¹ Le izao ty nisy naho fa nivavake amy ty toeragne raike zay ty Jesosy, nisy raike amy mpianae rey nirehake amae tihoe: "Andriantompo, anaro vavake zahay manahake ty nagnanara i Jaona ty mpianae." ² Le hoe ty nata i Jesosy amy iareo te: "Naho fa mivavake nareo le rehafo tihoe: "Raeko, hiasiagne ty tahinao. Ho avy anio ty fanjakao. ³ Omeo anay anito ty haneay sanandro. ⁴ Hahao ty hakeo'ay, manahake ty nagnahà'ay ze niota ama'ay. Ko ndesegne zahay amy ty tso-kevetse raty." ⁵ Jesosy nirehake tihoeke amy iareo te: "Ia ama'areo ro hanagne ragnetse, le handeha amae agne halegne, le hanao tihoe amae: "Ragnetse, ampisamboro mofo telo raho, ⁶ fa misy ragneko raike vaho niavy lavitse, le tsy mba misy raha hazotsoko ho aze raho.' ⁷ Le mete hanoigne aze raike an-tragno ao te: 'Ko tsobore'o raho.' Fa mihily lalagney, ndre ty anako, fa ampandreagne, reketse ahy. Fa tsy mahefa fifoha hagnomey mofo azo raho.' ⁸ Ambarako anareo fa, ndre ty tsy hitsangagne hagnomey mofo hoanareo reke ndra toe ny ragne'e nareo, fa ty fahavonognareo naho ty tsy hena'areo, le hitsangagne reke hagnomey anareo ze mofo iabike palia'areo. ⁹ Mbe magnombara anareo ka raho te, mangataha, fa hameagne anareo zao; mipaliava le hahatrea, mikonkogna, le hosokafagne nareo. ¹⁰ Fa ze ndaty iabike hangatake le hahazo, le ze mipay le hahatrea, ze mampikonkogne le hosokafagne. ¹¹ Ia ama'areo rae ondaty hinanekeo areke ro, naho mangatake fiagne ty ana'areo, le hagnomey bajigne aze fa tsy fiagne? [Tindriegne te: Ty sinoratse soa vatae misy talily tsy loho lava, ho orihintika etoa. Ty sinoratse taloha misy talily loho lava, onigne agnate i Matio 7:9 ao ka: "Rae ondaty ia ama'areo, naho mangatake mofo ty ana'areo, ro hagnomey aze vato? Nao fiagne, le hagnomey aze bajiegne?] ¹² te ie mangatake atoly reke, le hagnomey maingoka aze vao nareo? ¹³ A izao, ty nareo tserehegne mahafantatse ty magnomey raha soa hoe'ty ana'areo, le hoe ty ino ka ty habey ty Fanahy Masigne homey ty rae areo ze andagnitse agne hoe ty mangatake amae? ¹⁴ Le Jesosy nagnafake kokolampo moagne. Naho fa niakatse i kokolampogney, le nahay nirehake i lahy boboy, le niverenehake ze ndaty teo. ¹⁵ Fa ty ndaty hafa nirehake izao te: "Amy ty agnara i Belzeboba, bey ty kokolampogne, ro hagnafahae ty kokolampogne." ¹⁶ Ty ilae sare nagnontane Aze nimpay ty famantaragne boake andanitse agne amae. ¹⁷ Fe ie niarofana i Jesosy ty raha ampoe iareo ao le nirehake zao amy iareo Reke te: "Ze fanjakagne mivibike le ho rava, le ze tragno raike misaratsarake ka le tsy ho vanogne." ¹⁸ A naho mialy antragno areke ty Satana, le hanao akore ty hahareta'e amy ty fanjakae? Le hoe ty asa'areo te magnafake kokolampogne amy ty agnarae i Belzeboba Raho. ¹⁹ Nao nagnafake kokolampo amy ty fahaia'e Belzeboba Raho, le amy ty fahaia ia ka ty hagnafaha ty mpagnorike anareo aze? Naho izao, le iareo ro hitsara anareo. ²⁰ Fa naho magnafake kokolampo amy ty tanan'Agnahare Raho, le hoavy ama'areo ty fanjakan'Agnahare. ²¹ Naho fa ampe fitaovagne soa ty lahy mahery raike miambegne ty tragno'e, le tsy hisy montso ty varae, ²² fie nao mbe mahery ambone'e i lahy raikey le nahavany aze, le hoalà i lahy raike mahere ambone'ey ty fialiae, le hondese'e ty vara i lahy. ²³ Ze tsy mindre amako le manohetse Ahy, ze tsy miharo mindre amako le mivike. ²⁴ Naho fa miafake agnate o ndaty raike ty fagnahy raty, le hamonjy toeragne tsy misy rano reke hipay fitofagne. Le naho fa tsy mahatrea, le hanao zao reke te: 'Hiheregne amy ty tragno niboahako raho.' ²⁵ Naho fa miheregne reke, le hahatrea zao tragno zao malio fa vita lamigne. ²⁶ Boakeo le handeha reke hipay fagnahy raty mbe ambone'e fito isa hindre amae le hilitse ao hiaro toboke ao iabike iareo. Le mbe ho raty naho hoharigne amy voalohaey ty hiafarao zao ndaty zao." ²⁷ Le naho fa nisaontsy zao raha zao Reke, le nisy ampela nirehake