¹ Tamizay, naho fa nivory ty ndaty agnarivoe maro, nimaro loatse le nifandialia tomboke iareo, le avy le nirehake amy mpianae rey Reke te: "Miambena soa amy ty fiharoagne i Fariseo, fa hasoa magnatreke izao. ² Fa tsy misy takogne tsy hiseho, le tsy misy navony tsy ho fantatse. ³ Le ndre inogne ndra inogne rineha'areo agnate ty iegne, le ho rey amy ty hazavagne, le ze rineha'areo antsofegne tagnate tragno ao le hotaliliegne ambone tragno ey. ⁴ Ambarako anareo ragneko, ko matahotse nareo mamono tena, fa afara izao le tsy misy ndra ino ndre inogne afake atae sasa. ⁵ Fa hampiambegne nareo ze tokoe hatahoragne Raho. Matahora i Raike zay, izao naho fa mahavita mamono, le managne ty fahefae hagnary anareo agn'afobey agne. Eka, mirehaka ama'areo Raho, matahora Aze. ⁶ Tsy avarotse farantsa kede roe vao ty jirioke lime? Fie tsy misy ndre raike amy rey haligno amason'Agnahare. ⁷ Fa ndre ty volo andoha'areo le vita isake iabike. Ko matahotse. Fa mbe bey nareo naho oharegne amy ty jirioke maro. ⁸ Hoa'Raho ama'areo, ze magneke Ahy agnatreha o'ndaty, ty Ana Ondaty ka le hagneke aze agnatreha ty anjelin'Agnahare, ⁹ le ze mandietse Ahy agnatreha o'ndaty le ho lieregne ka agnatreha ty anjelin'Agnahare. ¹⁰ Ze mirehake manohetse ty Ana Ondaty, le ho hahagne amae zao, fie ze mahavny mirehake raty manohetse Fagnahy Masigne, le tsy ho hahagne ndre mbia ndre mbiagne. ¹¹ Naho fa minday anareo agnatreha ty Synagoga, iareo mpagnavatse, naho ty manam-pahefa iareo, le ko matahotse amy ze findesa'areo rehake hagnarova'areo ty vata'areo, na ty raha hambara areo, ¹² fa ty Fagnahy Masigne ro hampianatse anareo ze raha tokoe horehafe'areo amy fotoagne zay." ¹³ Niavy eo le nisy ndaty raike tanan-draike amy ndaty rey nirehake tihoe: "Mpampianatse, mba rehafo ty rahalahiko hizara lova amako." ¹⁴ Jesosy nirehake zao amae te: "O lahio, ia ty nanao Ahy ho mpitsara naho ho mpanelanelagne anareo?" ¹⁵ Hoe Reke amy iareo te: " Miambena hahambena areo ty vata'areo ho lavitse ty fagniriage ty raha raty, fa ty fiaigna ty ndaty raike tsy le hiankigne amy ty fitomboa ty varae." ¹⁶ Niaveo Jesosy nanao fagnoharagne amy iareo, nanao tihoeke: "Namokatse maro ty tonda ty lahy raike manandraha, ¹⁷ le nagnontane ty vatae reke, nanao tihoe: 'Inogne ty hataoko, fa tsy managne toeragne hamoriako ty vokako raho? ¹⁸ Hoareke te: 'Zao ty hataoko. Ho ravako ty tragno fisiako vokatse le hagnoregne beibey ka raho, le ho ao ty hisiako ze vokako naho ty vokatse hafa. ¹⁹ Le hanao izao amy ty fagnahiko raho te: "Fagnahy, ihe le managne vokatse maro navory ho zoe ty taogne maro. Mimaregna soa, homana, minoma, mifalea. ²⁰ Fie Andrianagnahare nisaontsy zao amae te: "Ty lahy gege tiagne, halegne izao ty fagnahio ro hafahagne amao, le ty raha notamaneo