¹ Nizilike naho nandriogne ta Jeriko ty Jesosy, ² le ingo ty lahy atao Zakaiosy zay ty teo. Izay lahibey ty mpitake karatse naho ndaty mpagnarivo. ³ Te hahatrea i Jesosy reke, fie boribory nao le tsy afake ty hahatrea am-po ndaty ao. ⁴ A le nilay niaolo ndaty rey agne reke le nanganike hataen'Adabo raike hahatreava'e Aze, fa toe handriogne amy lalagne zay ty Jesosy. ⁵ Naho fa niavy amy toeragney ty Jesosy, le niandra nagnambone Reke nirehake amae te: "Mizotsoa malaky Zakaiosy, fa ho ambahinio amao ao Raho te anito." ⁶ Le nizotso tsy ela reke nandrae Aze an-kafaleagne. ⁷ Naho fa nahatrea izao maro rey, le sambe nitoreo, nirehake teihoe: "Inge Ie nitilike i lahy behakeoy agne." ⁸ Nitsangagne ty Zakaiosy le tihoe ty norehafe'e: "Ragnandria, vazohó ty antsasa ty fanagnako hatoloko ty sahiragne, le naho misy raha nigegeako ndaty , le hoavaheko inempatse." ⁹ Tihoe ty saontsy Jesosy: "Anito ty hiavia ty fagnavotagne amy ty tragno toa, fa toe fokoa i Abrahama ka reke. ¹⁰ Fa ty Ana Ondaty le niavy hipay naho hagnavotse ze motso." ¹¹ Naho naharey zao raha iabike zao iareo, le mbe nisaontsy nanao fagnoharagne raike Reke, fa toe fa narine i Jerosalema, le sambe fa nandigne iareo ty hiboaha ty fanjakan'Agnahare eo naho eo. ¹² Ama ty manao izao le nisaontsy tihoeke Reke: "Teo ty ndaty amy ty fanjakagne raike nisintake lavitse agne hipay ty fanjaka'e le mbe hibalike ka boakeo. ¹³ Nitoka ty folo lahy amy ty mpiasa'e reke, le nanolotse farantsa folo iareo, le nirehake tihoeke: "Manoa varobarotse handigny ty fihereko." ¹⁴ Fie niheje ty tanan-draike amae reke, le nampagnoriha iareo ndaty, hirehake tihoe: 'Tsy mipay ty hanjaká ty lahy toy ama'ay eto zahay.' ¹⁵ Le naho fa nibalike reke, nandrambe ty fanjakàe, le nampitoka i mpiasa'e nimea'e volay rey hoamaeo reke, hahafantara'e ty tombo ty niazo'iareo amy ty varobarotse natao'e. ¹⁶ Niavy voaloha'e, nirehake tihoeke: 'Ragnandria, volao le nahazo tombo'e fagnimpolo'e mihoatse. ¹⁷ Nirehake rangahey te: "Mpitorogne soa, soa izao, a naho nitokisagne ama ty raha kedekede rehe, le ihe ty handily amy ty tanàgne folo.' ¹⁸ I faharo'ey naivy, nirehake tihoeke: 'Ragnandria, ty volao, le nahavy vola lime hafa.' ¹⁹ Le tihoe ty natao i rangahey: 'Handily amy ty tanàgne lime rehe.' ²⁰ Niavy raike, nirehake tihoeke: "Ragnandria, intiagne ty volao, nahajako am-po lamba ao, ²¹ fa natahotse azo raho, fa toe ndaty masiake rehe. Mangalake avao ze tsy nengao, mijinja ze tsy nafafeo.' ²² Nirehake amae rangahey te: 'Amo zao rehao raike zao ro hitsarako azo, ty mpiasa raty tiagne. Nifantao te ndaty masiake raho, mangalake avao ze tsy nengako, mijinja avao ze tsy nafafeko. ²³ A nagnino naho naseseo amy ty mpitagne vola agne ty volako, le naho fa nibalike raho ndra nangalake aze reketse ty anae? ²⁴ Le tihoe ty