¹ Androany reo ze tanora noho zaho dra sy mana ndre ino ndre ino laha-sy fanesoa ho anahy---dra reo tovolahy ze sy nengako hiasa eio agnilan'gny amboan'gny biby fitezako gny ran'ereo. ² Eka vatany, gny herin'gny tagnan'ireo rany, akory gny nahafahan'izay nagnapy anahy---reo lelahy ze foa gny herin'gny taon'gny fahamatoran'ereo? ³ Nahia nohon'gny fahantra vo gny haresea ereo; nihina tamin'gny tany maiky agnaty ezin'gny tany efisy sady rava ereo. ⁴ Nioty simon-kazo mafaisy vo ravin-boaroy ereo; gny fakan'gny anhavidy gny sakafon'ereo. ⁵ Niroahy sy ho eo amin'gny olo ze nanakora andreo manahaky gny fanakoran'gny olo raiky gny pangalasy ereo. ⁶ Dra sy mainsy nitoboky tagny an-dohasahan-driaky ereo, tao an-davaky gny tany vo gny vatolapy ⁷ Nagneno manahaky gny ampondra teo amin'ireo voaroy ereo; dra tao ambanin'ireo voaroy gny niarahan'ereo nivory. ⁸ Zanaky mola ereo, eka vatany, zanak'olo sy manan-kaza ereo! Niroahy hiala tamin'gny tany tamin'gny karavasy ereo. ⁹ Fa androany, lasa hira fagnesoa ho an'ireo zanany zaho; eka vatany, lasa fihomeheza ho andre androany. ¹⁰ Malay anahy sady mizoro lavisy anahy ereo; dra sy mizano gny mandrora gny tarehiko. ¹¹ Fa Zagnahary namaha gny taly tamin'gny sipikako sady napahory anahy, vo ereo ze magnarasy anahy dra nagnary gny fanereny teo agnatrehan'gny tarehiko. ¹² Eo amin'gny tagna an-kavagnako gny hisanganan'gny androvolahy; mandroaky anahy ereo say manao dongon-tany hanao fahirano anahy. ¹³ Rovan'ereo gny lalako; atosik'ereo ho eo aminahy gny loza, dra reo lelahy ze sy misy ndre iza ndre iza hita andreo. ¹⁴ Avy hanohisy anahy manahaky gny tafiky lat'amin'gny lavaky lahibe raiky eo amin'gny fefin'gny tana ereo; eo agnivon'gny faharipaha gny agnakendan'ereo anahy. ¹⁵ MItoliky aminahy gny fapihorohoro; nisofy manahaky gny andesin'gny sioky gny voninahiso; levo manahaky gny raho gny fagnazako. ¹⁶ Amizao dra miboaky boak'ao agnatiko gny aiko; andrim-pizalia maro gny nita anahy. ¹⁷ Voatrobaky gny tolako ato agnatiko amin'gny hariva; sy mizano reo fararia ze mihatra aminahy. ¹⁸ Nangalaky gny fitafiako gny herin'Agnahary lahibe; magnodidy anahy manahaky gny vozon'gny akazoko zay. ¹⁹ Nagnary anahy tao agnaty fotaky izy; nazay manahaky gny botany vo lavenoky zaho. ²⁰ Mitaray aminiha zaho, ry Zagnahary, fa sy mamaly anahy Hanao; misanga zaho, fa magnety anahy avo Hanao. ²¹ Niova Hanao sady nazary lozabe taminahy; amin'gny herin'gny tagnanao gny hagnitrifaniha anahy. ²² MAnondrosy anahy eo amin'gny sioky Hanao dra mapinday anazy anahy; mapirerireru anahy agnaty tafio-drivosy Hanao. ²³ Fa fatako fa hinday anahy ho amin'gny fahafatesa Hanao, ho amin'gny tragno ze voalahasy ho an'gny raha-managn'ay aby. ²⁴ Ndre zay aza, sa ra sy misy ndre ia ndre ia maninzisy gny tagnany hitalaho famonze nofa lavo izy? Sa ra sy misy olo mana olo ka mitoka vonzy? ²⁵ Sy nitomagny ho an'ize tra-pahoria ra zaho? Sady sy nalahelo gny olo ory ra zaho? ²⁶ Nofa nikasaky gny soa zaho, dra gny rasy gny avy; nofa niamby gny hazava zaho, dra gnyezy ndraiky gny avy. ²⁷ Ory gny foko sady sy manam-pizanogna; avy taminahy reo andron'gny fahoria. ²⁸ Fa nandehandeha manahaky gny olo ze nitoboky tao agnaty ezy zaho, fa sy nohon'gny masoandro; mizoro ao amin'gny fiangona zahodra mihiaky famonze. ²⁹ Rahalahin'ireo amboadia zaho, naman'ireo ostritsa. ³⁰ Mainty gny holihiko sady miendaky aminahy; oroan'gny hafana gny tolako. ³¹ Noho zay dra mifagnaraky amin'gny hira fandala gny lokangako, vo gny sodiko ho an'gny hiran'ireo ze mitomagny.