¹ Koafa vitan'i Jesosy izegny volagna jiaby izegny, kay nivolagna tamindrô mpianatranany Izy hoe: ² "Haiko fa afaka roa andra zegny, ho havy ny Paska, avy iô hamiagna homboagna amin'ny hazofijaliagna ny Zanak'olo." ³ Irô lehiben'ny mpisorona ndraiky loholona niara-nivory tao amin'ny lapan'ny mpisorona-be, izay nikahiagna hoe Kaiafa. ⁴ Niara-nagnano tetika irô mba hisamboragna mangingigny i Jesosy andraiky hamono Azy. ⁵ Fa hoy iz'irô hoe: "Tsy amin'ny fety, mba tsy hisian'ny korontagna amin'ny olo." ⁶ I Jesosy ndraiky tao Betania tao an-tragnon'i Simona boka, ⁷ raha nipetraka nihinagna teo ambony latabatra, kay nisy magnagy araiky nanagna tavoangy alabastara feno mainaka lafo vidy nagnatogno Izy, kay nandraraka mainaka tamin'ny lohany. ⁸ Koa fa hitandrô mpianatrany izegny, niloko irô ka nivolagna hoe: "Ino ma anton'iô fandaniagna be iô ai? ⁹ Afaka nalafony tagny na namaizany mahantra tagny iz'iô." ¹⁰ Fa Jesosy, nahay izegny, nambarany tamindrô avy tiô: "Nagnino anarô no manahiran-tsaigny amin'ny magnangy iô? Raha tsara kony nataony tamiko. ¹¹ Eo aminarô mandrakariva irô mahantra, fa Izaho, tsy hidoko eo aminarô mandrakariva. ¹² Fa koafa nandraraka mainaka magnitra izegny izy tamin'ny vatako, nataony ho an'ny fandevenagna Zaho izegny. ¹³ Volagniko marigny aminarô, na ahia na ahia hipetrahagna filazantsara eto amin'izao tontolo izao zegny, ny raha nataon'ity magnangy ity zegny ho volagniny koa mba ho fahatsiarovagna azy." ¹⁴ Avy iô, araiky tamindrô roa ambinifolo, izay fikahiagna hoe Jodasy Iskariota, nankagny amin'ny lehiben'ny mpisaorogno ¹⁵ avy iô nagnano hoe: "Amianarô ohatrino zaho fa hamiako anarô Izy?" Nilanjaigny volafotsy madinika telopolo izy jiaby. ¹⁶ Tamin'izegny fotoagna izegny, nitady fahafahagna izy baika hagnamaizany Izy irô. ¹⁷ Tamin'ny andro voalohan'ny mofo tsy misy lalivay, nagnatogno Jesosy irô mpianatra kay nivolagna karaty: "Ahia ny tianao hagnomagnanay ho anao hihinagna ndraiky sakafon'ny Paska?" ¹⁸ Namaly Izy hoe: "Midira ao an-tanàna misy lelahy araiky, baka iô volagna izy hoe: "Efa akaiky fotoagnako. Ato an-tragnonao Zaho hagnano Paska miaraka amindrô mpianatro."" ¹⁹ Nataondrô mpianatra araka izay nagniran'i Jesosy izegny, avy iô nagnomagna sakafon'ny paska irô. ²⁰ Koafa ariva, nipaitraka nihinagna niaraka tamin'ny mpianatra roa ambin'ny folo Izy. ²¹ Koafa nihinagna irô zegny, hoizy nivolagna tamindrô: "Volagniko marigny aminarô fa hisy araiky aminarô hamadika Zaho." ²² Nalahelo irô nanomboka tiô, nagnontany Izy ny tsiaraikiaraiky hoe: "Tsy ho izaho agnano izegny, ry Tompo?" ²³ Namaly Izy hoe: "Izay niaraka nagnatsoboka tagnany tamiko tao agnatiny kapila, zegny ilay araiky hamadika Zaho. ²⁴ Handaiha ny Zanak'Ologno, araka izay efa voasaoratra momba Azy. Nèfa lozan'ny olo izay hamadika ny Zanak'Ologno! Tsara kokoa hoany olo izegny tsy teraka akory." ²⁵ Jodasy, izay hamadika Izy nivolagna hoe: "Kay zaho zegny lay izy, Raby o? Hoy Izy namaly hoe: "Voalazanao." ²⁶ Raha mbola nihinagna irô, naka mofo Jesosy, nisaotra, avy iô nanapaka izegny. Namiany irô mpianatranany avy iô Izy nivolagna tamindrô: "Alaivo, hoana. Ity no vatako." ²⁷ Nangala kapoaka Izy avy iô nigiaka, ndraiky nagnamia izegny irô kay nivolagna karaty: "Anarô jiaby, igiaha ity. ²⁸ Fa ity ny lion'ny fagnekem-pihavanagna