¹ Izy kofa nandraigny andra, nitetiky hanohitry Jesosy mba hamoanoandrô Izy irô lehiben’ny mpisorogno ndraiky lohologno aby irô. ² Nifihezindrô Izy, boaka iô nendosindrô tambelagna tagny, baka iô natolodrondrô tamin’i Pilato Governora. ³ I Jodasy, araiky hamadiky Izy igny, izy kofa nahita fa nidisogny Izy, loso izy nandeha nibebaka ary nagnampody volafotsy telopolo tamindrô lehiben’ny mpisorogno ndraiky tamindrô lohologno, ⁴ sady nivolagna hoe: «Nanota zaha tamin’ny namadihako liô tsy manantsigny.» Fa irô nivolagna hoe: «Ahoanay ino? Anao izegny.» ⁵ Baka iô, natsipiny tamin’ny tempoly tao volafotsy aby iô, avy iô loso, niboaka ary nagnantogno vatagnanany izy. ⁶ Avy iô nalain’ny lehiben’ny mpisorogno aby iô volafotsy aby iô boaka iô irô nivolagna hoe: “Tsy ara-dalàgna ny mametraka ity amin’ny fikajianam-bola, fotony vidin’ny liô ity.” ⁷ Niraka nikoragna mikasiky olagna iô irô, boaka iô nividianandrô tanin’ny mpagnano vilagny tanimanga vola igny hataondrô fasagna fandivenagna vahiny. ⁸ Izegny antontony nagnanaovagna saha io hoe: “tanin’ny lio” ziska ziô ty. ⁹ Ary tanteraka raha nivolagnin’ny mpaminany Jeremia, nivolagna hoe: “Nangala volafotsy telopolo irô, vidin’ny nanombanandrô vohakan’Isiraely Izy, ¹⁰ boaka iô irô nagnamia izegny ho an’ny tanin’ny mpagnano vilagny tanimanga, karaha nagnambaran’ny Tomponakahy izy.” ¹¹ Nitsangana talohan’ny governora tiô Jesosy, ary ny governora nagnontany Izy hoe: “Anao ma mpanjakan’ny Jiosy izegny?” Jesosy namaly Izy hoe: “Voalazanao.” ¹² Izy kofa nampangandrô lehiben’ny mpisorogno ndraiky lohologno irô Izy, tsy namaly na ino na ino Izy. ¹³ Boaka iô nivolagna taminany Pilato hoe: “Tsy regninao ma fagnampangagna atao Anao izegny?” ¹⁴ Tsy namaly na teny araiky Izy, gaga tantentaraka io governora io noho raha izegny. ¹⁵ Ary isaka andro firavoravoagna ndreky efa fa fomban’ny governora ny mamotsotro gadra araiky voafidin’ny vahoaka. ¹⁶ Tamin’ny fotoagna iô, nanangna gadra malaza ratsy antsovigny hoe Barabasy irô. ¹⁷ Noho izegny izy kofa nivorivory irô, nagnontany irô Pilato hoe: “Azovy tianarô halefako? Barabasy sa Jesosy izay antsovigny hoe: Kristy?” ¹⁸ Hainy fa avy baka amin’ny fialonagna no nanolorandrô Jesosy taminany. ¹⁹ Izy kofa nipeztraka tamin’ny sezy fitsaragna izy, nagnandefa volagna taminany vadiny nivolagna hoe: “Tsy mananagna na ino na ino hatao amin’ny lelahy tsy manan-tsigny ity zaha. Fotony nahinakinaka loatra zaha niany noho ny nofinakahy niany mikasiky Izy.” ²⁰ Fa ny lehiben’ny mpisorogno ndraiky lohologno aby irô nandresy lahatra vahoaka mba hangatahandrô an’i Barabasy, ary hampamono Jesosy. ²¹ Nagnontany irô ny Governora hoe: “Azovy amindrô aroe tianarô halefako ho anarô?” Namaly irô hoe: “Barabasy.” ²² Nivolagna tamindrô Pilato hoe: “Ino raha tokony hataoko amin’i Jesosy izay antsovigny hoe: Kristy?” Irô jiaby namaly hoe: “Fantsiaha amin’ny hazo fijaliagna Izy.” ²³ Nivolagna izy hoe: “Nagnino, ino