¹ Naho fa narine ty fete ty mofo tsy milaro, atao te mofo Paska. ² I mpahay lily naho lahibey mpisorogne rey nisafire ty raha hatao hahahafaha iareo mamono Jesosy, fa natahotse i ndaty maro rey iareo. ³ A le nimoake ama i Jodasy Iskariota ao ty kokolampogne, i raike ama iareo folo lahy roe amby. ⁴ Jodasy nandeha mbamy iareo bein-pisorogne naho kapiteny rey agne le nilahatse reketse iareo ty raha hatao'e hifotera'e i Jesosy. ⁵ Tsy nahay vao iareo, le nifanta ty hagnomey vola aze. ⁶ Nimete reke, le fa nipay ty fomba hagnolora'e Aze tsy atao marine ondaty. ⁷ Avy ty andro i mofo tsy milaro fanoa iareo sorogne anak'agnondry ty Paska. ⁸ Nagnirake Jaona naho Petera ty Jesosy nanao tihoe: "Aki alakagno ty hanem-Paska ho antika, hinanantika izao." ⁹ Nagnontane tihoeke iareo te: "Aia ty tea'o hanalakagna ay?" ¹⁰ Tihoe ty natoy Jesosy iareo te: "Ie zao, naho fa mizilike an-tanagne ao nareo, le hifanalaka ty lahy reketse ty siny nareo. Oriho reke ama ze tragno iziliha'e. ¹¹ Le rehafo tompon-tragno te: 'Mpagnanatse magnombara izao amao te: 'Aia ty tragno fisiam-bahiny, hihinanako hanem-Paska reketse ty mpianako?" ¹² Le hotoroa'e tragnobey raike ambone rihagne misy seza naho latabatse soa nareo. Le ao nareo ro magnalakagne. ¹³ A le nandeha iareo, le tsy nisy niova amy ty raha tsara'e ama iareo ze raha nisy. Le nagnalakagne hanegne Paska ao iareo. ¹⁴ Naho fa avy fotoagne ey, le niambesatse nindre amy mpiana'e rey Reke. ¹⁵ Le nisaontsy tihoeke ama iareo Reke te: "Nirie ty foko vatae ty hiharo fihinagne ama'areo ty Paska toy miaolo ty ho jaleko. ¹⁶ A ataliliko anareo, fa tsy hihinagne toy ka Raho, naho tsy le avy ty hilefea zay ama ty fanjakan'Agnahare agne." ¹⁷ Nandrambe kope Jesosy, le naho fa nisaotse Reke, nisaontsy tihoeke: "Rambeso toy, ifampizarao areo. ¹⁸ Le ataliliko anareo, fa tsy hihinagne ty vokatse ama ty voaloboke ka Raho, naho tsy le avy ty fanjakan'Agnahare. ¹⁹ Le nandrambe mofo Reke, naho fa avy nisaotse nanampake izao, natolo iareo naho le nisaontsy tihoe: "Vatako toy atolotse anareo. Ano'o zao hahatiarovagne Ahy." ²⁰ Norambese'e ka kope naho fa nahavita fikama, le nanao tihoe Reke: "Ty kope toy ro titike vao ama ty lioko nailigne ho anareo. ²¹ A manoa soa, fa ty raike hifotetse Ahy le miharo latabatse amako. ²² Fa ty Ana Ondaty le magnorike vatae ty raha voasoratse. Fa ho hakeo zao lahy hifotetse Aze zao!" ²³ Nifagnontane tsikiraike iareo amo ze hahavany hanao izao. ²⁴ Teo avao ka ty raha nifandiera iareo ty ama ty ho bey ama'iareo. ²⁵ Nisaontsy tihoeke ama iareo Reke te: "Mpanjaka o Jentilisa ao ro tompo iareo, le ze mandily iareo le hatao te ndaty manao soa ama ty ndati'e. ²⁶ A inareo tsy ho'e zay fa