¹ Azo atoky fa misy toeram-pitrandraha volafosy, toera zay fagnadiovan'ereo volamena. ² Gny vy dra nalay lat'amin'gny tany; gny saba dra misoniky miala lat'amin'gny vato. ³ Mapisava gny ezy olo ka mikaroky, hatragny amin'gny fetra lavisy be, gny vato agny agnaty ezy vo ezim-be. ⁴ Mihaly lavaky miala gny toera honegnan'gny olo izy, toera ze fa halignon'gny olo. Misampy lavisy gny olo izy; misingeva eho vo eroho izy. ⁵ No gny amin'gny tany, ze iboahan'gny mofo, dra mivaliky ao ambany manahaky gny tamin'gny alalan'gny afo zay. ⁶ Gny vaton'izay gny toera ahita reo safira, dra gny bony dra misy volmena. ⁷ Sy misy voro pihaza mahafatasy gny lala magnao, na gny mason'gny voromahery ka mahita anizay. ⁸ sy nisy bibidia natazaky ka nandia gny lala manahaky anizay, na liona ka nandalo teo. ⁹ Gny olo dra mametraky gny tagnany eo ambony vato karangana; avaliky hatragny amin'gny vahany gny tendrombohisy. ¹⁰ Manapaky fasona eo amin'ireo vatolapy izy; mahita gny raha sarobidy aby ao gny masony. ¹¹ Manensy gny riaky so sy hikoria izy; ze mivony ao amin'izeho dra haboakiny ho amin'gny mazava. ¹² Eza gny hahita gny fahendre? Eza gny toeran'gny fahazavan-say? ¹³ Gny olo dra sy mahafatasy gny viliny; dra sy hita eo amin'gny tanin'gny velo zay. ¹⁴ Gny rano lalaiky ambanin'gny tany manao ho: 'Sy aminahy ato zay'; gny ranomasy manao ho: 'Sy aminahy atiky zay.' ¹⁵ Sy azom-bolamena zay; ndre gny volafosy aza sy azo lanzay ho viliny. ¹⁶ Sy mahatomba anazy gny volamenan'i Ofira, mbamin'gny beryla sarobidy na safira. ¹⁷ Gny volamena vo gny vato krystaly dra sy azao apitaha amin'gny lanzany; dra sy afaky atakalo amin'gny firavaky gny volamena voalio zay. ¹⁸ Sy ho zaka se gny lanzan'gny haran-dranomasy na gny jaspy; eka vatany, gny vilin'gny fahendre dra mihoasy noho gny ruby. ¹⁹ Gny topazan'i Etiopia dra sy mifapitaha aminazy; na gny tena volamena aza sy afaky sandaina amin'izay. ²⁰ Dra bok'eza se, gny hiavian'gny fahendre? ²¹ Eza gny toeran'gny fahazavan-say? Gny fahendre dra mivony amin'gny mason'gny raha managn'ay aby vo avony an'ieo voron'gny habakabaky. ²² Gny Faharava vo Fahafatesa dra mizaka ho: 'Resaky avo gny ren'gny sofinay amin'izay.' ²³ Zagnahary mahay gny lala magnagny; fatany gny toeran'izay. ²⁴ Akory Izy magnety hatrany amin'gny fara-vazan-tany dra mahita gny ambanin'gny lagnisy aby. ²⁵ Nanao gny herin'gny rivosy Izy sady namasisy gny rano araky gny refiny. ²⁶ Nanao lily ho an'gny ora Izy vo lalana ho an'gny selasiy gny kotrok'ora. ²⁷ Dra nahita gny fahendre IZy dra nagnambara anizay; nametraky anizay Izy, eka vatany, nandiniky anizay Izy. ²⁸ Ho Izy tamin'gny olo ho: 'Ingo, gny fahatahora gny Tompo---zay gny fahendre; gny fiala amin'gny rasy gny fahazavan-say."'