¹ Bakô Jesosy nivôlagna tamin'ndrô vahoaka ndraiky irô mpianatranany. ² Hoy izy hoe: "Irô mpanoro-dalàgna ndraiky fariseo mipètraka amin'ny fitoèragnan'i Mosesy iô.' ³ Dikany zegny na ino na ino handidian-drô anarô ho atao, ataova raha zegny bakô Mitandraima amin-drô. Fa aza mangalataka asan-drô, fôtony irô mivolagna raha nèfa aviô tsy ataon-drô. ⁴ Ia, fihezin-drô entagna mavèsatra zegny sarotro andesigny, bakô aviô apètrakan-drô amin'ny sôrokon'olo iô. Fa tsy nagnaintagna ratsan-tagnana araiky aby irô fa tègnan-drô fo hitöndra irô. ⁵ Magnano asan-drô jiaby irô baka ho hitan'olo. Fa ataon-drô malalaka fyilataterany, bakô itarin-drô tendron'akanjony. ⁶ Tian-drô toèragnany manan-kaja agny amin'ny fagnasagna ndraiky toèragna ndrô maventy amin'ny synagoga, ⁷ ndraiky fiarahabagna miavaka agny an-tsaina, bakô hikaïn'olo hoe: 'Raby.' ⁸ Fa anarô tsy azo ikaïagna hoe: 'Raby', fa araiky fo mpampianatranarô, bakô ampiralahy anarô jiaby. ⁹ Bakakô ka aza mikaiky olo an-tany aty babanarô fa araiky fo Babanarô, Izy an-dagnitry agny. ¹⁰ Bakô anarô aza mety kaïn'olo hoe: 'Mpampianatra,' fa araiky fo mpampianatranarô, I Kristy. ¹¹ Fa zegny ti-ho be aminarô ndrô ho mpanomponarô. ¹² Na azôvy na azôvy manandra-tègna ahegny, bakô na azôvy na azôvy manètry tègna hasandratra. ¹³ Fa lagigny aminarô, mpanora-dalàgna ndraiky fariseo, mpihatsaralatsihy! Fa afodinarô amin'ny olo fanjakagnan'ny langitry, arô fa tsy ampidriky tègnanarô, Kay mitady tsy agnambèla irô hidriky koa. ¹⁴ [Fanamarihagna: Ny antotan-taratasy taloha tsy ahitagna fehezanteny hoe: 'Fa lagigny aminarô, mpanora-dalàgna ndraiky fariseo, mpihatsaralatsihy! Fa mankasitraka tragnony mitöndra tègna, bakô magnano vavaka lavareny anarô. Dikany zegny hahazo sazy maventy anarô.'] ¹⁵ Lagigny aminarô, mpanora-dalàgna ndraiky fariseo, mpihatsaralatsihy! Fa mandèha mitety ranomasigny ndraiky tany anarô mba hampiöva olo araiky, bakô izy koa fa miöva izy, ataonarô Zanaka môtro mihoatra lavitra fôtony baka aminarô izy. ¹⁶ Lagigny aminarô, mpitariky gila, anarô mivolagna hoe: 'Na azôvy na azôvy mifanta amin'ny tempoly Tsisy dikany zegny. Fa na azôvy na azôvy mifanta amin'ny volamenan'ny tempoly, voafehin'ny fiainagna izy.' ¹⁷ Anarô gila adala! Azôvy ka ndrô maventy ka,volamena sa tempoly arô magnano volamena ho masigny? ¹⁸ Bakô, 'Na azôvy na azôvy mifanta amin'ny alitara, Tsisy dikany zegny. Fa na azôvy na azôvy mifanta amin'ny fanatitry agnambony zegny, voafehin'ny fifantany izy.' ¹⁹ Arô olo gila! azôvy ka ndrô be ka, fanatitry sa alitara agnanaöva fanatitry ho masigny? ²⁰ Dikany zegny, zegny mifanta amin'ny alitara, kay mifanta amin'izegny ndraiky amin'ny raha agnambony iô. ²¹ Araiky mifànta amin'ny tempoly, mifànta amin'izegny