ma raha tsy nety nataony?” Vao mainka irô nikiakiaka mafy hoe: “Fantsiaha amin’ny hazo fijaliagna Izy.” ²⁴ Izy kofa hitan’ny Pilato fa tsy afaka nagnano na ino na ino izy, kanefa efa nanomboko ny tabataba, nangala rano izy, nanasa tagnananany talohan’ny vahoaka, sady nivolagna hoe: “Tsy manantsigny amin’ny liion’ny lelahy tsy manantsigny ity zaha. Fa asanarô izegny.” ²⁵ Olo jiaby nivolagna hoe: “Ho aminay ndraiky zanakanay anie ny lionany.” ²⁶ Boaka iô nalefany ho an’irô Barabasy, fa Jesosy nasainy nivilesigny karavasy ary natolony Izy mba ho fantsihigny. ²⁷ Avy iô nalaindrô miaramilan’ny Governora irô Jesosy handeha amin’ny lapa ary nangonindrô vondron’ny miaramila jiaby. ²⁸ Nadosondrô fitafiagnanany boaka iô nampagnanaovindrô ankanjo jaky Izy. ²⁹ Nagnamboarandrô satro-boninahitry vita amin’ny fatsiky Izy boaka iô taondrô tamin’ny lohanany, ary nampitagna tongozy izy tamin’ny tagnanany ankavanagna. Nandongalitry talohany tiô irô sady nankadàla Izy, nivolagna hoe: “Arahaba, ry mpanjakan’ny Jiosy!” ³⁰ Nandrorandrô Izy, boaka iô nalaindrô tehigny iô avy iô nivilezindrô tamin’ny lohanany. ³¹ Izy kofa avy nankadala Izy irô, nangala ankanjo lavanany irô boaka iô nampitafiandrô Izy fitafiagnanany, boaka iô nindosindrô niboaka Izy andeha hofantsihandrô amin’ny hazo fijaliagna. ³² Izy kofa niboaka irô, nahita lelahy araiky avy any Syrena antsovigny hoe Simona, izay niterendrô hiaraka amindrô mba hampilanjaigny ny hazo fijaliagna. ³³ Nandeha tamin’ny toeragna antsovigny hoe: Golgota irô, izay midika hoe: “Toeragnan’ny karandroha.” ³⁴ Namiandrô divin mifangaro amin’ny afero Izy mba higiahigny. Fa izy kofa nagnandramanany izegny, dia tsy nigiaka Izy. ³⁵ Izy kofa nifantsehandrô tamin’ny hazo fijaliagna Izy, dia nataondrô loka ny fizaragna ny fitafiagnanany, ³⁶ boaka io, nipetraka irô nijanogno niambigny Izy. ³⁷ Tambonin’ny lohanany tiô nasiandrô soratra mivolagna anton’ny nagnadisoandrô Izy, izay mivaky hoe: “Ity Jesosy izegny, mpanjakandrô Jiosy.” ³⁸ Nisy mpangalatra lelahy aroe niaraka nifantsihagna taminany, araiky tankavanagnanany, araiky tankavianany tiô. ³⁹ Olo jiaby nandalo samy nagnambanimbany Izy sady nagnivingivindoha ⁴⁰ nivolagna hoe: “Anao izay nivolagna fa handravagna ny tempoly abôko hagnamboatra izy agnatin’ny telo andro, vonjè vatagnanao! Izy ko anao edy Zanakan-dRagnahary, mijotsoa avy amin’ny hazo fijaliagna egny!” ⁴¹ Karaha izegny koa irô lehiben’ny mpisorogno nankadala Izy niaraka tamindrô mpanora-dalàgna ndraiky irô lohologno, sady nivolagna hoe: ⁴² “Nagnavotro olo hafa Izy, kanefa tsy afaka nagnavotro vatagnanany. Izy no mpanjakan’Isiraely. Ambilà Izy hijotso avy amin’ny hazo fijaliagna, amin’izegny hino Izy atsika. ⁴³ Natoky an-dRagnahary Izy, ambilà dRagnahary hamonjy Izy niany, izy koa magneky hagnafaka Izy dRagnahary. Fa na Izy aby nivolagna hoe: “Zaha no Zanakan-dRagnahary.” ⁴⁴ Karaha izegny koa irô mpangalatra nifantsihagna niaraka