¹ Ingo, Tompo Yaveh tompon'gny maro dra fa piandraikisy vo vasy amin'i Jerosalema vo Joda: dra gny famasia-mofo aby, vo gny famasian-drano aby; ² gny lelahy mahery, gny pialy, gny pisara, gny paminany, gny pamaky fambara, gny loholo; ³ gny kapitenin'gny dimapolo, gny ponina mana-kaza, gny panolo-say, gny panao asa-tagna za-draharaha, vo gny pimasy knga. ⁴ " Zatovo avo gny hapetrako ho pitariky andreo, vo reo tanora gny hanapaku eo amin'ereo. ⁵ Hapahory gny vahoaky, gny kiraikiraiky apahorin'gny hafa, vo gny kiraikiraikyapahorin'gny namany; gny zaza gny hagnaraby gny zokiolo, vo hihandy reo magneva haza rwo nambania. ⁶ Hangalaky gny rahalahiny ao an-tragnon-drany mihisy aza gny olo raiky dra hizaka ho: ' Mana akazo hanao; meteza ho panapaky anay, dra aoky zao faharava zao ho eo an-tagnanao.' ⁷ Amin'izay andro zay dra hitabataba izy dra hizaka ho: 'Sy ho pagnasitra zaho; sy mana-mofo zaho na akazo. Sy hanao annahy panapaky gny vahoakinao hanao." ⁸ Fa lavo Jerosalema, vo nilavo i Joda akory manohisy an'iYaveh gny fizakany vo gny asany, mihansy gny mason'gny voninahisinyu. ⁹ Gny fagnitian'gny tarehiny dra vavolombelo miapanga andreo; dra ambaran'ereo manahaky an'i Sodoma gny fahotany; sy mbo hhavoniny zay. Loza ho anazy regny! Fa nahatateraky loza be ho andreo avo izy. ¹⁰ Zakaogny olo-mary fa sy hagnino, fa hihina gny vokasy gny asany ereo. ¹¹ Loza ho an'gny rasy fagnahy! Fa ho rasy gny hahazo anazy, fa gny valin'gny asan'gny tagnany gny hahy aminazy. ¹² Ry oloko--akizy gny papahory andreo, vo apela gny manzaka eo aminazy. Ry oloko, rep ze mitariky andrareo dra mamipivio lala andrareo sady mapisafotofoto lala-kandehanandrareo. ¹³ Misanga nohon'gny fiapanga Yaveh, misanga hiapanga gny olo Izy. ¹⁴ Ho avy amin'gny fisara hanohisy reo loholon'gny olony vo reo pitarikiny Izy ho: " Namotiky gny tamim-boaloboky handrareo; ao an-tragnondrareo ze voaroba aby tamin'gny mahatra. ¹⁵ Nagnino handrareo gny manorotoro gny oloko sady manosiosy gny tarehin'gny mahatra?" Zay gny fagnambaran'i Tompo Yaveh tompon'gny maro. ¹⁶ Zay gny zakan'i Yaveh akory mirehareha gny zanaky apelan'i Ziona, mandeha amin'gny loha mihesikesiky, sady mangariky amin'gny masony, mikatrapokatrapoky am-pandrehana no mapikorisakorisaky amin'gny tombony, ¹⁷ noho zay dra hapisy arety manakom-pery eo an-dohan'gny zanaky apelan'i Ziona gny Tompo, dra hahin'i Yaveh sola ereo. ¹⁸ Amin'izay andro zay dra hangalaky reo firavaky gny ranzo soa tarehiny, reo fehilohany, reo fihaingoa sari-vola, ¹⁹ reo kavi, reo rozontagna, vo reo voaly; ²⁰ reo saron-doha, reo rozon-kitro, reo fehin-troky, vo reo vata fasia ranomagnisy, vo reo ravaky manday vinta gny Tompo. ²¹ Ho alany reo perasy vo reo kavin'oro; ²² reo akazo lava fanaova lanogna, reo kapoty, reo voaly, reo perasy keliky; ²³ reo fitarasy keliky, reo atin'akazo rongony fosy maliniky, reo hengon-doha, vo reo firakofa. ²⁴ Hamemboa gny ho solon'gny ranomagnisy mamerovero; vo taly gny ho solon'gny fehin-troky; loha sola gny ho solon'gny soa-hogo; vo lamba fandala gny ho solon'gny akazo lava; vo fitomboky mahama ho solon'gny hasoa. ²⁵ Ho lavon'amesa gny lelahindrareo, sady ho lagny agn'aly gny lelahy maherindrareo. ²⁶ Hitomagny gny vavahadin'i Jerosalema ka handala; dra ho reriky izy sady hidaraboky amin'gny tany.