ndraiky amin'izegny monigny Aminany ao, ²² ndraiky zegny mifànta amin'ny langitry, mifànta amin'ny seza fiandrianan-dRagnahary ndraiky Aminany zegny mipètraka agnambony zegny iô. ²³ Lagigny aminarô, mpanora-dalàgna ndraiky fariseo, Mpiatsaravelatsihy! Fa mandoa fahafolon'ny solila ndraiky aneta bakô komina anarô, fa anarô tsy nagneky raharaha mavèsa-danja indrindra amin'ny lalàna, rariny ndraiky famindra-pô bakô finoagna. Fa tôkony ataonarô regny bakô tsy tôkony nambelanarô tsy ho vita araiky hafa. ²⁴ Arô mpitarika gila, arô zegny manivagna lalitry nèfa ramèva! ²⁵ Lagigny aminarô, mpanora-dalàgna ndraiky fariseo, Mpiatsaravelatsihy! Fa nidiovinarô ambèlan'ny kapoaka ndraiky kapila, nèfa agnatiny ao feno fagniriagna ndraiky filàgna. ²⁶ Anarô ry fariseo gila! Diova antsendriky agnatiny kapoaka ao ndraiky kapila, mba ho rôso madio koa ambèlany. ²⁷ Lagigny aminarô, mpanora-dalàgna ndraiky fariseo, mpiatsaravelatsihy! Fa anarô Kara fasagna pindre fotsy; tsara ambèlany, fa agnatiny ao feno taolam-paty ndraiky loto jiaby. ²⁸ Kara zegny koa, aty ivèlanarô miseho ho marigny amin'olo iô, nèfa agnatinarô ao feno fihatsaram-bèlatsihy ndraiky heloko. ²⁹ Lagigny aminarô, mpanora-dalàgna ndraiky fariseo, Mpiatsaravelatsihy! Fa magnôrigny fasagna mpaminany anarô bakô mampihaingo fsagnan'olo marigny. ³⁰ Hoy anarô hoe: 'Izy koa nihaigny taminy andran'ny razam-betsika atsika, tsy ho nandray anjara niaraka tamin'ndrô tamin'ny fandatsahagna ràn'ny mpaminany atsika.' ³¹ Dikany zegny mijoro vavolombelogno amin'ny tègnanarô anarô fa zanakan-drô zegny namono mpaminany. ³² Anarô fo koa nahafeno fahotagnan-drô razam-benarô. ³³ Anarô ry bibilava, anarô ry taranaka mènarana, karakory hilifasanarô sazy andeha amin'ny motro? ³⁴ Dikany zegny,indriô, magniraka mpaminany ndraiky olon-kendry bakô mpanora-dalàgna ho anarô Za. Ny sasany amin-drô hi-vonenarô ndraiky hombonarô; bakô sasany hipoponarô amin'ny synagoganarô ao bakakô ka handroaka izy hiala ao an-tanàna. ³⁵ Vokatra zegny hanody anarô ny rà marigny jiaby zegny nalatsaka teto an-tany, nanomboko tamin'ny ràn'i Abèla marigny, ziska amin'ny ràn'i Zakaria zanak'i Barakia, zegny novonenarô agnèlan-kèlany toèragna masigny tiô ndraiky Alitara. ³⁶ Ambarako aminarô marigny, fa zaka jiaby ho avy amin'ny taranaka ity. ³⁷ Ry Jerosalema, ry Jerosalema, anao zay mamono mpaminany ndraiky mitora-bato zay nirahiny taminarô! Impiry ma za ndrô magnìry hamory zanakanarô miaraka, Kara akôho vavy araiky mamory akôho hely ambany èlatrany ao, nèfa tsy mety anarô! ³⁸ Indriô, tragnonarô ambèla ho anarô. ³⁹ Fa ambarako aminarô, ziska amin'iziô, tsy hahita Za eky anarô mandra- pivolagnanarô hoe: 'Isaoragna anie zegny baka amin'ny agnaran'ny Tômpo.'''