¹ Te indraikenagnanatse agn'anjomba fivavahagne ao ty Jesosy le nitalily fagnombara soa, niharine Aze i lahibey mpisorogne rey naho ty mpahay lily reketse ty bey an-tanàgne. ² Nirehake tiho iareo: "Ambarao anay te amy ty fahefa ia ty anoa'areo zao raha iabike zao? Le ia ka ty nagnomey azo zao fahefagne zao?" ³ Nanoigne tihoe ama iareo Reke: "Hagnontany anareo ka Raho. Ambarao ahy te mahakaseke ty ⁴ Batisa i Jaona. Boake an-danitse agne vao zao ke boake amin'Agnahare?" ⁵ Nitolake iareo, nanao tihoeke: "Naho hanao tihoe tikagne te: 'Boake an-danite' le hanao tihoe Reke: 'A ino tsy inoa areo Aze'o? ⁶ Le naho tihoe ka ty hatointika te: 'Boake ama ondaty' le ho torahe ondatio ntika, fa iareo fa magneke te Jaona le mpitoky." ⁷ Ama ty manao izao, le natao iareo tsy fanta iareo ty niboaha'e. ⁸ Jesosy nisaontsy ama iareo te: "Raho ka tsy hagnombara anareo ty lily hanoako izao raha iaby zao." ⁹ Nitalily fagnoharagne ho'e zao amy ndaty maro tihoe Reke: "Teo ty rangahe raike nampiasa tanem-boaloboke, le nampanofa izao ama ty mpambole voaloboke, le nienga izao reke nandeha amy ty firenegne hafa lavitse le niela ty lia'e agne. ¹⁰ Ama ty andro raike, le nagnirake ndaty reke ho amy tanem-boalobokey, fa tokoe hagnomey voaloboke aze mpamboly rey. Fie ndra jinera i mpamboly rey reke, le noly harae. ¹¹ Le mbe nandefa mpiasa'e raike hafa ka reke fie mbe jinera iareo avao, salahare iareo, le mbe nampolie iareo harae avao. ¹² Mbe nandefa fagnintelo'e reke fie mbe jinera iareo nao rinoa iareo. ¹³ A izao le nirehake tompo i tanem-boaloboke te: 'Inogne ty hataoko? Hampandenako agne o anako teako ke ndra hiasia iareo.' ¹⁴ Fie naho fa nitalake mpamboly voaloboke rey reke, le nifampirehake tihoeke iareo te: 'Intiagne mpandovay, ndagne holentantika ndra hoantika i lovay.' ¹⁵ Noroahy iareo hisitake tanem-boalobokey reke le vinono iareo. A inogne areke ty raha hatao i tanem-boalobokey iareo? ¹⁶ Hoavy reke hampidemodemoke mpambole voaloboke rey, le hagnomey tanem-boaloboke ho'e ty ndaty hafa." Naho fa naharey zao iareo le nanao tihoeke: "Sondia'e amin'Agnahare." ¹⁷ Le nagnente iareo ty Jesosy, le nanao tihoeke: "Heinhe areke ty omba i soratse tihoekey te: 'Ty vato naria ty mpamboatse tragno ro nanjary zorom-bato?' ¹⁸ Ze raike ho tonta amy vato zay le hangomokomoke, le ze hitonta'e le hodemodemoke." ¹⁹ Naho fa nifanta i mpahy lily naho lahibey mpisorogne rey te tohetse iareo ty nampiombagne fagnoharagney lefa nite hitsepake Aze iareo fie natahotse ndaty maro rey. ²⁰ Nisafiri'e iareo soa Reke, le nagnirake ndaty maregne hiambegne ty tsara'e te ota iareo, hindesagne Aze amy ty lily naho ty fahefà ty goverinora. ²¹ Nagnontane Aze iareo, nirehake tihoeke: "Mpampianatse, hai'ay Ihe te mirehake naho manoro lalan-kavelogne amy ty maregne, tsy mipaoke ze