¹ Le nanomboke nampianatse tandriake'y ka Reke, le nimaro ty ndaty nivory tama'e teo. Nijogne tama'ty lakagne marine teo Reke, le nitoboke tagnate'e tao. Fa maro ty vahoake nijanogne agnolon-driake'y avao. ² Nampianatse iareo raha maro tama'ty fagnoharagne Reke, t'agnate i fampianarae'y tao, le izao ty nireha'e tama'iareo. ³ "Tsanogno he,teo ty ndaty nandeha nitongy. ⁴ Le nao fa nitongy reke, nisy ty nipoke mbe'y lalagne'y, naho le nivoalialia ty ndaty, naho le tsinindro ty vorogne. Ty ila'e nanjoe tane vatoegne, tsy loho nisy tane. ⁵ Avy le namoe no reke satria tsy nahazo laleke ty tane nisy aze. ⁶ Fe nimora nitsorokokogne no reke vao nibelagne te'y i andro'y fa tsy nahazo tane legne, ao nimaike. ⁷ Ty voa ilae nanjò tama'ty fatike, le nionatse i fatike'y nitelegn'aze, le tsy eo ty hamoa'e. ⁸ Le ty ila'e amizay ro nahazo tane soa, ao le niraorao namo'e niregorego, ty ila'e niavy telopolo heny, tao ty ny enempolo, tao ka ty ny zato voa." ⁹ Le hoe reke ka te: "ze manan-tsofigne hoentegne mitsandregne, mitsandregna!" ¹⁰ Naho fa tama'iareo rerike ty Jesosy, le nagnotane Aze mikasiky i fanohara'ey i marine Aze rey nao i mpiana'e roambifolo'oy. ¹¹ Le hoe Reke tama'iareo te: "Nareo ty ampahafantaragne ty kilekile ty Fanjakan'Agnahare. Fa ama'o ndaty hafa ao atao am-pagnoharagne iaby, ¹² fa ama'ty fotoagne hagnetea iareo, hagnete iareo, fe tsy hahatrea, le ama'ty fotoagne hitsanogna'e ka, hitsanogne iareo, fe tsy haharendreke, ndre hitolike iareo le hiferenaigne aze ty Andrianagnahare." ¹³ Le hoe reke ka tama'iareo te: "O tsy azo areo vao ty dika i fagnoharegne zay io? Vaho hatao'areo manao akore zane ty hahafantara'areo i ila'e rey naho izao reke? ¹⁴ I mpitonge'y zao mpisaontsin'Agnahare. ¹⁵ I nipoke andalagney'y zao, nitaliliegne, le naharey, fe ie ndra niavy ty kokolampogne nagnafake o saontsy io tama'iareo. ¹⁶ I nanjoe tama'ty tane vatoegne'y zao, naho fa naharey, le nandrambe aze an-kafaleagne. ¹⁷ Tsy misy vaha'e ty ama'areo ao, tsy maharetse fa aniany avao. A'o naho fa niavy i fijaleagne'y naho i fanenjehagne'y noho i talili'y, le avy le nikoretse iaby iareo. ¹⁸ I nanjoe tama'ty tane fatihegne'y zao. Naharey i talili'y, ¹⁹ fe ie noho'ty tahotse ama'ty tane toy, niazo ty tevam-panagnagne naho ty hatea mena, a'o le tsy eo ty hamoa'e. ²⁰ Fa i nanjoe tane soa'ay areke, ze naharey o saontsy io le nanao aze am-po vata'e, mimane aze, a'o le tsy mipapoke fa le nahavokatse, telopolo, enimpolo, le namoa zato voa." ²¹ Nisaontsy ty Jesosy nanao ty hoeke: "Ho velomegne ho lombofagne agnate harogne vao ty jiro, o le hamoake ambane farafara agne? Indeso miditse le antongoao ama'ty toko'e hisy aze. ²² A'o tsy misy raha aetake tsy hiboake, a'o tsy hisy raha ahaja tsy ho foy. ²³ A'o le mitsendregna soa areke nareo ze manan-tsofigne!" ²⁴ Hoe Reke tama'iareo te: "Mitaoa ama'ze rehake re areo, fa ty fanohara'areo avao ro hagnoharagne anareo, a'o le mbe hagnampeagne ka zay. ²⁵ Satria ndra ia ndra ia managne, mbe homeagne mihoatse izay reke, le ndra ia ndra ia tsy managne le mbe hafahagne ama'e ka zay." ²⁶ Le mbe hoe ka Reke nanao ty hoeke: "Ty doria'ay zao ty fanjakan'Andrianagnahare. ²⁷ Miroro reke naho fa halegne le mifoha naho maraigne, mitiry, fe tsy fantae te manao akore. ²⁸ Mamoa ama'ty tegna'e avao o tane'o: i rantsa'ey he ty aloha, le boakeo i taho'ey, le matoe'y ama'ty taho'ey egne i voa'ey. ²⁹ Le naho fa matoe i voa'ey le avy le akaregne, fa avy i fotoam-pamokaram-bokatse'y." ³⁰ Le hoe Reke ka te: "Atao'areo inogne o fanjakan'Agnahare zao, o tsokoreo'areo manao akore raha zao? ³¹ Manahake voandraha minjilite'ey ama'ty tane toy zao. ³² Fe ie naho fa nitongisegne ama'ty tonda le nitiry nandrare hatae bey, nagnatoliza ty vorogne ty taho'e naho ty alo'e." ³³ Le fagnoharagne maro manao izao avao ty nindese'y nagnambara ty saontse'e tama'o maro rey, le arake ty fahaonigna iareo aze, ³⁴ le tsy nisaontsy naho tsy ty fagnoharagne avao Reke. Fe ie nihazava'e tama'i mpiana'e rey naho fa nitokagne raike Reke ty dika i fagnoharagne rey iaby. ³⁵ Tama'ze andro zay,naho fa nitsofotse i andro'y,le nanao ty hoeke Reke tama'iareo: "Andao tika hitsake eroke." ³⁶ Le niala tamy maro rey iareo, ninday i Jesosy niarake tama'iareo, le nindre tama'iareo nijogne tagnate i lakagne'y ka Reke. Le nisy lakagne hafa ka nindre tama'iareo. ³⁷ Ndra nisy talio nampisorotopake i rano'y ndra ho nampilipotse i lakagne'y fa nifeno rano. ³⁸ Fe ndra nirotse ai'a ty Jesosy tagnate i lakagne'y ao. Nifohaze iareo ty Jesosy, le hoe iareo te: "Mpaganatse, tsy mampagnahy Azo vao ndra t'ie ho mate etoa tikagne?" ³⁹ Le nifoha Reke, le nasiahae i talio'y naho i riake'y te hoe: "Soa zay, mikepaha!" Le nikepake nindre tamy zay talio'oy, le hoe tsy teo. ⁴⁰ Le hoe Reke tama'iareo te : "Inogne ty atahora areo?" O mbe tsy mino avao vao nareo'o?" ⁴¹ Ndra natahotse ai'a iareo le nifampirehake te : "Ia vata'e Reke'eo, fa ndra ty talio naho ty riake magnome tò aze iaby?"