mifanohetse ama izao. Fa ze bey ama'areo ro hanjary ho kede ama'areo, ze ambone ama'areo ro hanjary mpitorogne. ²⁷ Ia areke ty bey vatae, i mitoboke an-databatse ey vao ke i mpagnalakagne ey? Tsy zay toboke an-databatse vao? A i Raho ama'areo etoa ao le manahake ty raike ama ty mpitorogne. ²⁸ Fie naho nareo nagnorike nao tsy nienga ty atreko ze alake Ahy ho ama ty raha raty. ²⁹ Hameako fanjakagne ka nareo, manahake ty fomey ty Raeko fanjakagne ho Ahy, ³⁰ hahafaha'areo hihinagne naho hihinogne ama ty fanjakako, hitoboke ama ty fiambesara ty mpanjaka handily ty tarira Isaraely naho ty folo roe amby nareo. ³¹ Simona, Simona, manoa soa fa magnaly lalagne ho ama areo ty kokolampogne, hanivagne anareo manahake o vary eo. ³² Fa nivavake ho azo Raho, tsy ho mate ty finoa'o. Naho fa miheregne ihe, ampaherezo ty rahalahio." ³³ Petera nirehake izao te: "Andriantompo, vonogne hindre Amao am-pigadragne agne nio raho ndre ty ho mate. ³⁴ Tihoe ty natoy Jesosy: "Petera ataliliko amao, fa mbe tsy mikeokeo ty akoho amo zao andro zao, miaolo ty hanoa'o jebe Ahy." ³⁵ Le nisaontsy ama iareo Jesosy te: "Naho nagnirake anareo tsy am-poketra, tsy an-karogne naho tsy an-kana vao Raho, le nisy raha tsy niampe anareo?" "Tsy nisy" hoe ty asa iareo. ³⁶ Nisaontsy ama iareo Reke te: "A izao, ze managne fisiam-bola naho harogne, akia hangalaka aze. Ze tsy managne arara tokoe hivarotse ty lamba'e le hivily raike. ³⁷ Izao ty ataliliko anareo, ze voasoratse miomba Ahy le ho lefe: "Ie le halaegne ampanahafegne ty mandika lily.' Ze raha tsinara miomba ahike le ho lefe." ³⁸ Nirehake iareo te: "Andriantompo, heinhe! Arara roe toagne." Reke nisaontsy tihoeke: "Soa zay." ³⁹ Naho fa vita fikama, le niakatse manahake ty fata'e ty Jesosy, am-bohitse Oliva agne, le nagnorike Aze mpianatse rey. ⁴⁰ Naho fa niavy iareo, le nisaontsy tihoe ama iareo tihoe Reke: "Mivavaha nareo tsy ho azo ty tso-kevetse raty." ⁴¹ Le nisintake iareo ho'e ty raha torake vato Reke, le nitongalike nivavake, ⁴² nanao tihoeke: "Aba, naho zoto'o, alaviro Ahy ty kope mafaitse toa, fie ty tsy zotoko nio ty hatao fa ty Azo." ⁴³ Niavy ty anjely niheho Amae, nampahere Aze. ⁴⁴ Agnate ty hasahiragne vatae Reke, le ama ty arofo'e vatae ty fivavaha'e le nikaike fana, naho le tsemboke hoe lio Reke nitsopatsopake an-tane eo. ⁴⁵ Naho fa nitroatse nahavita vavake Reke, le nandeha amy mpiana'e rey, nahavazoho iareo miroro ndese ty helo'e, ⁴⁶ le nagnontane iareo tihoeke: "Inogne ndra mampiroro anareo? Mitroara le mivavaha, tsy hoazo ty tso-kevetse raty." ⁴⁷ Le Reke mbe misaontsy, le intoagne ty ndaty maro, nidre ama i Jodasy, raike amy folo roe amby re, nitarike iareo. Niharine Jesosy reke hagnoroke