toagne, ho ania reo? ²¹ Izao ty ndaty namore vara hoe ty vatae le tsy manan-draha agnatrean'Agnahare." ²² Jesosy nirehake tamy mpitoky rey te: "Ama izao le ambarako anareo, ko matahotse amy ty fiai'areo, amy ty hohane'areo, na ty mahakaseke ty vata'areo, ty hosikina'areo. ²³ Fa ty fiaigne mbe ambone ty hanegne, le ty vatagne mbe bey ambone ty sikigne. ²⁴ Vazoho'o ty gake, tsy mamafe rey fa le mijinja. Tsy managne fisiam-bokatse rey ndre tragno famoriagne, fie le amean'Agnahare hanegne rey. Manao akore ty hirà'areo abey amy ty vorogne! ²⁵ Ia ama'areo ro afake hagnojogne raike ty andro ivelomae amy ty fisalasalae? ²⁶ A nao zao raha kede vatae zao ro fa tsy hay areo, le ty aia ro fa atahora areo amy ty mbe ho avy? ²⁷ Vazoho'o o liliao_manao akore ty fitirie. Tsy miasa rey tsy mambole. Fie le ambarako ama'areo, fa ndre Solomona tamy ty voninahie feno le tsy nisikigne manahake ty raike amirey. ²⁸ Naho amipisikinin'Agnahare hoe rey ty akata antonda ey, ty ey androany, le naho fa maray ariagne agnate fatagne agne, ty manao akore ka ty mbe hampisikinae anareo mihoatse lavitse ty am'izao, nareo kede finoagne! ²⁹ Ko mipay ze ho hane'areo naho ty ho nome'areo, le ko matahotse. ³⁰ Fa ty firenegne iaby ambone ty tane iabike toy le mipay zao raha zao iabike, le toe arofànan-dRae areo fa ilà areo zao. ³¹ Fie kirofo ty fanjakàn'Agnahare, le hameagne ho fagnampe'e hoanareo izay raha zay. ³² Ko matahotse, nareo ry agnondre manao lia tsy ampe, fa ty Rae'areo le fale vatae ty hagnomey fanjakagne hoanareo. ³³ Avaroto ty fanagna'areo le ameo ty sahiragne. Magnamboara fisiagne vola tsy mete ho simba hoe ty vata'areo_ hareagne andanitse agne tsy mete ho lany, tsy misy mpangalatse mariny, le tsy misy bararaoke hanimba aze. ³⁴ Le amy ze toeragne hisiagne ty vara'areo avao, ro handena ty fo areo. ³⁵ Engao ty akanjo'areo lava ro hasiki'areo ty vania'areo, le engao avao ka ty jiroareo le hirehetse avao, ³⁶ le manoa manahake ty ndaty nandigny ty tompoe hiheregne boake nirebeke amy ty enga vao, le naho fa avy mampikonkogne reke, le ho afake hanokake ty lalae eo naho eo avao iareo. ³⁷ Haha ty mpagnompo, ze trea ty tompoe miambegne naho fa avy reke. Ambarako soa anareo, fa hisikigne ty sikigne lavae amy ty vania'e reke, le hametrake aze ambone latabatse iareo, le hoavy reke hanompo iareo. ³⁸ Naho ho avy amy ty lera faharoe amy ty halegne ty Andriantompo, le ndre ty amy lera fahatelo, le mahaonigne iareo fa vonogne, le ho haha o mpagnompo reo. ³⁹ Ho onjogne izay le fantaro fa, naho fanta ty tompotragno ty lera iavia ty mpangalatse, le tsy nienga vao i tragno'ey ho vakiegne reke. ⁴⁰ Mivognona avao ka, fa tsy ho haiareo ty lera ty iavia ty Ana Ondaty." ⁴¹ Petera nirahake tihoe: "Andriantompo, ama'ay avao vao ro irehafao