¹ Le ndre ty mpitake karatse naho ty ry tsy vokatse le niavy eo hitsanogne Jesosy. ² Le nineoneogne ty Fariseo naho mpahay lily rey, nirehake tihoe: "Ty lahy tiagne miharo amy ty tsy vokatse, le toe mbe miharo fihinagne amae aby." ³ Jesosy nanao fagnoharagne tihoeke ama iareo, nirehake tihoe: ⁴ "Ia ama'areo ty managne agnondry zato naho le montso ty raike amae, ro le tsy hienga i sivy ambey sivampolo amonotogne agne, le hifampipay amy raike nimontsoy hatra ty hatreavagna aze? ⁵ Le naho fa trea'e zao, le hifale reke ro hitarazo zao an-tsoro'ey. ⁶ Naho fa avy an-tragnoe ao reke, le hamory ty ragne'e naho ty tanan-draike amae reke, hirehake zao ama iareo te: "Mahavia mifale mindre amako, fa nitreako i agnondriko nimontsoy.' ⁷ Hoe zao ka ty ambarako anareo, fa ho hafaleagne andanitse agne ty fiovà havelo ty behakeo raike, ndre te ie eo ty malio hakeo sivy ambe sivampolo tsy miova havelogne. ⁸ Ndre te ia ty ampela managne farantsa kede folo, le naho montso ty farantsa'e raike, le tsy handrehetse jiro, hamafa tragno, le an-joto'e ty hifampipay zao hatra ty hatreavae aze? ⁹ Le naho fa trea'e zay, le hamory ty ragne'e naho ty tanan-draike amae reke, hirehake zao ama iareo te: "Mahavia mifaly mindre amako, fa nitrea i vola farantsa kede raike nimontsoy.' ¹⁰ Hoe zao ka ty ambarako anareo, fa hisy hafaleagne ty andanitse angnatreha ty anjelin'Agnahare eo amy ty fiovà havelo ty behakeo raike. ¹¹ Ie niaveo Jesosy nirehake tihoeke: "Teo ty ndaty raike nanagn'anake roe lahy, ¹² le hoe tsitso iareoy nirehake aman-drae te: "Omeo ahy aba ze toe ho nihoahy amy ty lovako." Le zinarae amy iareo ty varae. ¹³ Tsy niela afara izay, tsitson'anakey namory ty aze iabike le nandeha amy ty firenegne raike lavitse, le agne ty nanoae fiaigne dietse nampikitsignae i varae rey. ¹⁴ Le naho fa nikintsigne ty tamae niavy ty hakere amo firenegneo, a le fa manomboke tsy mahaampe aze ty amae. ¹⁵ Nandeha reke nikarama amy ty ndaty raike amo firenegne zao, le nagniraka aze hamahagne lambo an-tonda'e agne. ¹⁶ Tsy nisy ndre ndaty raike nagnomey raha aze naho ho niharoke hihinagne i haney lamboy reke. ¹⁷ Fa naho fa niela agne reke vao nifantae ty nanao izao te: 'Fire amo mpitorogne an-draeko ao ro mihinagne maro amy ty fagnevae, á i raho toa, ro ho ompo ty hakere! ¹⁸ Hiengako ty etoa le hoaman-drako agne raho, le hirehake izao amae raho te: "Fa manan-kakeo boake amy ty lanitse raho naho agnatrehao raho aba. ¹⁹ Fa tsy fagneva ty mbe ho atao ho anao sasa raho; ampanahafo manahake o mpitoro'o reo raho." ²⁰ A izao le nandeha i tsitson'anakey le nimbàman-drae agne. Naho mbe nilavitse reke, le nitalaky rae'y, le tofotse ty arofo'e niferenaigne, le nilay, niantsampe ambozo'e naho nagnoroke aze. ²¹ I anadahy'e nirahake zao te: 'Aba, fa manan-kakeo amao naho amin'Agnahare raho. Tsy fagneva ty hatao anao.' ²² Rae'y nirehake amy mpiasa'e rey te: "Indeso atoy tsiela ty akajo farae soa, ampiakanjo'o aze, le isio peratse ty tagnae, isio hana ty tombo'e. ²³ Le naho fa avieo le ndeso sarake vondrakey le vono'o agne. Ndao hifale naho hihinagne! ²⁴ Fa toe fa nimate ty anadahiko, fa anito le nivelogne ndraike. nimotso reke naho nitrea ka ty anito. Le nifale amizay iareo. ²⁵ I zoken'anakey tsy teo fa tatonda agne. Naho fa narine i tragnoy reke, le naharey tsinjake naho raha magneno. ²⁶ Nitoka ty raike amy mpiasa'e rey reke naho le nagnontane te inogne o raha o zao. ²⁷ I mpiasa'e nirehake te: "Niheregne an-tragno ty rahalahio le namonoan-drao sarake vondrake, fa niavy soa tsy nagnahy avao reke.' ²⁸ Niboseke i zoken'ananake, le tsy nimete hilitse, naho le niakatse i ra'e, naho nanambetambe aze. ²⁹ Fie le tihoe ty natoy zoken'ananake aman-drae: "Ie zao, fa an-taogna'e maro raho ty fagnompoako azo, tsy mbe nandietse ty lahao raho, ³⁰ fie le mbe liako naho nimea'o ndre ose anakanae ho nindrezako nifaly reketse ty ragneko, ie naho fa avy ty anadahio nampikintsigne ty varao tamy ty tsimiriragne, le vinono'o ho aze ty sarake natao ty hibeiza'e.' ³¹ Tihoe ty nataon-dra'e: 'Anako, ihe le tamako eto avao, le ze raha ahike le azo iabike. ³² Fie ty rahalahio fa nimate naho nivelogne ndraike, nimontso naho nitrea indraike tiagne, le soa naho hifaleagne naho hanoagne fete.'