¹ Nisy andro tsy ampiampe, naho fa niheregne t'a Kapernoamy Reke, onegne te agnajomba ao Reke. ² Hipoke i ndaty ty teo tena tsy misy hitobohagne, ndra ty t'an-dalagne eo, le nagnambara ty saontsie tama'iareo ty Jesosy. ³ Le nisy lahilahy maromaro nagnantogn'Azy nanday lahilahy raike maleme; batay'o ndaty efa-dahy. ⁴ Naho fa tsy niafake nagnantogn'Aze marine iareo, noho'ty hamaroa i vahoake'y, le nafaha'iareo i tafo-tragno t'ambon'i Jesosy teo'y, naho fa voasoka'iareo i tafo'y, le najotso'iareo i fandriagne nandrea'i lahilahy maleme'y. ⁵ Naho fa nivazoho'e ty finoa'iareo, le nanao ty hoeke ty Jesoy tama'i lahilahy maleme'y: " Anake, voavela ty helo'o." ⁶ Le nisy ty ila'e tama'i mpahay lalàgne rey nipetrake teo, le nimonomonogne am-po'iareo agny ty hoeke: ⁷ "Manao akore ty ahafaha'ty lahilahy roagne mirehake hoe izao? Magnompa kahy ty ndaty tiagne! Tsy Andrianagnahare raiky avao vao ty afake mamela heloke?" ⁸ Avy le nione'i Jesosy tama'ty fagnahe'e ty rah nivetsovetso'y iareo. Le nanao ty hoeke Reke: "Nagnino i nareo mametsevetse ze raha zay am-po'areo agne'o? ⁹ Inogne zane ty azoazo ty mirehake ama'ty lahilahy maleme tiagne ty hoeke: 'Voavela ty helo'o' sa ty hoeke: 'Mitsangàna, jinio o fandrea'o, le mandehana'? ¹⁰ Le ty mba hahafantara'areo te managne fahefagne hamela heloke ambone ty tane toy ty Ana'O ndaty, "le hoe'y Reke tama'i maleme'y: ¹¹ "Ambarako ama'o, mitsangàna, jinio o fandrea'o, le mandehana molia an-tragno'o agne". ¹² Le avy le nitsangagne nijiny i fandrea'ey reke, le namakevake i ndaty maro'y, le nilatsa iaby i ndaty rey le nanandratse ty voninahin'Andrianagnahare, le nanao ty hoeke: "Mbe tsy nahatrea ty raha hoe itoagne zahay." ¹³ Ie naho boakeo le nagnarake i lafin-driake'y Reke, le nagnantogne Azy iaby i vahoake'y, le nampianare'e iareo. ¹⁴ Naho fa nandriogne Reke, le nivazoho'e ty Levi ana'i Alfeo nitoboke tama'ty toeragne famoriagne haga le hoe Reke tama'e: "Oriho Raho." Le nitsangagne reke le nagnorike Azy. ¹⁵ Nikama t'an-tragno'i Levy tao ty Jesosy le mpamory haga naho mpanota avao ty ankamaroa iareo niarake nikama tama'e naho i mpiana'e rey, le maro iareo te ie ty tao naho nagnarake Aze. ¹⁶ Le i mpahay lalàgne rey, Fariseo rey, naho fa nahatrea i Jesosy niarake nikama tama'o ndaty mpanota naho mpamory haga rey, le nagnontany tympiana'e nanao ty hoeke: "Nagninogne Reke miarake mikama ama'o ndaty mpamory haga naho mpanota'o?" ¹⁷ Naho fa nahaonigne izay ty Jesosy le hoe Reke tama'iareo nanao ty hoeke: "Tsy ty salama ro ho tsaboegne, fa ty marare ro mila izay. "Tsy avy hampiova havelo ty maren-tane Raho, fa ze tsy vokatse." ¹⁸ O nifaly hanigne o mpiana'i Jaona'o naho Fariseo rey. Nisy lahilahy maromaro nagnantogne Azy nanao ty hoeke: "Nagninogne o mpiana'i Jaona naho'o mpiana'iareo Frariseo'o mifaly hanigne'o, nefa o mpiana'o tsy agnate'e?" ¹⁹ Le nanao ty hoeke ty Jesosy tama'iareo: "Afake mifaly hanigne vao ty mpiatreke i fanambaliagne'y naho mbe eo i mpangala-bale'y? Naho mbe miarake ama'iareo i mpangala-baley', le tsy afake mifaly hanigne iareo. ²⁰ Mbe ho avy ze andro zay hangalagne i mpangala-bale'y ama'iareo, le ama'ze andro zay agne, ro hifaly hanigne iareo. ²¹ Tsy aharo ama'ty tsorodea ty lamba vao, naho tsy izay le hiala ama'e i tapae'y, le i vao'oy tsy ho toe ty taloha, le hindra ndraike ty harota'e. ²² Le tsy misy ndaty magnisy divay vao agnaty ty korobo holetse momoke, naho tsy zay le ho riate'i divay'y i holitse'y le ho vetrake i divay'y naho i korobo holetse'y. Fe ie, ty divay vao atao agnaty ty korobo holetse vao. ²³ Tanem-bare maromaro ty nitsitsie'i Jesosy tama'ty andro sabata, le nandrofo-bare i mpiana'e rey. ²⁴ Le nanao ty hoeke o Fariseo rey t'Ama'e: "Henteo he re, nagninogne iareo manao hoe itoagne ama'ty andro sabata'o?" ²⁵ Le nanao ty hoeke Reke tama'iareo: "Mbe tsy rendre'areo hao ty raha natao'i Davida naho fa nitrà ty hakere reke_ le ty lahilahy nagnarake aze_ ²⁶ nanao akore hao ty nizilira'iareo t'an-jomban'Andrianagnare tao tama'i andro'i Abiatara mpisorombe'y igne, le nihinagne ama'i mofo i fiatrehagne'y, nefa tsy magnara-dalàgne na ama ia na ama ia ty mihinagne aze naho tsy ty mpisorogne avao, naho ie le mbe nagnomeza'e maromaro hoahi'ty ze nagnarake aze?" ²⁷ Jesosy nisaontsy ty heoke: "Ty andro sabata le natao hoahi'ty anak'ologne, fa tsy ty ana'O ndaty ro ho natao hoahi'ty andro sabata. ²⁸ Naho izay reke, ty ana'O ndaty ro Tompo, ndra te ami'ty andro sabata aza."