arotsaka ho an-ny maro ho famelan-keloka. ²⁹ Volagniko aminarô, fa tsy mba higiaka vokatry ny voaloboka eky Zaho, mandra-pihavin'ny figiagna vaovao hiarahako aminarô agny amin'ny fanjakan'ny Babako." ³⁰ Koafa nihira hira fideragna irô zegny, nandeha tagny amin'ny bongon'i Oliva. ³¹ Avy iô, hoy Jesosy tamindrô hoe: "Anarô jiaby zegny hiala Zaho nohon'ny amiko amiziô alignity, fa voasaoratra hoe: 'Hamely mpimbigny odrikodrika Zaho ka hiparitaka irô odrikodrika.' ³² Fa ka afaran'ny fitsanganako amin'ny maty ndraiky hialoha lalagna anarô agny Galilia." ³³ Fa i Petera nagnano taminy hoe: "Na hiala anao nohon'ny aminao aza ny olo jiaby, fa zaho tsy mba hiala anao na karakory." ³⁴ Hoy Jesosy taminy hoe: "Volagniko marigny aminao, fa iniany aligny raha mbola tsy magnaina akoho, anao efa handà Zaho intelo." ³⁵ Petera nivolagna taminy hoe: "Na ho faty miaraka aminao aza zaho, zaho tsy handà anao zegny." Kara izegny koa nambarandrô mpianatra hafa. ³⁶ Fa Jesosy nandaiha niaraka tamindrô nakagny amin'ny toeragna kahiagna hoe Getsemane avy iô nivolagna tamin'ny mpianatranany hoe: "Mipetraha eto anarô fa Zaho mbola handeha hivavaka ary." ³⁷ Nindesiny ery Petera ndraiky zanak'i Zebedio aroa lahy avy iô nanomboka nalahelo sady nampahinakinaka. ³⁸ Avy iô hoy Izy tamindrô hoe: "Fadiranovagna ny fagnahiko, kara efo ho faty. Mipetraha eto baka iô mihambena miaraka amiko. ³⁹ Niataka kely Izy, niankohoka baka iô kay nivavaka. Hoy Izy hoe: "Babakoo, raha azo atao kony, mba adosoà amiko ity kapoaka ity. Nèfa, aoka tsy araky ny sitrapoko atao fa ny sitraponao." ⁴⁰ Nagnatogn'irô mpianatranany Izy, hitany irô resin-tory, ka hoy Izy tamin'i Petera karaty: "Anarô tsy mahavita miambigny miaraka amiko na l'heura araiky fo? ⁴¹ Miambena baka iô mivavaha baika tsy ho azon'ny fakam-pagnahy anarô. Fagnahy narô mety fo, fa nôfotronarô malaigny." ⁴² Mbola nandaiha fanindroany Izy sady nivavaka. Hoy Izy hoe: "Babakoo, raha ohatra ka tsy azo adoso amiko ity raha tsy migiaka Zaho, zegny ho atao anie ny sitraponao." ⁴³ Nipody indraiky Izy sady mbola nahita irô nandry, fa navesatra masondrô. ⁴⁴ Ka niala tamindrô teo ndraiky Izy, loso nandaiha nivavaka ampagnitelony, nivolagna irô volagna irô fo Izy. ⁴⁵ Avy iô Jesosy nagnatogno irôo mpianatra ka nivolagna tamindrô hoe: "Mbola mandry ndraiky miala sasatra ma anarô? Zahà, efa marikitry l'heura sady ny Zanak'Olo, hamihagna eo an-tanandrô mpanota. ⁴⁶ Mitsangàna, andaiha atsika. Zahà, efa marikitry ilay hamadika zaho." ⁴⁷ Raha mbola nivolagna fo Izy, navy Jodasy, araiky tamindrô aroa ambin'ny folo. Nisy vahoaka maro navy niaraka taminy avy amin'ny lehiben'ny mpisorogno ndraiky irô loholono. Navy niaraka tamin'ny meso ndraika saboa irô. ⁴⁸ Avy iô nagnamia famantaragna tamindrô lehilahy hamadik'i Jesosy, magnao hoe: "Izay horofako, no Izy. Sambaora Izy." ⁴⁹ Teo no eo fo nagnatogno Jesosy izy avy iô izy nivolagna hoe: "Finaritra, Raby!" Baka iô nirofiny Izy. ⁵⁰ Hoiz'i Jesosy hoe: "Ry sakaiza, ataovy izay nalehanao eto." Avy iô, navy irô naninjitra tagnana tamin'i Jesosy, sady nanambotra Azy. ⁵¹ Indrioo, araiky tamindrô niaraka tamin'i Jesosy naninjitra tagnany, nagnatsoaka meso, nimira mpiasan'ny mpisoronabe, ndraiky nahafaka sofigninany. ⁵² Avy iô, hoiz'i Jesosy taminy: "Ambodiana amin'ny plasiny ny mesona, fa