taminany nivolagna fagnambanimbaniagna taminany koa. ⁴⁵ Nanomboko tamin’ny lera fahatsota, nandrakotro tany jiaby ny aizigny jiska tamin’ny lera fahasivy. ⁴⁶ Tamin’ny lera fahasivy, nihiaka tamin’ny feo mafy Jesosy nagnano hoe: “Elia, elia, lamà sabaktani?” izay midika hoe: “dRagnahary, dRagnahary nagnino Anao nahafoy Zaha?” ⁴⁷ Izy kofa regnin’ny olo sasany nitsangagna tiô raha zegny, nivolagna irô hoe: “Magnantso i Elia Izy.” ⁴⁸ Tiô fo nihazakazaka araiky tamindrô nandeha nalaka eponge, nandegny izy tamin’ny vinaigre, avy iô nataony tamin’ny kakazo bararata natohitohy abakô namiany Izy mba higiahiny. ⁴⁹ Sasany tamindrô nivolagna hoe: “Ambilà Izy. Hitantsika iô raha ho avy hamonjy Izy Elia.” ⁵⁰ Nihiaka tamin’ny feo mafy indraiky koa Jesosy avy iô nanolotro fagnahinany. ⁵¹ Indro, lamban’ny tempoly natrika aroe avy ambony jiska ambany, nangorohoro tany jiaby, vaky nisasaka ny vatolampy. ⁵² Nisokatra ny fasagna boaka iô, fatindrô olon-dRagnahary maro efa maty dia nampitsanganigny. ⁵³ Niboaka avy tampasagna tao irô tafaran’ny fitsanganandrô tamin’ny maty, niditry tamin’ny tanàgna masigny irô, ary niboaka tamin’ny olo maro. ⁵⁴ Irô kapiteny ndraiky irô nizaha Jesosy kofa nahita ny horohoron-tany ndraiky raha jiaby nitranga izegny niova navozo mafy sady nivolagna hoe: “Zanakan-dRagnahary marigny ity.” ⁵⁵ Nisy magnangy maro nagnaraka an’I Jesosy jiska tagny Galilia mba hikarakara Izy fa nizaha avy lavitry fo irô. ⁵⁶ Tagnatin’izegny Maria Magdalena, Maria renin’i Jakoba ndraiky Josefa, ndraiky renindrô zanakalahin’i Zebedio. ⁵⁷ Izy kofa hariva andra, nisy lelahy araiky manan-kariagna avy agny Armatia agny navy agnaragnanany Josefa, mpianatr’i Jesosy koa izy. ⁵⁸ Nagnatogno Pilato izy ary nangataka ny fatin’i Jesosy. Avy iô nibekon’i Pilato hamiagna izy izegny. ⁵⁹ Nangala faty iô Josefa, avy iô namogno Izy tamin’ny lamba rongony madio, ⁶⁰ boaka iô nampadreny tamin’ny fasagna vaovao Izy izay nolavahigny tamin’ny vatolampy. Avy iô nangala vato maventy hamodiagna tamiagnan’ny fasagna iô izy avy iô izy niboaka. ⁶¹ Maria Magdalena ndraiky Maria hafa koa tiô, nantotry tankilan’ny fasagna tiô. ⁶² Andrô magnaraka izegny, izay andro avafaran’ny Fagnomanagna, niara-niangogno tamin’i Pilato irô lehiben’ny mpisorogno ndreky fariseo aby irô. ⁶³ Nivolagna ireo hoe: “Tompoko, azonay honogno fa tamin’igny mpamitaka igny mbola velogno, nivolagna Izy hoe: “Avafaran’ny telo andra, hitsangagna indraiky koa Zaha.” ⁶⁴ Kay noho izegny, magniràha mba hambesagna ny fasagna jiska amin’ny andro fahatelo, izy koa tsy izegny, mety ho avy mpianatranany hangalatra Izy kay hivolagna amin’olo hoe: “Nitsangagna tamin’ny maty Izy, ary ho ratsy fitaka farany izegny noho ny araiky tamin’ny voalohany.” ⁶⁵ Nivolagna tamindrô Pilato hoe: “Mangalà mpiambigny mandihàna ary ambesà tsara araka izay vitanarô izegny.” ⁶⁶ Loso irô ary niambigny fasagna iô, nagnisy tombo-kase vato iô ary nametraka mpiambigny.