¹ Le tihoe ka ty natao Jesosy amy mpiana'e rey: "Teo ty lahy mpagnarivo raike nanagne mpandahatse ty fanagna'e, le natalily o ndaty te o mpandahatse ty fanagnae'o ro mandany ty fanagna'e iabike. ² Le nampitoka aze i lahy mpagnarivoy le nirehake tihoe: 'Ino raha reiko amy ty raha atao'o zao? Ambarao iaby ty omba ty nandaharao ty asa'o fa tsy ho ihe sasa to ho mpandahatse ty fanagnagne. ³ Nirehake an-troke tihoe i mpandahatse fanagna'e: "Ty akoreo ty hoataoko, fa afahe ty pataroako amy ty asa lahareko raho? Ndra hery tsy amako hondeseko hiasa tane, salatse ka raho ty hangatake. ⁴ Izao ty hataoko, naho fa haafahagne amy ty fandaharagn'asa raho, le hoampandroso'e ty ndaty amy ty tragno'e. ⁵ Avy eo i mpitàn-drahay nitoka tsikiraike amy ze nitrosa amy ty pataroa'e, le nagnontane i volaha'e reke te: 'Fire ty trosa ty pataroako amao?' ⁶ Le nirehake reke te: 'Menake oliva zato litatse.' Le tihoe ty norehafe'e amae: 'Mandrambesa taratasy le mitoboha etia tsy ela, le sorato te limampolo.' Naho niavy eo ka le nirehake tamy ty raike i mpitam-panagnagney: 'Fire ty trosao?' ⁷ Le tihoe ty natao'e: 'Vare zato gony.' Le tihoe ty natao'e amae te: 'Mandrambesa taratasy, le sorato valopolo.' ⁸ Pataro'e le nitsiriry mpitam-panagangne tsy maregney amy ty amy ty fahaia'e hevetse amy ty asa'e. Fie mahihitse ambone'e ty ana ty tane bey toy naho ty laha iareo sambe ndaty naho te ama ty ana ty mazava. ⁹ Magnombara ama'areo Raho, ty vola tsy maregne ano'o fipaian-dragnetse, le soa naho fa lany izao, le hisy handrambe anareo ay ty anjomban'Agnahare. ¹⁰ Ze itokisagne amy ty raha kedekede, le itokisagne amy ty raha bey. Le ze tsy maregne amy ty raha kedekede, le tsy ho maregne amy ty raha bey. ¹¹ Naho tsy atokisa'areo ty fampiasagne vola tsy maregne, le ia ty hahatoky anareo amy ty harea maregne? ¹² Naho tsy itokisa'areo ty ho fampiasagne ty vola ty ndaty hafa, ho ia ty hagnomey vola hoanareo mitokagne? ¹³ Tsy misy mpiasa afake hiasa amy ty pataroe roe, eo reke te halaigne ty raike le ho tea ty raike, asa ka te ie hanolo-batagne ty raike le tsy himane ty raike. Tsy afake hiaro ty ho tompo an'Agnahare naho ty hareagne." ¹⁴ I Fariseo, lako fitea vola'y, naho naharey o raha iabike izao, le nanivativa iareo. ¹⁵ Nirehake tihoeke: "I nareo magnomey ható ty vata'areo magnatreke ty ndaty fie Andrianagnahare mahaonigne ty agnate ty foe'areo. Fa ze tsiririegne agnatreha'ondaty le ho irihiagne agnatrehan'Agnahare. ¹⁶ Ty lily naho ty mpitoky fa teo hatra ty nahavia i Jaona. Fa hatra i fotoagne izay ro nitaliliegne ty talilisoa an'Agnahare, le ze kila ondaty le nimane nagnorike ty lalagne hombeo. ¹⁷ Fa le mbe mora ka ty ho afake ty tane naho ty lanitse te amy ty ho afake ty soratse kede amy ty lily tsy horihigne. ¹⁸ Ze nagnare ty valie le magnenga ampela hafa le mandika filagne, ka le magnenga ampela ty nisara-baly le mandika filagne. ¹⁹ Teo ty mpagnarivo raike nagnisy akanjo voloparasy naho doroke matify nifaly sanandro ty harea'e maro. ²⁰ Teo ka ty mpangatake raike atao Lazarosy zay nifere bey, nitoboke an-dala iareo eo, le niharoke hihinagne ze poke amy ty lataba i lahy mpagnarivoy. ²¹ Le ndre ty amboa nandriogne tsy nitselake ty feri'e. ²² Naho fa nimate i mpangatakey le nindese i anjely rey amy Abrahama agne. Nimate avao ka i mpagnarivoy naho le nalevegne, ²³ amy ty tane ty montso, naho fa nampijaleagne reke le nampibalike ty maso'e naho le nahatalaky i Abrahama naho i Lazarosy toboke agnilae eo. ²⁴ Le nitoka reke nanao tihoeke: 'Ragnandria Abrahama, feregneso raho, votsoro ty Lazarosy hampijogne ty loha tondro'e agnate ty rano toy hampagnintsigne ty lelako, fa loho agnate fijalea loatse ampo ty afo toy raho.' ²⁵ Le tihoe ty natoy Abrahama: 'Anake, tiaro'o te ze andro niaignao le raha soa avao ty niazo'o, fa ty ey Lazarosy le ty raty avao. Le ie hinaneo atoy ka reke le tambetambe ty azo'e fa fijaleagne ka ty azo. ²⁶ Tsy zay avao, fa mbe misy halibey lalike natao, tsy hahafaha ze te hitsaka etoy hitsaka mbeo, naho ty te hitsake ey hitsaka atoy.' ²⁷ I lahy mpagnarivoy nirehake tihoeke: 'Mihalaly amao raho aba Abrahama, hagnirahao aze ho antragnon-draeko ne_ fa managne rahalahy lime raho_ ²⁸ hahafahae manoro iareo tsy ho mone mbe ho avy amy ty tane fialeagne toy avao ka iareo.' ²⁹ Izao ty natoy Abrahama te: "Managne Mosesy naho ty mpitoki'e iareo; le mbe hitsanogne rey iareo.' ³⁰ Le hoe ty natoy lahy mpagnarivoy: "Tsie aba zay Abrahama, fa naho ty fa nimate ro mbamy iareo mbeo, le hiova havelogne iareo.' ³¹ Fa le mbe tihoe avao ty natoy Abrahama: 'Naho tsy mitsanogne i Mosesy naho mpitoky reo iareo, le tsy ho mete laharegne zao ndre te ie misy ndaty mate hivagnom-belogne ndraike.'"