¹ Avio i Jesosy nitaritin'ny fanahy handaiha agny an'efitry mba halain'ny devoly fagnahy. ² Izikoa fa baka nifady hanigny efapolo andro ndraiky efapolo aligny,kay silgno amin'izegny. ³ Nagnantogno izy mpangala fagnahy kay nivolagna taminany hoe: 'Izikoa Zanakan-dRagnahary marigny anao, volagnà mba hivadiky môkary irô vato ty." ⁴ Fa i Jesosy namaly karaha ty, kay nagnano hoe taminany: "Karaha ty voasaoratra ao: 'Tsy môfo kony mahavelogno olo io fa zay volagna jiaby ambaran-dRagnahary."' ⁵ Aviô nandesiny setoany tagny amin'ny tanàna masigny kay napaitrany tagny amin'ny faramtapon'ny tragnon-dRagnahary, ⁶ aviô nivolagna taminany hoe: "Izikoa zanakan-dRagnahary marigny anao, mitadatsahà agny ambany agny anao fa voasoratara ao, Izy hagniraka irô anjely hitahy anao ndraiky hitsambo anao amin'ny tagnandro, baika vitinao tsy ho kogno vato."' ⁷ Jesosy nagnambara izy: 'Mbola voasaoratra agny fo koa: Tsy tokony hitsapa ny Tompo Zagnaharinao fekiny anao."' ⁸ Nandesin'ny demony nandaiha amin'ny tany farany agnambo be izy naboakan'Izy fanjakana jiaby amin'ny donia ty ndraiky hatsaragna nany. ⁹ Nivolagniny taminany: "Raha jiaby io amiako anao, raha ohatra anao mankohoko alohako ndraiky midera zaha." ¹⁰ Avio Jesosy nagnambara taminany hoe: "Miala eto anao, ry demony! Fa efa voasaoratra hoe: "Anao atao hidera Zagnahary, aviô Izy zaraiky fo hitompoagna."' ¹¹ Abaka aviô fekiny nilaifa Izy demony, aviô igny fa nisy anjely navy ndraiky nanompo Izy. ¹² Izikoa fa regnin'i Jesosy fa voasambotra Jaona, nimpody tagny Galilia Izy. ¹³ Niala tagny Nazareta Izy, aviô nandaiha nipaitraka tao Kapernaony. Amin'ny sisin'ny ranomasigny Galilia, ndraiky amin'ny zara tanin'i Zebolona ndraiky Naftaly. ¹⁴ Izegny niboaka mba hatantairaka zaka jiaby nambaran'Isaia mpaminany hoe: ¹⁵ "Tanin'i Zebolona ndraiky tanin'i Naftaly, mandaiha amin'ny ranomasigny, agny an-dafin'i Jordana, Galilia hoandrô Jentilisa! ¹⁶ Irô olo nipaitraka tamin'ny aizigny nahita fahazavagnam-be, aviô irô zaigny nipaitraka tamin'ny faritra ndraiky alokin'ny fahafatesagna, kay tamindro niboahany fahazavagna." ¹⁷ Avio tamin'ny izegny fotoagna zegny Jesosy nanomboko nitory teny ndraiky nivolagna hoe: "Mibabohà, fa efa marikity ny fanjakagna ny lagnitry." ¹⁸ Izikoa fa nandaiha tàry amin'ny sisin'ny ranomasigny Galilia Izy, nahita mpiralahy aroé, Simona kahiagna Petera, abaka iô Andrea ralahiny, nagnatopy haratondrô tàry amin'ny ranomasigny, satria mpagnarato irô io. ¹⁹ Nivolagnin'i Jesosy tamin'drô: Allô, agnaraka zaha, fa hataoko mpagnarato olo anarô." ²⁰ Tio ny io nialandrô harato aby igny kay nandaiha nagnaraka Izy. ²¹ Izikoa Jesosy mbala nandaiha fo nahita mpiralahy aroe hafa koa, Jakoba zanakan'i Zebedio, aviô Jaona ralahiny. Nagnamboatra haratony tagnatin'ny sambo irô niaraka tamin'i Zebedio babandrô. Nikaiky iro Izy. ²² kay tio ny io niala samboheliny ndraiky babandro kay hagnaraka Izy. ²³ Nandaiha eran'i Galilia i Jesosy, nampianatra tamin'ny synagogondro, nitory filazantsaran'ny fanjakana, aviô nitahy irô karazagna aretigny jusqu'a rôfy jiaby tamin'olo. ²⁴ Niboely eran'i Syria vaovao momba Izy, kay nindesindrô olo taminany irô olo marary jiaby, mararin'ny karazagna aretigny ndraiky fangirifiriagna, irô demoniaka, ndraiky mararin'ny aretim- borogno ndraiky paralyse. Nitahin'i Jesosy irô jiaby zegny. ²⁵ Vahoaka maro baka tagny Galilia, Dekapolisy, Jerosalema, Jodia aviô ny baka avy agny an-dafin'i Jordana nagnaraka Izy