¹ Le nanao fagnoharagne hoe mpiana'e rey Reke himanea'e iareo fivavahagne lomognandro, tsy hahakivy iareo. ² Le tihoeke ty natao'e: "Teo ty mpitsara tsy matahotse an'Agnahare naho tsy mihasy ndaty tamy ty tanagne raike. ³ Le nisy vantotse mpiheo ama'e ao isan'andro amo tanàgneo, nirehake amae tihoeke: 'Ampeo raho mba hanagnako ható amy ty ndaty malaigne ahy.' ⁴ Fa ie fa niela reke ty tsy nanagne vetsevetse ty hagnampe aze, fie naho fa nirehake tihoe an-tro'e agne reke te: 'Ndre te ie tsy matahotse an'Agnahare raho ndre te ie tsy mihasy ndaty, ⁵ fie ndra ho sosore ty vantotse toy raho, le ndra ho ampeako reke hahazoa'e ható, tsy hagnahiragna'e ahy amy ty fiheren-kere'e atoy.'" ⁶ Le nirehake tihoe ty Andriantompo: "Tsanogno ze nambara mpitsara tsy maregne zay. ⁷ Te tsy hagnomey ható hoe ze jinobo'e mitoreo andro naho halegne amae ka vao ty Andrianagnahare? Le hampandigne andro maroe ho'e iareo vao Reke? ⁸ A le ambarako anareo fa tsy ela avao ty hagnomeza'e ható anareo. Le ho'e zao ka, naho fa amy ty fiavia ty Ana Ondaty, hahaonigne finoagne an-tany etoa ka vao Reke?" ⁹ Le mbe nanohatse ho'e ty ilae manao ty vatae ho maregne naho mangivativa ty ndaty hafa tihoeke ka reke: ¹⁰ "Teo ty roe lahy nandeha an'anjomban'Agnahare ao hivavake_ Ty raike le Fariseo le ty raike mpitake karatse." ¹¹ I Fariseo nitsangagne le nivavake ho'e ty vatae nanao tihoeke: "Andrianagnahare, misaotse Azo raho fa tsy manahake ty ndaty hafa_mpangalatse, ndaty tsy maregne, mpandika filàgne, mbe tsy manahake ty mpitake karatse tiagne. ¹² Tsy mipaoke hanegne indroe agnate ty heregn'andro raho. Magnomey ty am-pahafolo ze raha niazoko.' ¹³ I mpitake karatsey nitsangagne lavitsey, ndre ty hiandra ty maso'e amy lanitsey tsy nivane'e, nijera ty aragna'e, nirehake tihoeke: 'Andrianagnahare, iferinaigno raho, fa ndaty behakeo.' ¹⁴ A le ataliliko anareo, fa o lahio le niheregne an-tragno'e agne malio tahigne te amy lahy raikey, fa ze manonjom-batagne le hazetse, le ze miambane hatroatse." ¹⁵ Fonga nitarike ty anae ho amae eo ze ndaty teo, magniry ty hotsapa'e, fa mpianatse rey naho fa nahatrea izao, le nandrara iareo. ¹⁶ Jesosy nitoka iareo hiharine Aze, le tihoe ty rineha'e: "Votsoro ty ajaja hiharine Ahy, ko raràgne. Fa ty ho'e iareo toa ty fanjakan'Agnahare. ¹⁷ Ataliliko soa anareo, fa ndre ia ndra ia ty tsy mandrae ty fanjakan'Agnahare manahake ty ajaja, le toe tsy hilitse amo zao." ¹⁸ Le nisy mpanampake lily raike nagnontane Jesosy tihoe: 'Mpampianatse soa vatae, inogne ty raha hatako hahazoako ty fiainagne tsitampetampetse?' ¹⁹ Jesosy nirehake amae tihoeke: "Magnino raho atao soa'o? Tsy misy ndaty soa, naho tsy Andrianagnahare avao. ²⁰ Fa haio ty lily_ Ko mandika filam-baly, ko mamono ndaty, ko mangalatse, ko miantoke vande, mihasia