¹ Sambe nitsangagne iaby ndaty rey, le ninday Aze amy hiaolo Pilato. ² Nanao ze haharaty Aze iareo, le nirehake tihoe: "Trea'ay ty lahy tiagne manivativa ty firene'ay, nandrara ty fomey haga ho ey Kaisara, le mbe ty vatae hinaneo ro mirehake te Reke ro Kristy mpanjaka." ³ Pilato nagntane tihoeke Aze te: "Ihe vao ro mpajaka ty Jiosy?" Jesosy nanoigne aze te: "Ie tsarao zay." ⁴ Pilato nirehake amy beim-pisorogne naho ndaty maro rey te: "Tsy treako ty hadisoa ty lahy toy." ⁵ Fie le mbe nagnonjongne nirehake izao avao iareo te: "Mitrobo ndaty io, tsitsie ty fampianaragne ty a Jodia agne naho ty a Galilia agne sikala atoy." ⁶ Naho fa naharey zao ty Pilato, le nagnontane te Ntegaliliana vatae vao i lahy. ⁷ Naho fa oni'e te amy ty tane handilia Heroda Reke, le nampiomba'e ty Jesosy ho amy Heroda agne. Toe le ta Jerosalema agne avao amo andro o. ⁸ Naho fa nahatrea i Jesosy ty Heroda, le tsy nahay avao, fa toe fa niela ty nagniria'e hahatrea Aze. Naharey ty talily Aze reke, naho le te hahatrea ty raha mahalatsa maro natao'e. ⁹ Maro ty rehake natao Heroda nagnontane Jesosy, fie le tsy nanoigne aze ty Jesosy fa nitsiegne avao. ¹⁰ Nitsangagne bey mpisorogne naho mpahay lily rey nimane ty fandratiagne Aze. ¹¹ Heroda nao ty miaramila'e nanivativa i Jesosy naho nitsikikike Aze. Ie niaveo nampagnisy Aze akanjo fanjaka le nagneregne Aze ho amy Pilato agne. ¹² Fa Heroda naho Pilato nanjary ho mpiragnetse tamo andro o (Nifandrafee hey te taolo). ¹³ Nitoka o beim-pisorogne naho ty mpitsara naho indaty maro rey ty Pilato, ¹⁴ nirehake tihoeke te: "Nindese areo amako etoa ty ndaty toy hoe ndaty mitarike ty ndaty ho amy ty raty, ingy ty raha nagnonteneako Aze nagnatreke anareo, a le tsy treako ty hadisoa'e hitoria areo Aze. ¹⁵ Tsy ie zay, ndre Heroda zao mbe nagneregne Aze amantika atoy, henteo fa tsy misy raha natao'e nikaike faty. ¹⁶ A izao le hataoko ty halliloa'e, le ho votsorako Reke." ¹⁷ [Fanamaregnagne: Ty ilae nanoratse fajaka vatae tsy nagnisy ty And17 manao tihoeke te: Pilato le mamotsotse gadra raike Jiosy avao naho fa ama ty andro fete.] ¹⁸ Fa le nikorake tihoeke iareo te: "Indeso agne o lahy io, le votsoro hoanay ty Barabasy." ¹⁹ Barabasy le ajalahy raike nogadraenge amy ty tarike korontagne nao famonoagne ndaty an-tanàgne eo. ²⁰ Le nirehake ama iareo tihoe ka ty Pilato, fa te hamotsotse Jesosy. ²¹ Fie le sambe nikorake, nirehake tihoeke iareo te: "Tomboho Reke, Tomboho Reke." ²² Mbe nagneregne fagnintelo'e ama iareo ty Pilato te: "Nagnino vao, inogne ty raty vita ty ndaty toy? Tsy treako ty raha natao'e ho fagneva ty hamonoagne Aze. A le naho fa vita ty jera haliloa'e, le hamotsotse Aze raho." ²³ Fa ie mbe tsy nimete avao iareo nikorake, nangatake ty hanombohagne Aze. ²⁴ Ama ty feo iareo maro le ndra tsy nanan-dahatse ty Pilato, le nagneke ty fangataha i maro oy. ²⁵ Novotsora'e raike nangatahy iareo nigadra amy ty famonoagne ndaty naho mpitarike korotagne ey. ²⁶ Naho fa ninday Aze iareo, le tinere iareo ty Simona Ntesirenia boake ambanivolo agne, nampitrazoe iareo Hazonajaly, nagnorike Jesoa. ²⁷ Maro ty ndaty naho ty ampela niferenaigne naho nisaona Aze, ty magnorike Aze. ²⁸ Naho fa nitolika ama iareo ty Jesosy le nisaontsy tihoeke: "Ko mitagny Ahy nareo anak'ampela i Jerosalema, fa mitagnia hoe ty