zao fagnoharagne zao, ke amy ty ndaty iabike ka?" ⁴² Andriantompo nirehake tihoe: "Ia areke ty mpanalakagne mahatoky naho hendre hojibone ty tompo'e ho ambone ty mpagnompo'e hafa mba hagnomey iareo ty hoanjara hane iareo amy ty fotoagne mete? ⁴³ Haha zao mpagnompo zao, naho trea ty tompoe manao zao naho fa hoavy reke. ⁴⁴ Ambarako soa ama'areo fa hojibene'e hanampake ze varae iabike reke. ⁴⁵ Fie naho mirehake ampoe agne o mpagnompo zao te: 'Nahemo ty tompoko ty ho ny fiheregnae,' le nanomboke namono ty mpagnompo lahie naho ampelae, le mihinagne naho minogne, le nanjare nimamo, ⁴⁶ ty tompoe zao mpagnompo zao le hoavy hanampoke amy ty andro, naho ty lera tsy fantae, le hanampatapaka aze le hagnamboatse toeragne ho aze reketse iareo tsy mahatoky. ⁴⁷ Zao mpagnompo zao, nahafantatse ty zotom-po ty tompoe, fie le tsy niomagne naho tsy nagnorike ty zoto ty foe, le ho jeragne amy ty fijeragne maro. ⁴⁸ Fie ze tsy nahafantatse fa nanao zay hahazoa'e jera avao le hojerage amy ty fijera kede. Fa ze kila ondaty nimeagne bey, le ho beibey ka ty ho takeagna amae, le ze namantohagne bey, le mbe ho bey lavitse ka ty ho takeagna amae. ⁴⁹ Hoavy Raho hanorak'afo ambone ty tane, fa tsy hay ty fagniriako ty fa hireheta izay anianeke. ⁵⁰ Fa managne fanoagne batisa ho fanoagne batisa raho, fa tsy hay ka ty fijaleako mandrapiavia izay! ⁵¹ Mametsevetse vao nareo te avy Raho hinday fiadanagne an-tany eto? Tsie, magnombara anareo raho, fa ndra ho fisarahagne zay. ⁵² Manomboke zao ty tragno raike le hisy lime hisaratsarake_ndaty telo hagnohetse ty roe, le ty ndaty roe hagnohetse ty telo. ⁵³ Hisaratsarake iareo, ty rae hanohetse ty anadahie, le ty anadahie hanohetse ty rae; ty rene'e hanohetse ty anak'ampelae, le ty anak'ampelae hanohetse ty rene'e; ty rafozae ampela, hanohetse ty vinantoe ampela, le ty vinantoe ampela hanohetse ty rafozae ampela." ⁵⁴ Nirehake amy ndaty maro rey Jesosy te: "Naho fa matalaky rahogne mihoregne andrefagney nareo, le avy le hanao izao nareo te: 'Ho avy i oragney,' le hoavy izao. ⁵⁵ Naho fa misy tioke boake antimo, le hanao zao nareo te: 'Hisy fana bey hoavy,' le hoavy izao. ⁵⁶ Ry soamagnatreke, hai'areo ty mandineke ty fiay ty tane naho ty lanitse, le ty akore ty tsy hahaia'areo mamantatse zao andro hinane zao? ⁵⁷ Nagnino nareo ro mitsara ty maregne hoe ty vata'areo? ⁵⁸ Naho fa mandeha mindre amy ty mpifaniagne ama'areo amy ty fitsaragne ambone nareo, andalagney le ezaho alamigne mindre amae ty olagne mba ty tsy handehanae hitarike anareo ho amy ty mpitsara, le ty tsy hagnolora ty mpitsara anareo amy ty mpamatotse, le ty tsy handefasa ty mpamatotse anareo amy ty figadragna agne. ⁵⁹ Le hoaraho ama'areo, tsy ho afake ao zao nareo naho tsy le mahaefa ty vola farae kede njolite'e vatae."