mafe nirehake tagnate i ndaty rey tao nirehake tihoeke amae te: "Haha ty troke nisamahao, naho ty nono ninonoao." ²⁸ Le hoe Reke te: "Mbe haha ty mitsanogne ty saontsin'Agnahare, naho ty mimane izao." ²⁹ Naho mbe niampe avao ty ndaty teo, le hoe ty Jesosy te: "Ty fokoa toa le foko raty, mipay vilo fie tsy misy vilo hasenge aze naho tsy ty vilo i Jona. ³⁰ Toe hanahake ty fiavia i Jona ho vilo iareo Ninivita, le hoe zao ka le ho vilo ty Ana Ondaty amy ty foko toagne. ³¹ Ty mpanjaka ampela boake atimo le hitsangagne mindre amy ty lahilahy amy ty foko tiagne le tsy hagnomey to aze iareo, le hoavy boake amy ty tane farae reke le hitsanogne ty hilala i Solomona, le ingo, etoa ty ndaty ho bey ty amy Solomona. ³² Ty lahilahy Ninive le hitsangagne amy ty foko toy amy ty fitsaragne le handiso aze, fa toe nibebake tamy ty fitalilia i Jona iareo, le mbe ingo, misy bey ambone i Jona ty eto. ³³ Tsy misy ndaty raike, boake nampibelagne jiro, le hametrake zao amy ty toeragne takogne te ie hanao aze ambane harogne, fa hoatae amy ty fisiagne jiro, ho talake ze militse ty hazavagne. ³⁴ Ty maso'o ro fagnilo ty vatagne. Naho fa soa ty maso'o, le ho feno fahazavagne ty vatategna iabike. Fa naho raty ty maso'o, le haiegne ty vatao. ³⁵ A izao, miambena nareo tsy haiegne ty fazavagna ama'areo ey. ³⁶ Le, naho feno hazavagne areke ty vatao iabike, le tsy hisy ndre kede amy zao agnate ty maiegne, le hanahake ty jiro mampipelapelatse ty hazavae amao ty vatao raike. ³⁷ Naho fa nivita ty rehae, le nisy Fariseo nampandroso aze hiaro fihinagne amae an-tragnoe agne, le nilitse ty Jesosy niambesatse. ³⁸ Nilatsa i Fariseoy te tsy nisasa ty Jesosy aloha ty hinanae. ³⁹ Le hoe ty natà i Andriantompo amae te: "Hinane zao, nareo Fariseo, le manao malio ty ivela ty kope naho ty finga, fa ty agnate areo ao le feno tsereke naho haratiagne. ⁴⁰ "Nareo kede saigne! Tsy nanao ze tagnate'e ao avao ka vao ty nanao ty ivelae? ⁴¹ Omeo ze sahiragne ty agnate'e ao, le ho malio hoanareo aby ze fonga raha. ⁴² Ho loza areo Fariseo, fa naho toe mandoa ty ampafolo ty solila naho ty rota naho ty hatà ilae an-tonda ey nareo, fie tsy nahoa'areo ino ty maregne naho ty fitea an'Agnahare. Soa ty manao ty maregne naho ty mitea an'Agnahare, ro mbe tsy magnaligno ty manao ty raha hafa iabike ka. ⁴³ Loza areo Fariseo, fa tea areo ty toeragne voaolohae agnate Synagoga naho ty fiarabagne feno fihasiagne agnate tsena. ⁴⁴ Ho loza areo, fa nareo le hanahake o kibory fa tsy fantatseo le ho lialia ty ndaty fa tsy ho fantae. ⁴⁵ Ty raike amy mpampianatse lalànay nirehake amae tihoeke: "O mpampianatse, o tsarao zao le manivativa anay ka." ⁴⁶ Le Jesosy nanao izao te: "Loza hoanareo mpampianatse lalàgne! Fa mampijine raha bey tsy leo ndaty nareo, ie amizao ndre ty rambon-tanae tsy nahazo tsapa i entagne mavesatsey iaby. ⁴⁷ Ho loza areo, amy ty fagnoregnagne kibore hoe ty mpitoky nareo, fie ty raza'areo ro namono iareo. ⁴⁸ Le vavolombelogne naho magneke ty nivita ty raza'areo nareo, fa toe namono aze vatae iareo le nareo ty nagnoregne ty kiborie. ⁴⁹ Am'izao izao vao, ro nagnombara ty hilalan'Andrianagnahare ty hoe: 'Handefa mpitoky naho Apostoly ho amy iareo Raho, le iareo hamono naho halaigne ty ilae amy reo." ⁵⁰ Ty foko retoa, ro tompon'andreketse amy ty lio ty mpitoky iabike nipoke ampara ty niforognae ze kila raha, ⁵¹ nanomboke tamy ty lio i Abela hatra ty lio i Zakaria, ty vinono agnivo ty alitara naho ty fitoeragne masigne. Eka, ambarako soa ama'areo, fa ty fokoa itoa ro niantoke zay. ⁵² Ho loza'areo mpampianatse ty lalàna i Jiosy, fa nalà'areo ty lakile fagnily ty hilala, mone izao tsy militse ao ty vata'areo, le kalagna'areo ka ze hilitse." ⁵³ Tafara ty nisintaha i Jesosy teo, le nanohetse Aze mpanoratse lalàgne rey naho Fariseo rey le nidineke ty raha maro, ⁵⁴ le nipay fomba handratiagna Aze amy ty rehae avao.