¹ Maraindrain-tsikiake ty fiatomboha i heregnandro oy, le nandeha a-donake ey iareo reketse raha magnitse nalakagne iareo oy. ² Talaky iareo, te nivarimbarigne lavitse lonake ey i vato narindrigne aze ey. ³ Nizilika ao iareo fie tsy nahatrea ty fagnova i Andriantompo Jesosy. ⁴ Naho mbe sahiragne ty miomba o raha misy zao iareo, le intoa ty roe lahy nanampoke iareo, miakanjo raha manjelanjelatse nitsangagne agnila iareo. ⁵ Naho fa natahotse i ampelaa rey le nihohoke ama ty tany, le nirehake tihoe zao amy ampela rey iareo te: Ino hipaia'areo ty velogne amy ty misy ty maty eo? ⁶ Tsy atoa Reke, fa fa natroatse! Tiahivo ty saontsie ama areo te Ie mbe ta Galilia agne, ⁷ nagnombara te ty Ana Ondaty le hatolotse an-tagna ty behakeo le hofantsihigne amy ty Hazonajaly, le ama ty andro fahatelo le hivagnombelo." ⁸ I ampela rey le nahatiaro ty raha nisaontsi'e, ⁹ le niheregne boake an-donake agne le nitalily zao raha zao amy folo lahy raike amby rey, naho ty ilae. ¹⁰ Maria Magdalena, Johana, Maria rene i Jakoba, naho i ampela nindre Amae rey le nitalily zao amy apostoly rey. ¹¹ Fie hoe tsy nahoa i apostoly rey inogne o talily zao, le tsy ninoa iareo i ampela rey. ¹² Fie nitsangagne ty Petera naho le nilay an-donake agne, nitilihitse ty tao fa le i sarimbo ty nitrea'e mitokagne. Noly an-tragnoe agne ty Petera, nagnontane avao an-troke ty raha nisy. ¹³ Amo andro io avao, le intoa, ty roe lahy ama iareo nandeha amy ty tanàgne atao Emaosy zay, enempolo stadio miala Jerosalema eo. ¹⁴ Mbe mifampirehake ama ty raha nisy avao iareo. ¹⁵ Naho mbe mirehake avao naho nifagnontane iareo, le niharine naho nandeha nindre ama iareo ty Jesosy. ¹⁶ Fa hoe tinampen-draha ty maso iareo le tsy nahafantats'Aze. ¹⁷ Jesosy nisaontsy ama iareo roe lahy te: "Inogne raha rehafe'areo roe lahy an-dalagne izao? Nijanogne iareo le trea ty leme'e. ¹⁸ Ty raike ama iareo atao te Kleopasy, nanoigne Aze te: "Le Ihe avao vao ro ndaty ta Jerosalema ao, tsy nahafantatse ty raha nisy tao? ¹⁹ Tihoe ty saontsy Jesosy te: "Raha inogne?" Nanoigne tihoeke Aze iareo te: "Ty raha miomba i Jesosy Ntenazareana ay, mpitoky bey amy ty asa'e naho ty saontsy nagnatreke ty ndaty naho tamin'Agnahare, ²⁰ le fagnoloragne Aze tamy bey mpisorogne naho ty mpandily re, hamonoagne naho hamantsihagne Aze amy hazonajaly ey. ²¹ Fie le mbe mitamà avao zahay fa ie ty hagnavotse Israely. Eka, fa le telo andro androany ty nisia zao raha iaby zao. ²² Le mbe mahalatsa anay ka ty ampela hafa ragne'ay, nandeha an-donake ey. ²³ Naho fa tsy nahatrea ty vata'e iareo le niheregne, nitalily fa nao nisy anjely nirehake fa velogne Reke. ²⁴ Ty lahilahy raike tama'ay le nandeha an-donake ey agne, nanahake ty raha nitalillie i ampela rey ka ty nitrea'e. Fie iareo tsy nahatrea Aze." ²⁵ Jesosy nisaontsy ama iareo tihoe: "Lahy mikiteke naho ty tsy mahimbagne tsy mino ty raha tsarà ty mpitoky! ²⁶ Toe tsy ndra soa vao ty