vata'areo naho ty ana'areo. ²⁹ Fa mbe agne ty andro hirehafa iareo tihoe te: "Haha ze betsiterake naho ty troke tsy niankaragn'anake, naho ty nono tsy nampinono ajaja.' ³⁰ Le hirehake amo vohetse eo hanao tihoeke iareo: 'mitonta ama'ay' le hanao tihoeke ama ty tane abo te: 'Tindrio zahay." ³¹ Fa naho hoe zao ty raha atao iareo ty ama ty hatà mbe legne, metsake ty hatàe maike? ³² Teo ka ty ndaty raty roe lahy hafa, nindesegne ho vonoegne reketse Amae. ³³ Ie niavy ama ty toeragne atao "Karandoha" zay iareo, le teo ty namantsiha iareo Aze, naho ndaty raty rey, _ Raikey akavanae ao raike ankavia'e ao. ³⁴ Jesosy nisaontsy tihoe: "Aba, afaho ty hakeo'e, fa tsy raha fanta iareo ty hoatao'e." Niloka iareo ty akanjo'e le zinarazara iareo. ³⁵ Mbe nitsangagne teo iaby ndaty rey naho nanao tsikike Aze mpandily rey, nirehake izao te: "Nagnavotse ndaty hafa Reke. Adogno Reke hagnavotse ty vatae, naho Ie o Kristin'Agnahare raike amy jinobogne ey." ³⁶ Miaramila rey ka le nanalatse Aze, niharine Aze, naho nagnomey vinaigitse Aze, ³⁷ nirehake zao amae te: "Naho Ihe ty mpanjaka ty Jiosy, vonjeo ty vatao." ³⁸ Nisia iareo famantatse ka tambone'e tey te: "Intoy ty mpanjaka i Jiosy." ³⁹ Ty raike amy ndaty raty finantsike reketse Amae ey mbe niteratera Aze ka, nirehake tihoeke: "Tsy Ihe vao ty Kristy? Avoto zahay naho ty vatao." ⁴⁰ Ty raike nandrara aze, nirehake hoe zao te: "Le tsy mba matahotse an'Agnahare vao iheo, ndre te ie mira avao ty sazy mahazo antikagne? ⁴¹ Ty antika roe lahy le fagneva'e, fa toe zao ty valen-ty asantika, fa ty lahy tiagne tsy ndra nisy raha raty natao'e." ⁴² Ie niaveo, le nirehake zao reke te: "Tiarovo raho Jesosy naho fa avy ama ty fanjakao Rehe." ⁴³ Jesosy nisaontsy tihoe: "Ataliliko amao, fa hinane zao avao le hindre amako am-paradisa agne rehe." ⁴⁴ Vae lera faha-enegne agne, niavy ze iegne zay le naiegne iaby ze kila tane hatra ty lera fahasivy naho fa nitsofotse i androy. ⁴⁵ Le niriatse nivaky roe i lamba agn'anjomban'Agnahare ey. ⁴⁶ Nihorentsegne ty Jesosy nanao tihoeke: "Aba, ama ty fitào ro agnisiako ty fiaiko." Naho fa vitae saontsi'e zay, le nivilasy Reke. ⁴⁷ Naho fa nahatrea zao raha iabike zao kapiteny, le nagnomey voninahitse an'Agnahare, le nirehake tihoe te: "Ndaty maregne vata'e ty lahy toy." ⁴⁸ Naho fa nahatrea izao ndaty maro nindre niavy ho vavolombelogne nagnatry maso raha nisy rey, le sambe niheregne nijera aragnagne iabike. ⁴⁹ Fa ze nahafantatse Aze nahoty ampela nagnorike Aze boake Galilia agne, le nitsangagne lavitse avao nagnente ty raha misy. ⁵⁰ Le agne ze lahy atao Josefa, nitraoke ama ty Synedriona ndaty soa naho tsy magnahy zay. ⁵¹ O lahy io le tsy nimete ty raha vinetsevetse Synedriona naho ty asa iareo. Ntejodia Amartia reke; le nipay avao ty hiharine ty fanjakan'Agnahare. ⁵² O lahio ro nandeha amy Pilato agne nangatake ty fagnova i Jesosy. ⁵³ Nazotso'e zao le finehe sarimbo, najo'e ama ty lonake raike vatobey vinaky tsy mbe nandevegnagne ndaty hatra ty nisia'e. ⁵⁴ Andro Fiomagnagne tamizao ro fa hoavy ka ty Sabata. ⁵⁵ I ampela nindre amy Jesosy Ntegalilia re, nagnorike afara avao le nahatrea ty lonake nisiagne Aze naho ty fagnova'e. ⁵⁶ Niheregne iareo le nagnalakagne raha magnitse naho menake magnitse. Fie nitra Sabata ay le nijanonge iareo fa izao ty lily.