¹ Avy taminahy gny zakan'i Yaveh, manao anizahoky ho: ² "Ry zanak'olo, apagnatreho an'i Goga, gny tanin'i Magoga, gny lahibenigny zagnaharin'i Meseka vo Tobala gny tarehinao; dra maminania manohisy anazy. ³ Zakao ho: 'Izao gny zakanigny Topo Yaveh: Ingo! Manohisy anao zaho, ry Goga, lahibenigny zagnaharin'i Meseka vo Tobala. ⁴ Ko hataoko mihodikody handrareo dra hasiako faraingo gny valagnoranao; halefako miaraky aminao reo tafikao aby, reo sovala, dra reo pitikisy sovala, izy aby manao ferovan'avokoa, atoko lahibe miaraky amigny apinga lahibe vo apinga masaiky, izy aby mita mesa avokoa! ⁵ Persia, Kosa, dra Lybia dra miaraky amin'ereo, izy aby miaraky amigny apingan'ereo vo gny ferovan-dohan'ereo! ⁶ Gomera vo reo tafiny aby, dra Beta-togarma, boak'amigny farisy lavisy agny andrefa, dra reo tafiny aby! Maro reo olo gny miaraky aminao! ⁷ Mivonogna! Eh, Omagno gny vatanao vo reo tafikao miaraky aminao, dra aoky hanao ho pifehy anereo. ⁸ Ho voatoka handrareo afaranigny andro maro, dra afaky tao maro hanao dra handeha agny amigny tany ze sitrana tamigny sabasy vo navoriny boak'amireo vahoaky maro, navoriny hihery amigny tendrombohis'Israely ze faharava hatrizay. Fa gny tanin'ireo vahoaky dra hala boak'eo amireo vahoaky, dra hitoby sy amigny ahiahy ereo, izy aby! ⁹ Ko hiakasy manahaky gny fandehananigny tafion-drivosy hanao; hanahaky gny raho manaro gny tany hanao, hanao vo reo tafikao aby, reo maramila maro gny fa miaraky aminao. ¹⁰ Izao gny zakanigny Topo Yaveh: Dra amizay andro zay dra hisy eriserisy hiforo ao aponao, dra hihevisy teti-drasy hanao.' ¹¹ Dra hizaka handrareo ho: 'Hiakasy ho agny amigny tany malalaky zaho; ho agny amireo vahoaky mangina mitoby sy amin'ahiahy zaho, izy aby dra mitoby agny amizay sy misy manda na hily, dra agny amize sy misy vavahadi-tana. ¹² Hanambosy reo babo zaho dra hangalasy babo, ba hindesako gny tagnako eo amireo rava ze fa azo hitoby ndraiky, dra amireo vahoaky navory boak'amireo firenena, gny vahoaky ze mahazo biby teza vo fanagna, dra reo ze monin'ao amigny evonigny tany.' ¹³ Sheba vo Dedana, dra reo pivaros'i Tarsisy miaraky amireo pialiny tanora aby dra hizaka aminao ho: 'Avy ba hambabo ra hanao? Namory reo tafikao ba hangalaky reo rava, ba hangalaky reo volafosy vo volamena, ba hangalaky gny biby tezan'ereo vo gny fanagna vo ba hahazo babo maro ra hanao?' ¹⁴ Noho izay maminania, ry zanak'olo, dra mizaka amin'i Goga ho: 'Izao gny zakanigny Topo Yaveh: Amizay andro zay, gny fa mitoby sy amin'ahiahy gny Israely oloko, dra sy hamatasy gny momba anereo ra hanao? ¹⁵ Ho avy boak'amigny toeranao boaky lavisy agny avarasy miaraky amigny tafiky lahibe hanao, izy aby mitikisy sovala, atoko lahibe, tafiky lahibe. ¹⁶ Hanafiky an'Israely vahoako manahaky gny raho ze manaro gny tany hanao. Amireo andro farany dra hinday anao hanohisy gny taniko zaho, dra mety hahafatasy Anahy reo firenena gny fa haneho gny vatako amigny alalanao zaho, ry Goga, ba ho masy eo amason'ereo. ¹⁷ Izao gny zakanigny Topo Yaveh: Sy hanao ra gny raiky ze nizakako tamin'ireo andro taloha tamigny alalanigny tanan'ireo panopoko, reo paminanin'Israely, ze naminany tamigny fotoan'ereo manoka nandrisy gny tao fa hinday anao hanohisy anereo Zaho? ¹⁸ Dra ho avy gny andro ze hanafihan'i Goga gny tanin'Israely__izay gny talilinigny Topo Yaveh__hiakasy amigny fahasiahako gny fahoriako. ¹⁹ Amigny zoto-poko vo amigny afonigny haoriako, gny hitaliliako fa amizay andro zay dra hisy horohorotany lahibe ao amigny tanin'Israely. ²⁰ Hiozongozo eto agnatrehako ereo__dra gny fian-dranomasy vo reo voronigny lagnisy, reo bibimolanigny saka, dra reo raha-managnay aby ze mandaly amigny tany, vo gny olon-drasy ze eto agnabonigny tany. Hezera reo tandrombohisy dra hihosa reo hasana, mandra-piazeran'ireo manda aby eo amigny tany. ²¹ Hitoka sabasy hanohisy anao eo amireo tendrombihisy aby zaho__izay gny talilinigny Topo Yaveh__gny sabasy gny olo sirairay dra hanohisy gny rahalahiny. ²² Boak'eo dra hisara anazy amigny areti-mandoza vo lio zaho; dra ora manafosy vo havandra dra solifara mirehisy gny harosako eo ambaniny vo reo tafiny dra reo firenena maro ze mindray aminazy. ²³ Fa haneho gny halahibeko vo gny fagnamasignako zaho dra hapahafatasy gny vatako eo amason'ireo firenena maro, dra hahafatasy ereo fa Izaho gny Yaveh."'