rae mihasia rene." ²¹ Izao ty natoy i mpanampake lily: 'Fa niambeko iaby hatra i raho mbe nikede zao." ²² Naho fa naharey izao Jesosy, le nisaontsy tihoe: "Raha raike ty tsy ampe amao, mivarotse ze kila raha anagnao rehe le zarao amy ty sahiragne, le hanagne ty harea'o an-danitse agne_ le mbeo hagnorike Ahy." ²³ Naho naharey izao i mpanampake lily, le tsy nisy fa ndaty mpagnarivo reke. ²⁴ Jesosy ka nahaonigne aze, le nikorefotse ty fiai'e [Fanamarihagne: Iareo mahay raha le sambe managne ty vetsevetse'e te ho ampilirigne etoa ty rehake hoeke: [Ie] le nikorefotse ty fiai'e. Ampirao amy ty andine'e 23] le nanao tihoeke: "Manao akore ty hasaro ty hiziliha ty mpagnararivo amy ty fanjakan'Agnahare! ²⁵ Fa toe ndra mora ka ty hiziliha ty rameva amy ty hiri-mpanjaitse, te ama ty hiziliha ty mpagnarivo amy ty fanjakan'Agnahare." ²⁶ Ze naharey zay le nirehake tihoeke: "A ho ia areke ty hoavotagne?" ²⁷ Tihoe ty natoy Jesosy: "Ze tsy hay ondaty, hain'Agnahare." ²⁸ Petera nirehake tihoeke: "Intoa zahay, nienga ze kila raha'ay le nagnorike Azo. ²⁹ Zao ty saontsy Jesosy amy iareo te: "Ataliliko soa anareo, fa tsy misy ndaty nahafoe tragno, valy, rahalahy, ty rae nao rene'e, ty anae, te ama ty fanjakan'Agnahare, ³⁰ le ze tsy hahazo raha maro amy ty tanebey toy, le ho havelogne tsitampetampetse naho fa afara agne." ³¹ Naho fa nivorie amae eo ty folo lahy roe ambe Reke, le tihoe ty nisaontsi'e ama iareo: "Ingo, manganike mba Jerosalema ntika, le ho lefe ty raha iaby sinora ty mpitoky mahakaseke ty Ana Ondaty. ³² Te hatolotse o Jentilisa'o Reke, ho heheagne, ho salaharegne, ho roràgne. ³³ Afara ty jera Aze, le hovonoe iareo Reke fe ie ama ty fahatelo andro le hivagnom-belogne indraike Reke." ³⁴ Fa ie le tsy nisy nahafantatse ty nomba zao raha zao iareo, toe rehake avony ka naho le tsy nisy naharendreke izao raha notsaragne zao. ³⁵ Naho fa narine i Jeriko ty Jesosy, le nisy lahy goa mangatake an-dalagneo, ³⁶ naho fa naharey ndaty maro mandriogneo, le nagnontane ze raha nisy. ³⁷ Nanabara iareo te Jesosy boake Nazareta mandriogneo. ³⁸ Le nitoka mafe am'izao re, nanao tihoe: "Jesosy, Foko i Davida, iferinaigno raho." Le ze nandeha aloha nandrara i lahy goa'y, le nirehaka aze hiitsigne. ³⁹ Fa ie le ndra nagnonjogne ty feo'e nanao tihoe reke: "Ry Foko Davida, iferinaigno raho." ⁴⁰ Nijanogne ty Jesosy le nampinday i lahy ho mbamae mbeo. Le naho fa narine i lahy goa'y, le nagnontane tihoe Jesosy: ⁴¹ "Inogne ty tea'o hataoko amao?" Nanoigne tihoeke reke: "Andriantompo, te hahatrea raho." ⁴² Tihoe ty natoy Jesosy aze: "Mahatreava, ty finoa'o ro nahavotsotse azo." ⁴³ Eo naho eo avao le nahatrea reke avy le nagnorike Aze, hagnomey ty hasin'Agnahare. Ze ndaty iaby naho fa nahatrea izao, le nanondrotse ty lazan'Agnahare.