irô izay miady amin'ny meso fo ho matiny meso koa. ⁵³ Anarô ma mieritreritra fa Zaho tsy afaka mikaiky Babako? Sady Izy afaka mandaifa tafik'anjely mihoatra lavitry noho aminarô arao ambin'ny folo. ⁵⁴ Fa atao karakory zegny no hahatanteraka ny Soratra Masigny, izay mivolagna fa tsy maintsy hisy iraha aby izegny?" ⁵⁵ Tamin'izegny andro izegny Jesosy nagnabara tamin'ny vahoaka karaty: "Anarô navy tamin'ny meso ndraiky saboa andaiha hanaboranarô Zaho, kara hisambotra dahalo iregny? Isan'andro Zaho hitanarô nipetraka nampianatra teo amin'ny tempoly, nèfa tsy nosamborinarô. ⁵⁶ Fa iraha jiaby izegny, hitranga satria mba hahatanteraka izay voasoratr'irô mpaminany."Sady niala Izy irô mpianatranany jiaby ka nilaifa. ⁵⁷ Nindesindrô mpisambotra tagny amin'i Kaiafa mpisoronabe Jesosy, izay nivoriandrô mpanora-dalàgna ndraiky loholona. ⁵⁸ Fa Petera nagnaraka Izy baka lavitra nandaiha amin'ny kianjan'ny mpisoronabe. Niditra tao agnatiny izy avy iô nipetraka niaraka tamindrô mpiandry raharaha baika hahita izay hiafarany. ⁵⁹ Irô lehiben'ny mpisorogno ndraiky irô Synedriona jiaby zegny nitady fiampangana tsy marigny manohitra Jesosy, baika ahafahandrô mamono Izy. ⁶⁰ Tsy nahita na plans zegny irô na efa nisy mpijoro vavolombelogno maro tsy marigny irô teo. ⁶¹ Vetivety tiô nisy aroa navy nagnatogno teo sady nivolagna hoe: "Io lelahy iô nivolagna hoe: 'Afaka mandrava ny Tempolin-dRagnahary Zaho sady manangagna izegny koa afaka telo andra."' ⁶² Nitsangagna mpisoronabe ka nivolagna taminy karaty: "Tsy manan-kavaly ma Anao? Ino zegny hiampangandrô Anao izegny?" ⁶³ Fa nangigny Jesosy. Hoizy mpisoronabe taminy: "Magniraka Anao amin'ny alalandRagnahary velogno zaho, mba ambaraozay raha Anao zegny i Kristy Zanaka Zagnahary zegny." ⁶⁴ Jesosy namaly izy hoe: "Voalazanao. Fa ambarako aminarô, manomboka iz'iô, ho hitanarô ny Zanak'olo hipetraka eo an-tagnana ankavagnan'ny Hery, sady hoavy eo amin'ny rahon'ny lagnitra." ⁶⁵ Baka iô, mpisoronabe nagnatsiaka ankanjony sady nivolagna karaty: "Nagnasaha Izy! Nagnino atsika mbala mijoro vavolombelogno? Indrioo, regninarô volagna ratsy izegny. ⁶⁶ Kay ino hevitrinarô? Nambarandrô avy tiô: "Mendrika ho vonegna Izy." ⁶⁷ Baka iô, irô nandraora tamin'ny saorany ndraiky namopoko Azy, sady namely koboay Azy, ⁶⁸ avy iô nagnano hoe: "Maminanià aminay, ry Kristy. Azôvy no namely Anao?" ⁶⁹ Fa i Petera nipetraka atan'ny kianja, avy iô nisy mpanompo vavy navy nagnatogno izy nivolagna hoe: "Anao koa mba agnisany niaraka tamin'i Jesosin'ny Galilia." ⁷⁰ Fa izy nifamatra teo aloandrô tiô nivolagna hoe: "Tsy haiko raha volagninao zegny." ⁷¹ Koa fa niboaka varavaragna izy, nisy magnangy mpiasa hafa nahita izy nivolagna tamindrô tiô: "Ity lelahy ity koa mba naman'i Jesosy niaraka baka tagny Nazareta." ⁷² Mbola nifamatra fo izy sady mbala nasiany hadrohadro karaty: "Zaho tsy mahay i Lelahy izegny fekiny!" ⁷³ Vetivety tiô zegny nagnatogno irô izay nitsangagna irô, nambarandrô tamin'i Petera hoe: "Anao zalah agnisany naman'amindrô ignee!" ⁷⁴ Baka iô izy nanomboka nagnozogno sady kinia nagnambara hoe: "Tsy haiko zalah lelahy izegny ee." Tiô ny iô zegny, nagnaina akoho. ⁷⁵ Tsaroan'i Petera volagna nambaran'i Jesosy karaty: "Akoho mbala tsy magnaina, anao handà Zaho intelo." Baka iô izy niboaka sady nitomoagny mare.