. ⁴ Nandesin'i Heroda niaraka irô loha mpisorogno jiaby ndraiky irô mpanoro-dalàgnan'olo, aviô nagnontany irô izy: "Aia mba tany hiteran'i Kristy?" ⁵ Nambarandrô taminany hoe: Agny Betleheman'i Jodia, fa karaha ty nisoratiny mpaminany hoe: ⁶ 'Fa anao, Betlehema, agny amin'ny tanin'ny Joda, tsy tegna hely amindrô mpitondran'i Joda, fa aminao hitongavan'ny mpanapaka iambigny oloko Israely." ⁷ Aviô nikahian'i Heroda antsokosoko irô lelahy manam-pahaizagna aby io mba hagnontany irô mazava tsara nibohandô lakintagna aby io. ⁸ Nalefany tagny Betlehema irô, magnano hoe: "Mandihana aviô fôtôry tsara amin'ny tsaiky. Izikoa fa hitanarô izy, agnambarà zaha mba afako andaiha agny koa ndraiky hidera izy." ⁹ Tafaran'ny nagniraisan'drô mpanjaka, aviô nandaiha tamin'ny lalagna irô, aviô zay lakintagna hitandrô tà tsignana talohandrô mandra-pijanony tagnambon'ny plasy nisy tsaiky. ¹⁰ Izikoa fa nahita lakintagna irô, ravoravo tamim-pifaliambe ¹¹ Niditry tagnatiny tragno irô aviô nahita tsaiky ely niaraka tamin'ny maria mamany. Niankôhoko ndraiky nidera izy iro. Nagnaokatra plasiny fanagnanan'dro irô avio nagnamia volamena, dintin-kakazo mangitry ndraiky miora aminany. ¹² Nampitandremindro tamin'ny nofin-dRagnahary baika irô tsy ipody amin'ny Heroda, kay lalagna hafa nandianandro nagnantogno firenenanany aby. ¹³ Izikoa fa loso irô, nisy anjelin'ny Tompo niboaka tamin'i Josefa tamin'ny alalan'ny nofy aviô nivolagna karahty: ''Mifohazà anao, mandianà andaisa tsaiky io draiky mamany , aviô milifasa agny Egypta. Mipetraka agny mandra-pagnambarako aminao, fa i Heroda mitady tsaiky io mba hamonoany izy.'' ¹⁴ Tamin'ny aligny igny fo i Josefa nifoha salakady nitondra ny tsaiky draiky ny mamany kay nandeha tagny Egypta. Mipetraka tagny irô mandra-pahafatin'i Heroda. ¹⁵ Izegny nagnatanteraka raha nambaran'ny Tompo tamin'ny alalan'ny mpaminany hoe: ''Hikahiako hiala tagny Egypta ny zanako'' ¹⁶ Aviô i Heroda, izikoa fa nahita fa avoafitaka-ndrô lelahy manampahaizagna io izy, kay neloko farany mare. Salakady nagniraka olo fekiny izy amono tsaiky lelahy jiaby latsaka taogno aroe midotro tà Betleheme ndraiky tamin'igny faritra jiaby igny, araka fotoagna nifotorany mazava tamin'dro lelahy manam-pahaizagna. ¹⁷ Aviô tantairaka volagna nambarany tamin'ny alalan'i Jeremia mpaminany hoe: ¹⁸ Nisy fiôho regny tà Rama, fitomagniagna ndraiky fisaonam-be, nitomagny nohon'ny zanany i Rahely, aviô tsy nagneky ampangigniny izy, satria fa lôso irô." ¹⁹ Lairaka fa naty i Heroda, tiô amin'izaigny fa nisy anjelin'ny tompo niboaka tamin'i Josefa tagny Egypta tamin'ny agninofy kay nivolagna karaha ty: ²⁰ "Mifohazà avio andaisà zaza ndraiky mamany kay mandihanà agny amin'ny taniny Isarely, satria fa naty irô olo hitady amono tsaiky io." ²¹ Nifaoha i Josefa, nandesiny zaza ndraiky mamany aviô nandaiha tagny amin'ny tanin'Israely. ²² Fa izikoa fa regniny fa i Arkelaosy nanjaka tagny Jodia nandimby i Heroda babany, mbola navôzo fo izy andaiha agny. Tafarany Zagnahary nampitandrigny izy tamin'ny nôfy. Niala nandaiha amin'ny faritra Galilia izy. ²³ Kay nandaiha aviô tamin'ny tanàna atao ho Nazareta. kay izegny nagnantantairaka raha nivolagniny tamin'ny alalan'drô mpaminany hoe: Nazarena fikahian-drô izy."