norehafe rangahey ama iareo nitsangangne marineo te: 'Alao amae volay, le toloro i managne foloy.' ²⁵ Le hoe ty asa iareo te: 'Ragnandria, fa managne vola folo reke.' ²⁶ Magnombara ama'areo raho, fa ze managne le homeagne ambone'e, fa ze tsy managne, le mbe hoalaegne amae ze anagnae. ²⁷ Le ty fahavaloko, malaigne ty hanjakako ama iareo etoa, ndeso areo etoa lentao miatreke ahy.'" ²⁸ Naho fa nivita zao saontsie zao, le nandeha aloha Reke, hamonje Jerosalema agne. ²⁹ Naho fa niavay agnila i Betifaga naho Betania Reke, ambohitse atao Oliva zay, le nagnirake ty roe amy mpianae rey, ³⁰ nisaontsy tihoe: "Mandenà amy ty tanàgne raike. Naho fa mizilike ao nareo, hahatrea anam-birike mbe tsy nitongoa ondaty. Hahao zao, le ndeso amako atoy. ³¹ Naho ao ty magnontane anareo tihoe: 'Ty aia ty agnaha areo io? le volagno tihoe: 'Ao ty ilà Andriantompo aze.' ³² I nirahegne nandeha rey le nahatrea anam-birike tsisy hafa amy ty nisaontsi'e Jesosy ama iareo. ³³ Naho mbe magnaha i anam-birikey iareo, le hoe ty tompoe ama iareo te: 'Ino agnaha'areo o anam-birikio? ³⁴ Nirehake zao iareo te: 'Misy ilà i Andriantompo aze.' ³⁵ Nindese iareo amy Jesosy agne zao, le nata'iareo ambone i anam-birikey ey ty lamba iareo, naho le nampitongoa iareo ambone'ey ty Jesosy. ³⁶ Naho fa Reke nandehay, le namelatse ty lambae amy lalagney iareo. ³⁷ Naho fa narine fidignagne ambohetse Oliva ey Reke, le nifale mpiana'e maro rey naho le nanandratse an'Agnahare amy ty feo mafe amy ty raha bey nitrea iareo, ³⁸ le nirehake tihoeke: 'Deraegne ze mpanjaka amy ty tahina i Andriantompo! Hiadagne ty an-danitse agne naho voninahitse andidimonegne ³⁹ hize Fariseo tama ty ndaty maro eo nirehake tihoeke: "Mpampianatse, rarao mpianao reo." ⁴⁰ Nanoigne ty Jesosy nisaontsy tihoeke: "Ataliliko ama'areo, fa naho mitsigne ireo, le o vato ro hitsikorea.' ⁴¹ Naho fa narine ty tanà i Jesosy, le niharovetse aze, ⁴² nisaontsy tihoeke: "Naho nifantao te izao andro zao, le ihe, ty raha ho ninday soa hoazo! Fie hinaneke zao le ndra raha tsy talake ty maso'o. ⁴³ Mbe hoavy amao ty andro, hagnoregna ty fahavalo'o hery amboho'o ao, le hoatao iareo arikobogne rehe le ho kalagnae ama ze kila raha hatao'o. ⁴⁴ Hatonta iareo reketse ty anao ama ty tany rehe. Le ndra vato mifanikitse tsy hoenga iareo, fa toe tsy nihai'o ty arofon'Agnahare nimane ty hagnavotse azo." ⁴⁵ Nizilika an'anjomba fivavahagne ao reke nandroake mpivarotse rey, ⁴⁶ le nisaontsy ama iareo tihoe: "Voasoratse te: 'ty anjombako le anjomba fivavahagne', fie ndra natao iareo lakato ty mpangalatse." ⁴⁷ Le nagnanatse isan'andro agnan'anjomba fivavahagne ao reke. Iareo lahibey ty mpisorogne naho mpahay lily rey le nikinia hamono Aze avao, ⁴⁸ fie tsy nihay iareo ty fomba hatao iareo hamonoagne Aze fa maro ty ndaty mimane tsanogne Aze.