¹ Le niavotse e Sinagoga ey ndraike ty Jesosy naho le nisy ajalahy raike don-tagnagne ty tao. ² Nagnente Aze ty ila ndaty mba hahatrea ty raha hijangana'e ama ty andro Sabata mba hiboseha iareo Ama'e. ³ Le izao ty natao i Jesosy tama lahilahy don-tagnagney : "Miongaha ampagnivoa o ondaty maro etoa." ⁴ Le nisaontsy tama ndaty io Reke nanao izao te: " Tomombagne vao ty manao ty soa amy ty andro Sabata ke ty manao ty raty; ty mandrombakaigne, ke ty mahafate?" Fie le tsy nisy nahavolagne iareo. ⁵ Vignitse ty Jesosy nivazoho iareo ro nalahelo ty hamafy ty fo'iareo, le nisaontse tami lahilahy Reke te: "Ahitsio tagnaoy." Le nahitsy i lahie ty tagnae le nisitragne. ⁶ Niakatse i fariseo reo nindry ami'o herodianina'o hipay tsy ela ty fomba hamonoagne Aze. ⁷ Naho fa niavy eo i Jesosy nindre amy mpiana'eo, namonjy i ranomasegney, le nisy ndaty maro nagnorike boake Galilea naho Jodia ⁸ le ty boake Jerosalema naho ty boake Edoma le sikala ambavarano i Jordana naho ty magnodidigne i Tyra sy Sydona. Naofa naharey ty raha nata'e iareo, le nisy ndaty maro niheho amae ao. ⁹ Le nampipay sambo kedekede mpianae ty Jesoa ho Aze noho ty hamaro ty ndaty teo, mba tsy hifanosetosea ty ndaty amae. ¹⁰ Noho ty hamaro ty ndaty nositrane'e, le fonga nilay mbamae tey iaby ze ndaty nanagne aretegne. ¹¹ Naofa nahatrea Aze ze fagnahy raty, le nihohoke alohaeo le nihorentsegne, le nanao izao te : "Ihe ro Ananagnahare." ¹² Fie norarae reo te tsy hampahafantatse Aze. ¹³ Nagnavelo ambohitsey Reke, le nitoka ze teae, le nimbeo iareo. ¹⁴ Nijibogne ty folo roambe Reke ( le notokave'e te Apostoly), mba hafaha'iareo mindre amae naho ho afake hinday ze hafatse ho torie'e, ¹⁵ ary ho afake handroake kokolampo. ¹⁶ Avy eo nijibogne iareo folo roambe Reke: Simona, namea'e anaragne Petera; ¹⁷ Jakoba ana'i Zebedio, naho i Jaona rahalahi'e, le notolora'e agnaragne te Boanarijesy, magnombara te anam-baratse; ¹⁸ le i Andrea, Filipo, Baritolemeo, Matio, Tomasy, Jakoba ana'i Alfeo, Tadeo, Simona Zelota, ¹⁹ le i Jodasy Iskariota, nifototse Azey. ²⁰ Noly antragno agne Reke, le nidre niavy ami ty ndaty antanagneo, le ndra mahakama tsy nivita'iareo. ²¹ Naofa naharey izao ty longo'e le niakatse hangalake Aze, satria nohalaza'iareo te: "Vere saigne Reke." ²² le'o mpanoradalagneo nidigne ta Jerosalema ao nagnombara te: "Itoera ty Belzeboba Reke'', le, ''ami ty alala ty fagnapahae ty kokolampogne ro hagnafahae ty kokolampogne.'' ²³ Le notokave i Jesosy hombamae mbeo iareo le nanoa'e fagnoharagne te: "Akory ty ahafahae Satana handroake Satana? ²⁴ Naho misy fanjakagne raike mialy sambe fokoa'e le ho rava 'zay. ²⁵ Naho misy ka tragno raike mialy sambe iareo avao, le tsy hoela ty hiravá 'zao tragno 'zao. ²⁶ Naho nitsangagne hialy ami ty tegnae ty Satana le fa nisarake, ro tsy hoela ka ty hifaragna'e. ²⁷ Fa tsy misy ndaty afake hilitse agnate ty tragno ty lahilahy mahere raike le hitavagne ty raha anagnae naho mbe tsy mahavoafehe hey i lahy maherey, izay reke vao hijiny ty entae. ²⁸ Saontsiko soa ama'areo, fa ho afake hakeo ty ana ty olombelogne,ndre ty rehake raty aby naaka ty vavae, ²⁹ fa ty mirehake raty ty Fagnahy Masigne ro hibabe ty hakeo'e mandrapahfate'e, fa ho hanan-kakeo ami ty raha raty mandrakizay.'' ³⁰ Nagnombara izay ty Jesosy noho ty reha'iareo te: "Misy fagnahy raty Reke." ³¹ Naofa avy eo, niavy ty rene'e naho ty rahalahie nandigny Aze antany ao. Nagnirake ndaty hampahafantatse Aze iareo, le nitoka Aze. ³² Nitoboke agnilaeo aby ze fonga ndaty le nanao izao irakey te: "An-tany ao ty reneo aman-drahalahio, fa te hahavazoho Azo." ³³ Le nanoigne Reke nanao te: "Ia ty reneko naho ty rahalahiko?" ³⁴ le nitolike ami ty ndaty nitoboke agnilae Reke le hoa Reke te: "Vazo'oho, toagne ty reneko naho ty rahalahiko! ³⁵ Fa ndre ia ndra ia mampanao ty hampalio fo ty arofo Nagnahare, le izay ty rahalahiko, le rahavaviko naho reneko ka."