¹ Zeho gny zakan'gny Tompo Yaveh: Gny vavahadin'gnyu kianza agnatiny, magnatriky gny asinagna, dra hakatoky mandrisy gny eny andro amin'gny fiasa, fa hosokafa koa zeho amin'gny Sabata, vo amin'gny andron'gny voloham-bola. ² Hilisy gny ivelan'gny kianza amin'gny lalan'gny vavahady vo gny lavaranga boaky agny ivelan'izeho gny andriandahy, dra hisana magnoloa gny tolam-batrangaran'gny vavahady agnatiny no bo manao gny fagnatisiny oroa vo gny fagnati-pihavagna gny pisoro. Dra hagnome voninahisy eo an-tokonam-batrangaran'gny vavahady agnatiny izy dra hiboaky, fa sy hakatoky gny vavahady m,andra-pahariva. ³ Gny vahoakin'gny tany avo koa dra manopo eo agnatrehan'i Yaveh eo amin'gny filira amin'iho vavahady iho amin'gny Sabata vo reo voloham-bola. ⁴ Gny fagnatisy oroa ze atolosy gny andriandahy ho N'i Yaveh amin'gny andro Sabata dra zanak'agnondry eny sy misy kiema vo osy lahy sy misy kilema. ⁵ Gny fagnatisy vary mindray amin'gny osy lahy dra ho efaha raiky, vo gny fagnatisy vary minadray amin'gny zanak;agnondry dra ze iriny ome, vo dililo raiky hina isaky gny vary raiky efah. ⁶ Amin'gny andron'gny voloham-bola dra aoky izy hanolosy agnomby sy misy kilema boaky amin'gny andian'agnomby, zanak'agnondry eny, vo aosy lahy sy manan-kilema. ⁷ Aoky izy hanao fagnatisy vihy raiky efaha isam-batotr'agnombalahy, vo raiky efaha ho an'gny agnondry lahy, vo ze iriny ho an'ireo zanak'agnondry, vo dililo raiky hina isan'efaham-bary aby. ⁸ Nofa milisy amin'gny vavahady vo gny lavarangany gny andriandahy, dra aoky izy hiala amin'gny lala nandehany avo. ⁹ Fa nofa avy eo agnatrehan'i Yaveh amin'ireo firavravoa voatondro gny olon'gny tany, ndre ia ndre ia milisy amin'gny vavahady avarasy so hanopo dra aoky hiboaky amin'gny vavahady asimo; vo ndre ia ndre ia milisy amin'gny vavahady asimo dra aoky hiboaky amin'gny vavahady avarasy. Sy miay olo afaky mihery agny amin'gny vavahady ze nilirany, fa sy mainsy miboaky mahisy izy. ¹⁰ Aoky ho eo agnivon'ereo gny andriandahy; nofa milisy ao ereo, dra sy mainsy milisy izy, vo nofa miala ereo, dra sy mainsy miala ¹¹ Ao amin'ireo firavoravoa, aoky ho efaham-bary raiky isam-batos'agnombilahy vo efaha isan'agnondry lahy gny fagnatisy vary, vo ndre ino ndre ino iriny ome mindray amin'ireo zanak'agnondry, vo dililo raiky hina isan-kefaha. ¹² Nofa magnome fagnatisy an-sitrapo gny andriandahy, nafagnatisy oroa na fagnati-pivavaha ho an'i Yaveh, dra ho sokafa ho anazy gny vavahady ze magnatriky gny asinagna. Hanolosy gny fagnatisiny oroa na gny fagnati-pihavagnany manahaky gny ahiny isan'andro Sabata izy. Bokeo dra sy mainsy hiboaky izy, vo afaran'gny hiboahany dra hakatoky gny vavahady. ¹³ Fagnapin'izeho, hagnome zanak'agnondry sy misy kilema eritao ho fagnatisy oroa ho an'i Yaveh isan'andro hanao; hanao zeho isaky maray hanao. ¹⁴ Hagnome fagnatisy vary miaraky amin'izeho isaky maray hanao, gny apahaheny amin'gny efaha vo apahatelon'gny dililo raiky hina so handemana gny koban'gny fagnatisy vary ho an'i Yaveh, araky gny lalagna maharisy. ¹⁵ Hikarakara gny zanak'agnondry, gny fagnatisy vihy, vo gny dililo isaky maray, fagnatisy oroa maharisy ereo. ¹⁶ Zeho gny zakan'gny Tompo Yaveh: No magnome fagnomeza ho an'gny raiky amin'ireo zanadahiny gny andriandahy, lova zeho. Ho fanagnan-zanany zeho, lova zeho. ¹⁷ Fa no magnome fagnomeza boaky amin'gny lovany ho an'gny raiky amin'ireo panopony izy, dra ho an'gny panopo zeho ambara-pahavin'gny tao fahafaha, vo bokeo dra hihery agny amin'gny andriandahy zeho. Reo lovany dra ho an'ireo zanadahiny vatany. ¹⁸ Sy hangalaky gny lovan'gny olo amin'gny zara-taniny avo gny andriandahy; sy mainsy hagnome boaky amin'gny zara-taniny ho an'ireo zandahiny izy so sy hielezan'ireo oloko, reo olo kiraikiraiky boaky amin'gny zara-taniny avo."' ¹⁹ Vo bokeo nanday anahy teo amin'gny filira teo amin'gny vavahady magnagno amin'ireo efisy masin'ireo pisoro gny olo, ze nagnatriky gny avarasy dra ingo! Nisy toera tagny andrefa. ²⁰ Ho izy taminahy ho: "Tiky gny toera ze sy mainsy hahandroan'ireo pisoro gny fagnati-pagnoregna vo fagnatidy nahon'gny ota dra ze sy mainsy hagnedasan'ereo gny fagnatisy vihy. Sy tokony handay fagnatisy ao ivelan'gny kianza ereo, fa bokeo dra ho hamasigny gny vahoaky. ²¹ Bokeo dra nanday anahy tagny amin'gny kianza ivelany izy dra nandesiny tagny amin'gny zorony efas'izeho kianza zeho zaho, dra hitako fa nisy fisara hafa tamin'gny zoron'gny kianza aby. ²² Amin'ireo zorony efasy gny kianza ivelany dra nisy kianza keliky efasy, efapolo hakiho gny halavany vo telopolo gny velarany. Refy mitovy aby ho an'ireo kianza efasy aby. ²³ Misy toera nahy tamin'gny vato nagnodidy gny efasy tamin'ereo, vo gny fata fandrahoa dra tao amban'gny laharam-bato. ²⁴ Ho gny lelahy taminahy ho: "Reo gny toera ze hahandroan'gny panonon'gny tepoly gny soron'gny vahoaky."