nisia ty fijalea i Kristy, hitomboa ty hasi'e?" ²⁷ Hatra i Mosesy naho ze mpitoky iabike, ty nagnazava'e Jesosy ama iareo ty miomba Aze am-po Soratse Masigne ey ao. ²⁸ Naho fa narine ty tanàgne handehana iareo, le sare nanao lia ondaty hoe handeha lavitse ty Jesosy. ²⁹ Fie notana iareo Reke tsy handeha, fa nirehake tihoe iareo: "Toboha ama'ay eto, fa hariva o andro, fa ho tsofotse." Le nijanogne nitoboke nindre ama iareo ty Jesosy. ³⁰ A naho fa tniambesatse hikama reketse iareo Reke, le nangalake mofo, nisaotse naho namaky izao, le nagnomey iareo. ³¹ Nisokake am'izao ty maso iareo nahafantatse Aze, le avy le tsy trea ty maso iareo ty nomba'e. ³² Nifampirehake tihoe iareo te: "Ty fontika vao ro tsy tampiaintika amy Ie nisaontsy antika andalagne ey naho Ie nagnazava Soratse Masigne ey?" ³³ Amy lera ingy avao, le nitsangagne iareo niheregne a Jerosalema agne. Nahatrea i folo raike amby rey nivory naho ze nindre ama iareo, ³⁴ nirehake tihoeke: "Nivagnombelo vatae ty Andriantompo fa niboake amy Simona." ³⁵ Notaliliegne ka ty raha nisy tan-dalagne ey, naho ty fomba niboaha i Jesosy ama iareo tamy fagnapahagne mofo oy. ³⁶ Naho mbe nitalily zao iareo, le nijohagne agnivo iareo ty Jesosy amam-bata'e, le nisaontsy ama iareo te: "Fiadanagne ho ama areo." ³⁷ Fie niendrake naho natahotse iareo, fa atao iareo ho nahatrea angatse. ³⁸ Tihoe ty nisaontsi'e Jesosy: "Nagnino nareo matahotse eo?" Nagnino mbe magnontane an-troke eo? ³⁹ Henteo ty tanako naho ty tomboko, Raho am-batako toy. Tsapao Raho le enteo. Ty angatse tsy raha ama nofo aman-taolagne, manahake ty ahatreava areo Ahy. ⁴⁰ Naho fa nisaontsy zao Reke, le natoro'e iareo ty tagnae naho ty tombo'e. ⁴¹ Ndra nilatsa naho tsy nitrea iareo ty nisia'e ty hafalea'e naho mbe nandietse avao. Nisaontsy ama iareo ty Jesosy te: "Misy raha hohanegne vao nareo?" ⁴² Nimea fiagne natono Reke, ⁴³ le nokama'e magnatreke iareo. ⁴⁴ Nisaontsy tihoeke ama iareo Reke te: "Mbe nindre ama'areo Raho, le nitalily ama'areo te ze raha sinoratse amy ty lily Mosesy naho ty mpitoky ama ty Salamo le fonga ho lefe. ⁴⁵ Sinoka'e ty say iareo, hafatara iareo ty Soratse Masigne. ⁴⁶ Nisaontsy tihoe ama iareo Reke te: "Zao ty nivoasoratse te Kristy le hijaly, le mbe hivagnombelo ka naho fahatelo andro. ⁴⁷ Fiovan-kavelogne naho fagnafahan-keloke ka ty fagneva ty agnonognagne ty agnara'e amy ty tany iabike toy, manomboke a Jerosalema ao. ⁴⁸ Inareo ro vavaolombelo ze raha iaby zay. ⁴⁹ Indao, fa halefako ama'areo ty raha nampitamaen-dRaeko. Fie mitoboha an-tanàgne eo avao hatra ty hisikina'areo ty hery boake an-danitse agne. ⁵⁰ Le nindese Jesosy iareo sikala a Betania agne. Nanandratse ty fitàe Reke, le nitata iareo. ⁵¹ Naho fa nahavita tata Reke, le nienga iareo naonjogne an-danitse agne. ⁵² Iareo nihasy Aze, niheregne mbà Jerosalema agne an-kafaleagne bey. ⁵³ Nitsily agn'anjomba fivavahagne ao, nandaza ty lazan'Agnahare.