Aze, ⁴⁸ Jesosy nisaontsy tihoeke amae te: "Jodasy, oroke vao ty hifoterao ty Ana Ondaty?" ⁴⁹ Naho fa nahaonigne izao mpiana'e amboho'e ao rey, le nagnontane Aze tihoe: "Andriantompo, fira'e ay o arara ao vao? ⁵⁰ Le niangitrifa iareo i mpitoro i beim-pisorogne ey, le nofirae iareo ty sofi'e havanagne. ⁵¹ Jesosy nisaontsy tihoeke te: "Soa zay." Tsinapa i Jesosy ty sofi'e, le notaha'e. ⁵² Nisaontsy amy bey mpisorogne ey, i bey agn'anjomban'Agnahare ey naho ty bey an-tanàgne ao manohetse aze rey ty Jesosy te: "Mpangalatse vao raho le ho tsepahe areo reketse boda naho arara toa ao? ⁵³ Raho nindre ama'areo lomongnandro agn'anjomba fivavahagne ao tsy nitsepahe'areo. Fie anito ty fotoa'areo, naho ty hery ty iegne." ⁵⁴ Naho fa nisambotse Aze le tinary iareo ama ty bey mpisorogne ey agne Reke. Petera nagnorike Aze lavitse avao. ⁵⁵ Naho fa nivita iareo ty rehetse afo agnivo eo le sambe nitoboke iareo, le niaro toboke ama iareo ka ty Petera. ⁵⁶ Le teo ze ampela raike mpitorogne zay naho nahatalake aze tarafe i afo, le nagnente aze aolo eo le nirehaka aze tihoeke: "Tamae ka ty lahy toy." ⁵⁷ Fie niliere i Petera tihoeke zao te: "O ene, tsy fantako Reke." ⁵⁸ Tsy niela avao ka le nisy ndaty nahatrea aze, nirehake tihoeke ka: "Raike ama iareo ka rehe." Petera nirehake zao te: "Tsy ie raho, aba." ⁵⁹ Niafake lera'e raike agne le nisy lahy raike zay tsy nimete fa nirehake tihoe: "Nindre amae vatae ty lahy tiagne, fa toe Galiliana ka reke. ⁶⁰ Petera nirehake zao te: "Tsy misy raha rendreko ze tsarao aba." Naho mbe reke mirehake ey, le nikeokeo i akoho oy. ⁶¹ Nitolike ty Jesosy, nandrendreke Petera, nitiaro Petera saontsy Andriantompo tama'e tihoeke te: "Miaolo ty keokeo akoho, le hanao jebe Ahy in-telo rehe." ⁶² Niakatse an-tany agne ty Petera nitagny le tagnie vatae. ⁶³ I lahy niambegne i Jesosy rey, nijera naho nitsikike Aze. ⁶⁴ Nisia iareo lamba manakogne Aze, le nagnontenea iareo tihoe: "Tokio areke!Ia ty lahy mijera Azo? ⁶⁵ Fonga raha rineha iareo hanoheragne Jesosy, nirehake raha raty Azy iabike. ⁶⁶ Naho fa nihandro, le nivory bey an-tanàgne naho ty mpahay lily naho ty beim-pisorogne. Nindese iareo ta Synedriona agne Reke, ⁶⁷ le nirehake tihoeke iareo: "Naho Ihe ty Kristy, le ambarao anay." Reke nisaontsy tihoeke te: "Naho hamabarako anareo, tsy hino nareo." ⁶⁸ Le naho magnontane anareo Raho, tsy hotohigne areo. ⁶⁹ A hinane zao, ty Ana Ondaty le hitoboke an-kavagna ty herin'Agnahare. ⁷⁰ Iareo iabike sambe nirehake tihoeke te: "Ana Nagnahare zane Iheo?" Jesosy nisaontsy tihoeke: "Ie notsara'areo zay fa Raho ty Ie." ⁷¹ Tihoeke ty norehafe iareo te: "A mbe inogne ipaiantika ndaty hagnamarigne zay io? Fa intika ty naharey ty vava'e."