¹ Jesosy nirehake amy mpiana'e rey te: "Fantatse fa toe le hisy ty raha hatafintohigne antika, fie loza hoe ze mitsikapy! ² Ty nisoa'e ndra nisiagne vatobey am-bozo'e le natorake an-driake, tsy ndra hitsikapy ty mavomavo toagne. ³ Le manoa soa nareo, naho eo ty rahalahio diso, le rarao mafe reke, a naho misoloho, le miefá. ⁴ Naho diso impito amao agnate ty andro raike reke, le hiheregne impito amao hirehake tihoe: "Misoloho raho, le toe hiefa avao rehe." ⁵ Le tihoe ty norehafe i Ampostoly rey: "Ampitombó ty finoa'ay." ⁶ Andriantompo nirehake zao te: "Naho manam-pinoagne manahake ty voan-draha minjilite'e nareo, le vita'areo ty rehake ty hatàm-boaroy roa te: 'Miombota, le mitiria andriake agne.' le ho mete areo zao. ⁷ A ho ia ama'areo ty managne ty mpiasa'e miasa tane ndre mpiroake agnondry, ro hirehake zao amae naho fa avy boake an-tonda agne te: 'Mbetoa tsy ela le mitoboha hihinagne?' ⁸ Fa tsy hirehake izao tihoeke amae: 'Analakagno raha hohaneko raho, le isio raha famehe troke ty akanjo'o le mbetoa torogno raho hatra ty hilania ty haneko naho hinomako. Le mbe hihinagne naho hinogne ka rehe. ⁹ A le hisaotse mpiasa'e vao reke ke tsy hisaotse ndra te ie nahavita ty raha nampanoegne aze reke? ¹⁰ Ndre inareo zao, naho nahavita ty raha nafantoke ama'areo nareo le hirehake tihoeke: "Mpiasa tsy mahasakagne zahay, ty raha ho natao'ay avao ro nivita'ay.'" ¹¹ Le naho fa nimbà Jerosalema Reke, le nihoza amy ty moron-tane agnivo i Samaria naho Galilea. ¹² Le naho fa nizilike amy ty tanàgne raike reke le nifanampy amy ty lahy boka folo ao. ¹³ Nitsangagne lavitse Aze iareo le nitoka mafe nirehake tihoe: "Jesosy, Andriantompo, iferenaigno zahay." ¹⁴ Naho fa nahatalake iareo Reke, letihoe ty norehafe'e: "Akia, atoro'o mpisorogne reo ty tagna'areo." ¹⁵ Naho iareo nandeha'y le nalio. Naho fa nahatrea ty raike amy iareo te fa jangagne, le niheregne, nikoke mafe nagnomey ty lazan'Agnahare. ¹⁶ Nihohoke amy ty fandia i Jesosy, nisaotsaotse Aze. Ndatio le Samaritana. ¹⁷ Le nirehake izao ty Jesosy te: "Tsy fa malio vao iareo folo? Vaho aia ty sivy? ¹⁸ Le tsy nisy niheregne hagnomey ty voninahin'Agnahare naho tsy ty raike ambahiny toy vao? ¹⁹ Le hoa Reke tamae: "Mitroara, le mandenà, fa ty finoa'o ro nahajangagna azo." ²⁰ Naho nagnontane Fariseo rey te mbia ty fanjakan'Agnahare ty ho avy, le tihoe ty natoy Jesosy: "Tsy raha talake maso ty hiavia ty fanjakan'Agnahare, ²¹ tsy hirehake izao ka iareo te: 'Intike an'ie, enteo!' na hanao tihoe: Indroagne an'ie!' Fa izao, ty fanjakan'Agnahare fa amareo ao." ²² Tihoe ty asa'e mpianatse rey: "Avy ty andro hagniria areo hahatreavagne ty raike amy ty andro ty Tirinolombelogne, fa tsy hahatrea izao nareo. ²³ Le iareo le hanao izao anareo te: 'Indroy an'ie! Intike an'ie! Ko miakatse handrombaka aze, ²⁴ fa manahake ty helatse manjelatse mitaratse ty zoro ty lanitse mitsake amy ty zoro'e raike zao, le ho'e zao ka ty Ana Ondaty amy ty andro'e. ²⁵ Fa toe le hijale naho liere ty ndaty amy ty raha maro Reke amy ty voaloha'e. ²⁶ Manahake ty raha nisy tama ty ano i Noa ka ty hisy amy ty andro ty Ana Ondaty. ²⁷ Nihinagne iareo, ninogne, nanambaly, nasese ho engagne, mandra-pizily i Noa am-po ty sambo'e ao_ A le niavy ty safo-drano nanjamagne iareo. ²⁸ Manahake ty tama ty andro i Lota_Nihinagne naho ninogne iareo, nivily naho nivarotse, namboly nao nanao tragno. ²⁹ Le tama ty andro niakara i Lota ta Sodoma tao, le afo naho solifara ro nipoke boake an-danitse agne nanjamagne iareo iabike. ³⁰ Le ho'e zao avao ka ty amy ty andro hiboaha ty Ana Ondaty. ³¹ Amo zao andro zao, le engagne hizotso hangalake ty enta'e ho ahakatse an-tany agne ty tompon-tragno; le ko engagne ka hiheregne hangalake ze an-tonda agne. ³² Tiarovo ty valy Lota, ³³ ndre ia ndra ia ty te handrombake ty fiai'e le handrebakre ty vatae, fa ze hagnare ty fiai'e le hahavotse ty vatae. ³⁴ Ataliliko anareo, fa ty halegne amo andro zao, le hisy ndaty roe miharo fandreagne raike. ³⁵ Ty raike ho rambese, ty raike ho votsoragne. Le hisy ampela roe hiaro lisagne. Ty raike ho rambese, ty raike ho votsoragne. ³⁶ [Marihegne: Misy fandikagne ilae fanjaka vatae magnafake ty andine'e faha 36 te: "Hisy roe lahy an-tonda agne, ty raike ho rambesegne, ty raike ho votsoragne."] ³⁷ Nangontane Aze tihoe iareo: "Ho aia izao, Andriantompo? Le tihoe ty natoy Jesosy: "Ze misy ty mate, ro hisiagne ty fa natraoke hiaro raike."