¹ nanohy nizaka Joba dra nanao ho: ² "Eh, no mbo manahaky gny tamin'iegny vola lasa tamy nikarakaran'Agnahary anahy regny moa zaho, ³ tamy namirapirasy teo an-dohako gny zirony, vo tamy namakivaki gny ezy tamin'gny fahazavany zaho. ⁴ Eh, no mbo manahaky gny tamin'gny andron'gny fatoizako tamy gny fisakezan'Agnahary tao am-pasangeko regny moa zaho; ⁵ tamy mbo nindray taminahy gny Tsitoha, vo mbo nagnodidy anahy reo zanako, ⁶ tamy voarakosy ronono gny lalako, vo gny vatolapy nandrosaky rian-dililo ho anahy! ⁷ No niboaky gny vavahadin'gny tana zaho, no nitoboku tamin'gny toerako teo an-kianzan'gny tana zaho, ⁸ dra nahita anahy dra nizano lavisy anahy tamim-pagnaza reo tovolahy, vo gny olo antisy nisanga dra nizoro ho anahy. ⁹ Nizano sy nizaka gny andriandahy nofa avy zaho; nitapy gny vavany tamin'gny tagnany ereo. ¹⁰ Niegny gny feon'ireo olo-manan-kaza, dra nirekisy teo amin'gny lagnilagniny gny lelan'ereo. ¹¹ Fa nofa avy nahare anahy gny sofiny, dra niso-drano anahy ereo; nofa avy nahita anahy gny masony, dra nizoro vavolombelo ho anahy sady nagneky anahy ereo ¹² akory nagnavosy gny olo ze nahantra izaho nofa nitaray ereo, vo gny olo ze kamboty ra nofa sy mnana ndre iza ndre iza hagnapy anazy izy. ¹³ Gny so-dranon'ize fa ho faty dra avy taminahy; nahavy gny fon'ireo pinday vata hiira fifalia zaho. ¹⁴ MItafy fahamarigna zaho, sady napitafy anahy anizay; gny fahamarigna dra manahaky gny akazo lava vo satroky. ¹⁵ Maso ho an'ireo olo poaky zaho; tomboky ho an'ereo olo malemy zaho. ¹⁶ Ra ho an'ireo olo ory zaho; nandiniky gny aly ndre dra gny an'gny olo ze sy fatako aza. ¹⁷ Nanorotoro gny valagnoran'gny olo sy mary zaho; nagnombosy gny azon-draha lateo amin'gny nifiny zao. ¹⁸ Dra ho zaho ho: 'Ho faty ao amin'gny akaniko zaho; hapitombo reo androko manahaky gny vovom-pasiky zaho. ¹⁹ Misandahaky eo amin'gny rano reo fakako, vo gny ando nitoesy teo amin'ireo ransako gny hariva totolo. ²⁰ Gny voninahisy aminahy ao dra vaovao lalandava, vo gny sipikin'gny heriko dra vaovao lalandava eo an-tagnako. ²¹ Niteno anahy reo olo; niamby anahy ereo; nisigny so hiteno gny toro-heviso ereo. ²² Nofa vita gny zakako, dra sy niaka sasy ereo; nitete manahaky gny rano teo amin'ereo gny zakako. ²³ Niamby anahy lalandava manahaky gny niamby ora ereo; napisagnasagna gny vavany ereo so hino gny zakako, manahaky ze hahin'ereo amin'gny fara-ora. ²⁴ Nihomehy tamin'ereo zho nofa sy nagnapo anizay ereo; sy mbo nanda gny fahazavan'gny tarehiko ereo. ²⁵ Nifily gny lalan'ereo zaho dra nitoboky ho lahibeny; niay manahaky gny pazaka omban'gny tafiny zaho, manahaky gny olo ze mapiegny reo pandala.