¹ Niavy nitsake ranomasigne iareo nandeha amy faritse Gerasena. ² Naho fa nizotso boake ambone i sambo kele'y ty Jesosy le nisy lahilahy raike boake ankibory ey voa ty kokolampon-draty nagnantogne aze. ³ Nitoboke tan-kibory ey avao io lahilahy io. Tsy nisy raha nahazitse aze, na rojo vigne aza. ⁴ Mateteke ty nandrohizagne aze amy ty vigne naho rojo vigne. Pinotepote'e abike i vigne naho rojo vigne nandrohizagne aze rey. Le tsy nisy ka ty hery mbe hahazitse aze. ⁵ Mily an-kibory ey naho ambohitse ey avao reke ndra atoandro ndra halegne, le mikorakorake le sady mandratse ty vata'e amy ty vato masiogne. ⁶ Naho fa nahita i Jesosy boake lavitse reke le nilomay namonje aze, le nihohokee aloha'e eo. ⁷ Nihorentsegne amy ty feo mahery reke le nanao ty tihoeke: "Inogne vao ty ifandraesantikagne Jesosy anak'Andriagnahare ambone. Misoloho ama'o amy ty agnaran'Andriagnahare raho, kou ampijalegne. ⁸ Namale aze reke nanao ty tihoeke: "Miala amy ty lahilahy toy rehe kokolampon-draty. ⁹ Le mbe nagnontanea'e ka te he: "Ia ty agnara'o?"le nivalea'e hoe :" i Legiona ty agnarako satria maro zahay te ato". ¹⁰ Le tsy nijanogne ty nangatake mafe tama'e reke mba tsy ho roahegne. ¹¹ Nisy kosogne maro ty tam-bohitse ey, ¹² le nangatake iareo te hoe :"Afindrao amy kosogne toa zahay,apoho zahay hiditse amy iareo". ¹³ Le nanga'e iareo,niboake ty kokolampon-draty niditse amy kosogne rey.Nitsombomboke i kosogne rey, nandeha agnate i ranomasigne ey, an-droarivo'e ty kosogne nimate tamy izay. ¹⁴ Nilay iareo mpiarake kosogne, le nitalily ty raha niseho amy ty ndaty an-tanagne ey naho ambanevolo agne, maro ty ndaty nivorake hisamba i raha niseho'y. ¹⁵ Naho fa niavy eo iareo nagnantogne i Jesosy, le nitrea iareo i lahilahy nivoa ty kokolampon-draty'y te mipetrake soa, miakanjo naho vory hihitse, le natahotse amzay iareo. ¹⁶ Iareo ze nahatrea ty raha niseho tam'i lahilahy niperaha ty kokolampogne'y le nitantara ambangovango'e amy iareo ty momba izay, le nitantara amy iareo ka ty momba i kosogne'ey . ¹⁷ Le nanomboke nangatake Aze iareo mba hiala amy faritane iareo'y. ¹⁸ Naho fa nijogne amy sambo kede'y Reke, le nangatake te hindre ama'e i lahilahy nivoa ty Angadraty'i. ¹⁹ Faie tsy nimete ty jesosy ,fa nanao ty tihoeke: "Mandehana moly anatragno'o agne naho amy ty longo'o,le talilio amy iareo ty natao i Tompo tama'o naho ty famindra'e fo tama'o." ²⁰ Nandeha noly reke,le nitalilie'e amy ty ndaty a-Dekapolisy ao ty raha bey natao i Jesosy tama'e, le nigaga abike iareo. ²¹ Naho fa nandeha nitsake ndraike ty Jesosy, amy sambo kede'y, le nisy ndaty maro nanao arikobogne aze, naho fa niavy agnolo i ranomasigne'y reke. ²² Niavy eo ka ty raike amy iareo mpitarike Synagoga, i Jairo ty agnara'e, naho fa nahita aze le niondreke ta'tombo eo. ²³ Nangatake te hoe: "Marare mafe fa ho mate ty anako ampela. Misoloho ama'o raho,mbetoa apetraho ama'e ty fita'o mba hahajangagne aze naho ka hahavelogne aze." ²⁴ Nandeha nindre ama'e Reke, ndaty maro ty nagnorike naho nanao arikobogne aze. ²⁵ Le nisy ampela raike voa ty lio lava fa ho roambofolo taogne. ²⁶ Fa nandany vola naho hareagne namonje mpitsabo faie le mbe tsy jangagne fa vao maike mijale. ²⁷ Naho fa nahare talily momba i Jesosy reke le niary mbafara vahoake rey ao mba hipaoke ty sarimbo'e. ²⁸ Satria hoareke: "Naho mipaoke ty sarimbo'e raho le sitragne." ²⁹ Naho fa nikasike Aze reke le nijanogne i lio lava'y,le nirei'e agnate'e ao fa nijangagne i arete'ey. ³⁰ Arofana i Jesosy fa nisy hery niboake ty ama'e. Nitolike amy ndaty maro agne reke le nanao ty tihoeke:"Ia nikasike i sarimboko'io? ³¹ Namale aze iareo mpiana'e hoe: "Tsy oni'o vao ty ndaty maro mifaneseke magnorike azo toa,le mbe magnontane ka rehe te ia midosy ahikeo." ³² Nivazoho ty magnodidigne aze ty Jesosy mba hahita'e nidosy aze'eo. ³³ I ampela'ay nahafantatse ty raha nahazo aze,le natahotse naho nititititike.Nandeha reke niantoagne aloha i Jesosy eo,nagnambara tama'e ty raha maregne abike. ³⁴ Le hoe hoe ty Jesosy tama'e: "Anake ty finoa'o ty nahajangagne azo.Mandehana am-piadanagne sady misitragna amo arete'o." ³⁵ Am'i reke mbe misaontsy,le niavy ty ndaty sasa'e avy amy mpitarike Synagoga nanao ty hoeke:"I ana'oy fa mate,magnino rehe le mbe manahiragne i mpampianatse avao" ³⁶ Naho fa naharey ty reha iareo ty Jesosy,le hoe ty natao'e amy mpitarike Synagoga'y hoe: "Ko matahotse. Minoa avao heke." ³⁷ Le tsy nisy nanga'e hindre ama'e akoatse i Petera, i Jakoba, i Jaona rahalahy i Jakoba. ³⁸ Naho fa niavy tan-tragno i mpitarike Synagoga iareo le naharey ndaty mitsokorea Reke; nitagny naho nangobabake mafe iareo. ³⁹ Naho fa niditse antragno reke, le hoe ty natao'e amy iareo: "Magnino nareo mitsokoreao naho mitomagny io?Tsy mate o'ajaja'o fa miroro." ⁴⁰ Nihehea iareo reke. Nampiakare'e antane agne abike iareo,nala'e ty baba naho ty rene i ajaja'y, naho iareo nindre tama'e, le nizilike antragno misy i ajaja'y Reke. ⁴¹ Nirambese'e ty tagna i ajaja'y le nisaontsie'e te hoe: "Talita, Komy!" Le hoe ty dika'e hoe: "O'anakampela, mirehake azo raho, mitsangana" ⁴² Leave le nitsambikigne i ajaja'y, le avy le nandeha ka(satria reke fa roambifolo taogne). Gaga abike iareo. ⁴³ Nametse mafe reke mba tsy hisy ndra ia ndra ia hahafantatse ty momba izao. Avy eo nampagnome'e hanegne i ajaja'y.