¹ Ary tamin'ny alignin'ny Sabata, tamin'ny mbola mangiran-dratsy tamin'ny andro voalohany tamin'ny herign'andra, loso nandeha nizaha fasagna tagny Maria Magdalena ndraiky Maria hafa. ² Indro, nisy horohoron-tany nafy, fotony ny anjelin'ny Tompo no nijotso navy avy tandangitry, navy ary nanokatra vato iô, ary nipetraka tamboniny tiô. ³ Endrikinany karaha tsinkelatra, ary ankanjonany fotsy karaha oram-panala. ⁴ Navozo mafy irô mpiambigny kay lavo karaha olo maty. ⁵ Nikoragna tamindrô magnangy irô anjely iô ary nivolagna tamin-drô hoe: "Aza mavozo, haiko fa mitady an'i Jesosy anarô, araiky nifantsihagna tamin'ny hazofijaliagna igny. ⁶ Tsy akato Izy, fa efa nitsangana, araka raha efa nivolagniny. Avia zahava ny toeragna nandrian'ny Tompo. ⁷ Mandehana malàky abako volagnanarô mpianatranany hoe: 'Nitsangagna tamin'ny maty Izy. Indro efa loso nialoha lalagna anarô agny Galilea agny Izy. Agny no hahitanarô Izy.' Indrô efa nivolagna taminarô Zaha." ⁸ Niala tamin’ny fasagna tiô nalaky tamin’ny fahavozoagna ndraiky tamin’ny hafaliagna be irô magnangy irô ary nihazakazaka andeha hivolagna amin’ny mpianatranany. ⁹ Indro, nitraotro tamindrô Jesosy sady nivolagna hoe: “Arahaba!” Nagnatogno magnangy irô ary nitagna vitinany ary nidera Izy. ¹⁰ Avy iô Jesosy nivolagna tamindrô hoe: “Aza mavozo. Mandihana mivolagna amindrô rahalahinakahy mba hiala ka handeha agny Galilia. Agny no hahitandrô Zaha.” ¹¹ Ary tamindrô magnangy aby mbola nandeha igny, indro sasany tamindrô mpiambigny nandeha tamin’ny tanàn-dehibe tagny ary nivolagna tamin’ny lohan’ny mpisorogno raha jiaby niseho. ¹² Izy kofa nitraotro namindrô lohologno mpisorogno iô ary nikoragna mikasiky olagna izegny tamindrô, nagnamia vola maro tamindrô miaramila niamby iô irô ¹³ sady nivolagna tamindrô hoe: “Volàgna amindrô olo hafa hoe: 'Tonga tamin’ny andro aligny irô mpianatr’i Jesosy sady nangalatra vatagnanany tamin’ny zahay mbola nandry.' ¹⁴ Izy koa tonga amin’ny Governora tatitry izegny, dia handresy lahatra izy atsika ary hagnadoso ny ahiahy aminarô.” ¹⁵ Avy iô, nalaindrô miaramila ny vola avy iô nagnano raha araka izay efa nivolagnigny tamindrô irô. Ary tatitry izegny niparitaka tamindrô Jiosy ary mitohy jiska amin’iziô ty. ¹⁶ Fa nandeha tagny Galilia tagny irô mpianatra araiky ambin’ny folo tagny amin’ny bongo izay efa nambaran’i Jesosy irô. ¹⁷ Izy kofa nahita Izy irô, dia nidera Izy fa sasany ndreky niahiahy. ¹⁸ Nagnatogno irô Jesosy kay nikoragna tamindrô sady nivolagna hoe: “Efa namiagna Zaha ny fahefagna jiaby agny andangitry ndraiky aty an-tany. ¹⁹ Kay mandihana ary ataova mpianatranakahy firenena jiaby. Ataova batisa irô amin’ny agnaran’ny Ray, ny Zanaka, ary ny Fagnahy Masina. ²⁰ Ampianara irô hankato raha jiaby nagnirahako anarô. Indro, miaraka aminarô fo Zaha, eny fa na jiska amin’ny fiafaran’ izao tontolo izao aby.”