heve'ondaty, fa le manoro maregne ty lalan'Agnahare. ²² A mete vao ke tsy mete ama'ay ty mandoa vola hoe Kaisara?" ²³ Fie niarofana i Jesosy ty fandrike tea iareo hatao, le nisaontsy tihoeke iareo te: ²⁴ 'Toro'o vola vigne raike atoy Raho. Sare ia naho ty agnara ia o amae eo? Nirehake iareo te: 'Ey kaisara' ²⁵ Reke nisaontsy ama iareo te: "A nao izao toloro Kaisara ze raha i Kaisara, an'Agnahare ze raha an'Agnahare." ²⁶ Tsy nahatrea ota amy ze tsara'e magnatreke ndaty maro iareo, fa ndra nilatsa amy ty rehake natoi'e le nitsigne. ²⁷ Naho fa niavy amae eo ty ilae amy Sadoseo nirehake te tsy misy ty fivanognam-belogne indraikey, ²⁸ le nagnontane Aze tihoe: "Mpampianatse, Mosesy nanoratse hoantika te naho maty ty rahalahy ty lahilahy raike, manambaly mbe tsy agn'anake, le soa naho i lahy rahalahi'e ro magnenga valin-drahalahi'e, hagnomey anake ho'e ty rahalahi'e. ²⁹ Teo ty mpirahalahe fito le voalohae ty nanambaly, le nimate mbe tsy agn'anake, ³⁰ faharo'e ka nihoe zay. ³¹ Nagnenga aze ka fagninteloe fa le nihoe zay iaby iareo fito sambe nimate iaby tsy agn'anake. ³² Naho fa niafara agne ka le nimate i ampelay. ³³ A aho fa agne ty fivanognagne velogne, ho valy ia areke reke? Iareo fito fa sambe nivali'e." ³⁴ Tihoe ty saontsy Jesosy ama iareo te: "Ty ana ty tanebey toy le magnenga valy naho engagne. ³⁵ Fa ze trea amo hinane zao naho ty fagneva ty hivagnom-belogne le tsy hagnenga valy naho tsy hoengange. ³⁶ Le tsy ho mate sasa iareo, fa manahake ty anjely naho ty anan'Agnahare, ze ana ty nivagnom-belogne. ³⁷ Fa ty mate vinelogne indraike, ndra i Mosesy toe fa nampiboake izao, amy ze toeragne misy voaroy zay, tamy ty nitokava'e Andriantompo ho Andrianagnahare i Abrahama naho Andrianagnahare Isaka, le Andrianagnare i Jakoba. ³⁸ Ie tsy Andrianagnahare ty mate, fa ty velogne, toe ze kila ndaty le velogne amae ao.'" ³⁹ Ty ilae amy mpahay lily nanao izao te: "Mpampianatse, soa ty natoi'o." ⁴⁰ Naho fa tsy nahavane hagnontane sasa iareo. ⁴¹ Jesosy nisaontsy ama iareo tihoeke: "Ino ty nahavia iareo hagnombara te Kristy le anadahy Davida? ⁴² Fa le ty vata i Davida ty nagnombara am-po boke Salamo te: "Andriantompo nisaontsy aman-dRagnandriako te: 'Toboha ankavagna ty Fitako etoa, ⁴³ handigne ty hanoako ty fahavalo'o ho fisia'o ty tombo'o.' ⁴⁴ Am'izao ty Davida le nanao Kristy tihoe: 'Andriantompo' A inogne ty maha ana i Davida Aze?" ⁴⁵ Magnatreke i ndaty maro rey le nisaontsy ama o mpitoky maro rey Reke te: ⁴⁶ "Miambena amy ty mpahay lily, fa magniry handeha reketse ty ankanjoe lava, magniry hosalamagne raike am-po tsena, seza voaloha'e agn'anjomba fivavahagne ao naho ty amy ty fagnombaragne. ⁴⁷ Iareo avao ka ro mbe mampikintsigne o vantotseo, le sare manao vavake lavabey ho talakesegne. Ty ndaty manao ho'e zao le hanan-kakeo bey."